អ្នកនាំពាក្យក្រសួងអប់រំ អំពាវនាវម្ចាស់ផ្ទះសំណាក់ និងអាជីករលក់ម្ហូបអាហារ កុំដំឡើងថ្លៃអំឡុងពេលប្រឡងបាក់ឌុប

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានអំពាវនាវដល់ម្ចាស់ផ្ទះសំណាក់ និងអាជីករលក់ម្ហូបអាហារទាំងអស់ សូមកុំដំឡើងថ្លៃនៅក្នុងអំឡុងពេលប្រឡងបាក់ឌុប ខណៈនៅសល់តែ១៣ថ្ងៃទៀតប៉ុណ្ណោះនឹងឈានចូលដល់ថ្ងៃប្រឡង។

លោកស្រី ឃួន វិច្ឆិកា បានមានប្រសាសន៍នៅរសៀលថ្ងៃទី២៥កញ្ញានេះថា «កន្លងមកតែងតែមានការសហការជាមួយអាជ្ញាធរដែនដី និងអាជីវករនានាក្នុងការជួយសម្រួលដល់ដំណើការនៃការប្រឡងសញ្ញាបត្រមធ្យមសិក្សាទុតិយភូមិទទួលបានជោគជ័យ។ ដូច្នេះហើយនៅឆ្នាំនេះ ក្រសួងក៏សង្ឃឹម និងជឿជាក់ថា នឹងមានការចូលរួមគាំទ្រពីគ្រប់ភាគីពាក់ព័ន្ធទាំងអស់មិនថាអាជ្ញាធរដែនដីក៏ដូចជាអាជីវករនានា ដើម្បីសម្រួល និងជំរុញដល់ប្អូនៗចូលរួមប្រឡងនាពេលខាងមុខនេះអាចចូលរួមដោយសុវត្តិភាព និងផាសុខភាពផងដែរ»។

សូមរំលឹកថា ជារៀងរាល់ឆ្នាំមានខេត្តមួយចំនួនគាំទ្រផ្តល់កន្លែងស្នាក់នៅ កន្លែងផ្ញើកង់ម៉ូតូដោយឥតគិតថ្លៃដល់សិស្សជាបេក្ខជនប្រឡងទូទាំងខេត្ត ដែលចូលរួមប្រឡង។

លោកស្រីសូមអំពាវនាវដល់សាធារណជនក៏ដូចជាអាជីវករទាំងអស់មេត្តាចូលរួម និងសហការ និងគាំទ្រលើកទឹកចិត្តដល់សិស្សានុសិស្សដែលជាទំពាំងស្នងឬស្សីរបស់កម្ពុជា។ ព្រោះថា ពួកគាត់នឹងចូលរួមយ៉ាងសកម្មក្នុងការអភិវឌ្ឍប្រទេសជាតិក្នុងពេលអនាគត។ ដូចនេះសូមឱ្យគ្រប់ភាគីពាក់ព័ន្ធចូលរួមគាំទ្រពួកគាត់ក្នុងការចូលរួមប្រឡងនេះហើយ
ក៏ដូចជាអាជីវករទាំងអស់មេត្តាចូលរួមជាមួយពួកគាត់ដែរតាមរយៈកុំដំឡើងថ្លៃផ្ទះសំណាក់ ឬម្ហូបអាហារ។

លោកស្រី ឃួន វិច្ឆិកា បានបន្ថែមថា ការប្រឡងបាក់ឌុបឆ្នាំនេះនឹងប្រព្រឹត្តិទៅនៅថ្ងៃទី៨ និងទី៩តុលា ខាងមុខ ដោយមានបេក្ខជនដាក់ពាក្យប្រឡងចំនួន ១៣៧ ០៤០នាក់ ស្រី ៧៤ ៨៨២នាក់ ចែកជា ២៣០ មណ្ឌល ត្រូវជា ៥ ៥៣៤​បន្ទប់។ ក្នុងនោះថ្នាក់វិទ្យាសាស្ត្រមានចំនួន ៣៩ ៣៥៨នាក់ ស្រី ២៣ ៧១៥នាក់ មាន ៧៣មណ្ឌល ត្រូវជា ១៦០៣ បន្ទប់ និងថ្នាក់វិទ្យាសាស្ត្រសង្គមមានចំនួន ៩៧ ៦៨២នាក់ ស្រី ៥១ ១៦៧នាក់ មាន ១៥៧មណ្ឌល ត្រូវជា​ ៣ ៩៣១ បន្ទប់។

លោកស្រីបានបន្តទៀតថា ចំនួននេះបើធៀបទៅនឹងសម័យប្រឡងថ្ងៃទី០៦វិច្ឆិកា ឆ្នាំ២០២៣កន្លងទៅឃើញថាមានការថយចុះ ខណៈឆ្នាំមុនមានបេក្ខជនដាក់ពាក្យប្រឡងចំនួន ១៣៧ ៤១៣នាក់ ស្រី ៧៣ ២៧៩នាក់ ក្នុងនោះ បេក្ខជនថ្នាក់វិទ្យាសាស្ត្រ ៤១ ៣៧៩នាក់ ស្រី ២៤ ៧៨៩នាក់ និងថ្នាក់វិទ្យាសាស្ត្រសង្គម ៩៦ ០៣៤នាក់ ស្រី ៤៨ ៤៩០​នាក់ ចែកជា ២២៧មណ្ឌល ក្នុងនោះមណ្ឌលថ្នាក់វិទ្យាសាស្ត្រ ៧២ និងមណ្ឌលថ្នាក់វិទ្យាសាស្ត្រសង្គម ១៥៥ ចែកជា៥
៥៤៣ បន្ទប់ ក្នុងនោះថ្នាក់វិទ្យាសាស្ត្រ ១ ៦៨២បន្ទប់ និងវិទ្យាសាស្ត្រសង្គម ៣៨៦១បន្ទប់។

ក្នុងនោះមានបេក្ខជនប្រឡងជាប់បាក់ឌុបសរុប ៩៨ ៤៦០នាក់ត្រូវជា៧២,៨៩ភាគរយនៃចំនួនបេក្ខជនមកប្រឡងចំនួន ១៣៥ ០៨៤នាក់ស្រី៧២ ៣៤៤ នាក់ក្នុងនោះបេក្ខជនជាប់និទ្ទេស A ចំនួន ១ ៦៧៣ នាក់,និទ្ទេស Bចំនួន ៦៩៦៤នាក់និទ្ទេស C ចំនួន ១៨ ៣០៨ នាក់, និទ្ទេស D ចំនួន ៣៤ ២៤៦នាក់,និងនិទ្ទេស E ចំនួន ៣៧ ២៦៩ នាក់។

លោកស្រីបានបញ្ជាក់ថា ប្រឡងបាក់ឌុបនៅឆ្នាំនេះយើងគ្រោងថវិកាប្រមាណ ២៥ពាន់លានរៀល ស្មើនឹងប្រមាណ​៦,២៥លានដុល្លារ សម្រាប់ដំណើរការនៃការប្រឡងនេះទៅលើការឧបត្ថម្ភគណៈកម្មការនានា ក្នុងកិច្ចដំណើរការប្រឡង ដែលមាន៤ដំណាក់កាល គឺការតាក់តែងប្រធានវិញ្ញាសា ពេលសំណេរ ពេលកំណែ និងបូកស្រង់ពិន្ទុដោយកុំព្យូទ័រ៕

អត្ថបទ៖ សំអឿន