ព័ត៌មានជាតិ

ម្ចាស់ចម្ការម្រេចម្នាក់ បង្ហាញពីបទពិសោធន៍ដាំម្រេចទទួលបានទិន្នផលខ្ពស់

បានផុស

៤ ខែ មុន

នៅ

ថ្ងៃសុក្រ ២៧ កញ្ញា ២០២៤

ដោយ

កសិករមួយរូប ដែលឆ្លងកាត់ការដាំដំណាំម្រេចរាប់ឆ្នាំមកហើយនោះបានបង្ហាញនូវបទពិសោធន៍ ក្នុងការដាំម្រេចដើម្បីឲ្យទទួលបានទិន្នផលខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សង ប្រុស អាយុ ៣០ឆ្នាំ ជាម្ចាស់ចម្ការម្រេចមានទីតាំងស្ថិតក្នុងឃុំស៊ុង ស្រុកសំឡូត ខេត្តបាត់ដំបង បានរៀបរាប់ថា លោកបានប្រកបមុខរបរដាំដំណាំម្រេចជាយូរឆ្នាំមកហើយ ដោយការដាំមិនសូវជាពិបាកនោះទេ ប៉ុន្តែត្រូវចំណាយច្រើនគួរសមទៅលើការទិញជន្លង់ ស្បៃគ្របកូនជី និងថ្នាំសម្លាប់សត្វល្អិត។

ចំពោះបច្ចេកទេសនៃការដាំដំណាំម្រេចនេះ ត្រូវបានកសិកររូបនេះពន្យល់ថា ដំបូងត្រូវដំឡើងជន្លង់ ដោយប្រក់ស្បៃដើម្បីកាត់បន្ថយកម្ដៅ នៅពេលដែលកូនម្រេចនៅតូច លុះនៅពេលវាធំខ្ពស់ទើបដោះស្បៃចេញ ហើយត្រូវជម្រះស្មៅ ស្រោចទឹក និងពូនគល់ឲ្យបាន ២ ដងក្នុងមួយឆ្នាំ ពិសេសគឺ ត្រូវបន្ថែមដីថ្មីដើម្បីជួយជំរុញក្នុងការលូតលាស់របស់ដើមម្រេច។ បន្ថែមពីនេះ ក៏ត្រូវបាញ់ថ្នាំមួយខែម្ដង អាស្រ័យទៅលើដី ប្រសិនបើដីសំបូរមេរោគ គឺត្រូវបាញ់ថ្នាំឲ្យបានញឹកញាប់។

កសិកររូបនេះបានបន្តថា ការដាំដំណាំម្រេចត្រូវប្រើរយៈពេលប្រមាណ ២ ឆ្នាំ ទើបអាចទទួលបានផលខ្លះ រហូតដល់ ៣ឆ្នាំ ទើបទទួលបានផលពេញលេញ បើក្នុងមួយជន្លង់អាចទទួលបានផលម្រេចស្ងួត ៣គីឡូក្រាម ស្មើនឹង ១០គីឡូក្រាម នៃម្រេចស្រស់ ចំណែកតម្លៃនៅលើទីផ្សារគឺមិនឋិតថេរ បើពេលណាធ្លាក់ខ្លាំងគឺបានត្រឹមតែ ១ ម៉ឺនរៀលក្នុងមួយគីឡូក្រាម តែបើថ្លៃគឺបានចាប់ពី ៣ ម៉ឺនរៀលឡើងទៅក្នុងមួយគីឡូក្រាម។

ទោះយ៉ាងនេះក្តី ម្ចាស់ចម្ការរូបនេះបានសំណូមពរដល់អាជ្ញាធរ ពិសេសខាងជំនាញពាក់ព័ន្ធ មេត្តាជួយរកទីផ្សារ ដើម្បីឲ្យបានតម្លៃសមរម្យ ក្នុងការទប់ទល់ទៅលើការចំណាយ ដូចជាថ្លៃជី ថ្នាំ និងកម្លាំងពលកម្មជាដើម ៕

អត្ថបទ : សោ និយមរ័ត្ន