ព័ត៌មានជាតិ

ទឹកជំនន់ប៉ះពាល់ខេត្ត ៥ ពលរដ្ឋជាង ៦ ម៉ឺន ៦ ពាន់នាក់ ផ្ទះជាង ៨ ពាន់ ៦ រយខ្នង និងស្រូវជាង ១ ម៉ឺន ៣ ពាន់ហិតា

បានផុស

៤ ខែ មុន

នៅ

ថ្ងៃសុក្រ ២៧ កញ្ញា ២០២៤

ដោយ

ទឹកជំនន់បានបណ្តាលឱ្យខេត្តចំនួន ៥ រងគ្រោះប៉ះពាល់ប្រជាពលរដ្ឋចំនួន ៦៦ ០៧៦ នាក់ ស្មើនឹងជាង ២២ ១១២ គ្រួសារ ផ្ទះ ៨ ៦៣៣ ខ្នង ជម្លៀសប្រជាជន ៩៩៤ គ្រួសារ និងសន្ទូង ១៣ ៤៣២ ពាន់ហិតា និងខូចខាត ១ ៨០៥ ហិតា។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ប្រាប់កម្ពុជាថ្មី នៅព្រឹកថ្ងៃទី ២៧ កញ្ញា នេះថា រយៈពេលជាង ១០ ថ្ងៃ ពោលគឺចាប់ពីថ្ងៃទី ១៦ រហូតមកដល់ថ្ងៃទី ២៧ ខែកញ្ញា ឆ្នាំ ២០២៤ នេះ មានខេត្តចំនួន ៥ ដែលរងគ្រោះដោយទឹកជំនន់ ក្នុងនោះខេត្តក្រចេះរងគ្រោះធ្ងន់ធ្ងរជាងគេ ដោយប៉ះពាល់ ៦ ក្រុង-ស្រុក ស្មើ ៣៧ ឃុំ-សង្កាត់ ប៉ះពាល់ប្រជាជន ៥២ ៣២៦ នាក់ ស្មើនឹង ១៤ ១៥៨ គ្រួសារ ជម្លៀសប្រជាជន ១៣១ គ្រួសារ ផ្ទះ ៦ ០១៧ ខ្នង សន្ទូងពង្រោះប៉ះពាល់ ៨ ២៥៩ ហិតា និងខូចខាត ៦៨១ ហិតា។ ខេត្តសៀមរាបប៉ះពាល់ ៤ ក្រុង-ស្រុក ស្មើ ១៦ ឃុំ-សង្កាត់ ប៉ះពាល់ប្រជាជន ៥ ២៦៦ នាក់ ស្មើនឹង ១ ៣៥៥ គ្រួសារ ជម្លៀស ១៥ គ្រួសារ ផ្ទះ ១ ០៥៥ ខ្នង សន្ទូង ១ ៧១៧ ហិតា និងខូចខាត ២០៣ ហិតា។ ខេត្តស្ទឹងត្រែងប៉ះពាល់ ៦ ក្រុង-ស្រុក ស្មើ ២៥ ឃុំ-សង្កាត់ ប៉ះពាល់ប្រជាជន ៤ ៤០៥ នាក់ ស្មើនឹង ១ ១៧៥ គ្រួសារ ផ្ទះ ២៩២ ខ្នង សន្ទូង ៣៨៥ ហិតា និងខូចខាត ១៤៧ ហិតា។

ខេត្តត្បូងឃ្មុំប៉ះពាល់ ២ ក្រុង-ស្រុក ស្មើ ១៦ ឃុំ-សង្កាត់ ប៉ះពាល់ប្រជាជន ២ ៨៥៣ នាក់ ស្មើនឹង ៣ ៤៤៦ គ្រួសារ ជម្លៀសប្រជាជន ៧៩៨ គ្រួសារ ផ្ទះ ១៥៩ ខ្នង សន្ទូង ២ ៦៨៩ ហិតា និងខូចខាត ៧១០ ហិតា និងខេត្តកំពង់ចាមប៉ះពាល់ ៤ ក្រុង-ស្រុក ស្មើ ២១ ឃុំ-សង្កាត់ ប៉ះពាល់ប្រជាជន ១ ០២៦ នាក់ ស្មើនឹង ១ ៩៨៨ គ្រួសារ ជម្លៀសប្រជាជន ៥០ គ្រួសារ ផ្ទះ ១ ១១០ ខ្នងផ្ទះ សន្ទូង ៣៨២ ហិតា និងខូចខាត ៦៤ ហិតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមព្រឹត្តិបត្រព័ត៌មានរបស់ក្រសួងធនធានទឹក និងឧតុនិយម បានឱ្យដឹងថា កម្ពស់ទឹក ម៉ោង ៧ ព្រឹក ថ្ងៃទី ២៧ និងថ្ងៃទី ២៨ ខែកញ្ញា ឆ្នាំ ២០២៤ ស្ថានភាពកម្ពស់ទឹកនៅខេត្តស្ទឹងត្រែង កំពង់ចាម និងខេត្តក្រចេះ នឹងបន្តស្រកចុះជាបន្តបន្ទាប់៕

អត្ថបទ ៖ សំអឿន