ព័ត៌មានជាតិ

អាជ្ញាធរសង្កាត់ច្បារអំពៅទី ១ និង ទី ២ កំពុងព្រួយបារម្ភ ខណៈទឹកលិចតាមផ្ទះពលរដ្ឋ

បានផុស

៦ ខែ មុន

នៅ

ថ្ងៃសុក្រ ២៧ កញ្ញា ២០២៤

ដោយ

លោក ពៅ ហួត ចៅសង្កាត់ច្បារអំពៅទី ១ និង លោក យ៉ិន វុធ ចៅសង្កាត់ច្បារអំពៅទី ២ បានណែនាំដល់លោកមេភូមិ ត្រូវចុះផ្សព្វផ្សាយតាមផ្ទះប្រជាពលរដ្ឋឲ្យប្រុងប្រយ័ត្ន ខណៈទឹកជំនន់ទន្លេបាសាក់ហក់ឡើងខ្ពស់រហូតចូលដល់ផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពៅ ហួត បានប្រាប់កម្ពុជាថ្មីនៅថ្ងៃទី ២៧ ខែកញ្ញា នេះថា ម្សិលមិញ ទឹកជំនន់បានហក់ឡើងរហូតលិចចូលផ្ទះប្រជាពលរដ្ឋដែលសង់តាមជួរដងទន្លេបាសាក់។

លោក ពៅ ហួត បានបន្តថា អ្វីដែលលោកបារម្ភគឺក្មេងតូចៗ ដែលឪពុកម្ដាយជាប់រវល់ធ្វើការរកស៊ីទុកកូនតូចឲ្យនៅចាំផ្ទះអាចប្រឈមនឹងលង់ទឹក។ ដូច្នេះហើយទើបលោកចៅសង្កាត់ បានណែនាំឲ្យលោកមេភូមិ ត្រូវចុះតាមផ្ទះប្រជាពលរដ្ឋដែលកំពុងរងការលិចលង់។

ដោយឡែក លោក យ៉ិន វុធ ចៅសង្កាត់ច្បារអំពៅទី ២ បានបញ្ជាក់ដែរថា នៅថ្ងៃទី ២៧ ខែកញ្ញា នេះ ទឹកជំនន់បានលិចលង់ផ្ទះប្រជាពលរដ្ឋតាមដងទន្លេបាសាក់ ចាប់ពីគល់ស្ពានព្រះមុនីវង្សចាស់ រហូតដល់ច្រាំង ដែលសរុបប្រមាណជាង ១០០ ខ្នងផ្ទះ អាចមានបន្តទៀត។ ក្នុងនោះសត្វពិស អាចទិចខាំប្រជាពលរដ្ឋ ខណៈទឹកលិចព្រៃត្រែងតាមដងទន្លេ។

គួរបញ្ជាក់ថា ទីតាំងកំពុងរងការលិចលង់នេះក្នុងមូលដ្ឋានខណ្ឌច្បារអំពៅ រាជធានីភ្នំពេញ ក្នុងនោះគឺផ្ទះប្រជាពលរដ្ឋដែលសង់តាមដងទន្លេ។

ទន្ទឹមនឹងនេះ លោក ចេង មុនីរ៉ា ក៏បានដឹកនាំមន្ត្រីជំនាញចុះទៅពិនិត្យតាមស្ថានីយបូមទឹក ដើម្បីរកវិធីដោះស្រាយដាក់ម៉ាស៊ីនបូមទឹកកុំឲ្យលិចលង់ផ្ទះប្រជាពលរដ្ឋតាមសង្កាត់ដែលពុំស្ថិតនៅជួរច្រាំងទន្លេ៕

អត្ថបទ ៖ នរា