ទេសរដ្ឋមន្ត្រី គន់ គីម ចុះពិនិត្យស្ថានភាពផលប៉ះពាល់បង្កឡើងពីទឹកជំនន់តាមបណ្តោយស្ទឹងជីក្រែង

លោកនាយឧត្តមសេនីយ៍ គន់ គីម ទេសរដ្ឋមន្រ្តី ទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានចុះពិនិត្យស្ថានភាពផលប៉ះពាល់បង្កឡើងពីទឹកជំនន់តាមបណ្តោយស្ទឹងជីក្រែង ស្ថិតក្នុងភូមិសាស្ត្រឃុំជីក្រែង ខេត្តសៀមរាប នារសៀលថ្ងៃទី២៧ ខែកញ្ញា ឆ្នាំ២០២៤។ ការចុះពិនិត្យនេះ មានការអមដំណើរដោយ លោក អ៉ឹង គឹមលាង អភិបាលរងខេត្តសៀមរាប និងជាប្រធានលេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្តសៀមរាប តំណាង លោក ប្រាក់ សោភ័ណ អភិបាលខេត្ត។

ក្នុងឱកាសចុះពិនិត្យនេះ លោកទេសរដ្ឋមន្រ្តី បានមានប្រសាសន៍ ណែនាំឱ្យអាជ្ញាធរខេត្តសៀមរាប មានការយកចិត្តទុកដាក់លើសុវត្ថិភាពជនងាយរងគ្រោះ មនុស្សចាស់ ជនពិការភាព កុមារជាដើម។ ព្រមទាំងណែនាំចំពោះការកសាងហេដ្ឋារចនាសម្ព័ន្ធផ្លូវបេតុងក្នុងឃុំ ត្រូវសិក្សាពីកម្ពស់ទឹកជំនន់តាមបណ្តាឆ្នាំ ហើយកសាងឱ្យបានខ្ពស់ដើម្បីផ្តល់ជាប្រយោជន៍ក្នុងការធ្វើដំណើរ ហើយក៏អាចធ្វើជាទីទួលសុវត្ថិភាពនៅពេលមានទឹកជន់ផងដែរ។ 

លោកនាយឧត្តមសេនីយ៍ បានបន្ថែមទៀតថា គណៈកម្មាធិការគ្រប់គ្រងគ្រោះមហន្តរាយស្រុកជីក្រែង និងឃុំពាក់ព័ន្ធសហការ ជាមួយគណៈកម្មាធិការប្រតិបត្តិសាខាកាកបាទក្រហមកម្ពុជា ខេត្ត និងអនុសាខា បានជម្លៀសប្រជាពលរដ្ឋ និងសត្វពាហនៈទៅទីទួលសុវត្ថិភាព និងបានបន្តចុះអន្តរាគមន៍ផ្តល់ជំនួយសង្គ្រោះសម្រាប់ប្រជាពលរដ្ឋដែលមានតម្រូវការស្បៀង ទឹកស្អាត អនាម័យ ជម្រក និងសន្តិសុខជាប្រចាំ ព្រមទាំងមើលថែសុខភាពនៅពេលទឹកស្រកទៅវិញ ឱ្យពួកគាត់សម្អាតលំនូវដ្ឋានដែលរងការជន់លិចនោះឱ្យស្អាតជៀសវាង មានជំងឺកើតឡើង៕

អត្ថបទ៖ គឿនវេត