មន្ត្រីជាន់ខ្ពស់កម្ពុជា បង្ហាញជំហរគាំទ្រច្បាប់ «សិទ្ធិទទួលព័ត៌មាន» និងសង្ឃឹមថានឹងត្រូវបានអនុមត័ក្នុងអាណត្តិនេះ

រដ្ឋមន្ត្រីប្រតិភូអមនាយករដ្ឋមន្ត្រី លោក ព្រាប កុល បានថ្លែងគាំទ្រចំពោះច្បាប់ស្តីពីសិទ្ធិទទួលព័ត៌មាន ដែលរាជរដ្ឋាភិបាលអាណត្តិមុនបានពង្រាងដោយឆ្លងកាត់ការពិភាក្សាយ៉ាងផុសផុល ពីស្ថានប័នជាតិ និងអន្តរជាតិ និងអង្គការសង្គមស៊ីវិល។

លោក ព្រាប​ កុល បានលើកឡើងក្នុងពិធីចូលរួមសិក្ខាលាលាថ្នាក់ជាតិដើម្បីអបអរសាទរ “ទិវាសិទ្ធិទទួលព័ត៌មាន​សកល” ដែលរៀបចំដោយអង្គការសង្គមស៊ីវិល នៅសណ្ឋាគារ សាន់វេ នៅថ្ងៃទី ២៧ ខែកញ្ញា ឆ្នាំ ២០២៤។

លោករដ្ឋមន្ត្រីប្រតិភូអមនាយករដ្ឋមន្ត្រីក៏បានលើកទឹកចិត្តដល់ស្ថាប័នពាក់ព័ន្ធឱ្យបន្តការពិភាក្សា និងបន្តនីតិវិធីទៅមុខ ហើយសង្ឃឹមថាច្បាប់នេះអាចនឹងត្រូវបានអនុមត័ក្នុងអាណត្តិនៃរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងដោយអនុវត្តតាមការប្តេជ្ញាចិត្តរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា។

សូមជម្រាបថា សិទ្ធិទទួលព័ត៌មាន គឺជាខ្សែបន្ទាត់នៃសេរីភាពនៃការបញ្ចេញមតិ និងជាសិទ្ធិមនុស្សជាមូលដ្ឋានដែល​ជះ ឥទ្ធិពលដល់ជីវិតប្រចាំថ្ងៃរបស់ប្រជាពលរដ្ឋ និងសមត្ថភាពរបស់ពួកគាត់ក្នុងការចូលរួមយ៉ាងពេញលេញក្នុង​ជីវិត​​ពលរដ្ឋ។

ប្រជាពលរដ្ឋអាចផ្តល់ព័ត៌មានរិះគន់បែបស្ថាបនា ក្នុងការការពារសិទ្ធិរបស់ពួកគាត់ និងឱ្យ​រដ្ឋាភិបាលមានគណនេយ្យភាព។ យ៉ាង​ណា​ក៏​ដោយ ប្រជាពលរដ្ឋ​កម្ពុជា​បច្ចុប្បន្ន​មិន​សូវមាន​ព័ត៌មាន​ដែល​ពួកគាត់ត្រូវ​ការ​ដើម្បី​បំពេញនូវចន្លោះខ្វះខាតសិទ្ធិ ​និងការ​ទទួល​បាន​សេវា​ដែល​ពួកគាត់មាន​សិទ្ធិ​ទទួល​បាន​នោះ​ទេ៕