អភិបាលខេត្តសៀមរាប ផ្តាំដល់មន្ត្រីរាជការត្រូវបន្តខិតខំបំពេញការងារ បម្រើពលរដ្ឋឱ្យបានល្អប្រសើរ

នៅថ្ងៃទី២៧ ខែកញ្ញា ឆ្នាំ២០២៤ លោក តោ គឹមស៊ាន តំណាងលោក លី សំរិទ្ធ ប្រធានក្រុមប្រឹក្សាខេត្ត និងលោកប្រាក់ សោភ័ណ អភិបាលនៃគណៈអភិបាលខេត្តសៀមរាប បានជួបសំណេះសំណាលជាមួយថ្នាក់ដឹកនាំ មន្ត្រីរាជការ និងមន្រ្ដីជាប់កិច្ចសន្យា ក្នុងទីចាត់ការ អង្គភាពទាំង៦ នៃសាលាខេត្តសៀមរាប និងកម្មករ ក្នុងឱកាសដែលប្រជាពលរដ្ឋកម្ពុជា ប្រារព្ធពិធីបុណ្យភ្ជុំបិណ្ឌ ព្រមទាំងបានផ្តាំដល់មន្ត្រីរាជការខិតខំបម្រើពលរដ្ឋឱ្យបានល្អ។

អភិបាលខេត្ដ បានធ្វើការណែនាំមួយចំនួន និងផ្តាំផ្ញើដល់មន្ត្រីរាជការ សាលាខេត្តទាំងអស់ ត្រូវបន្តបំពេញនូវភារកិច្ចស្នូលរបស់ខ្លួន និងមានការសាមគ្គីភាពផ្ទៃក្នុងឲ្យបានល្អ ព្រមទាំងបម្រើនូវសេវាជូនប្រជាជនឲ្យបានទាន់ពេលវេលា និងធ្វើការគ្រប់គ្រងឲ្យបានល្អ  ចំពោះមន្ត្រីក្រោមឱវាទនៃទីចាត់ការ អង្គភាពទាំង៦ និ មានការទំនាក់ទំនងល្អជាមួយ បណ្តាមន្ទីរ អង្គភាព និង ភ្ញៀវជាតិ អន្តរជាតិ  ក្នុងការសម្រួលដល់ការទំនាក់ទំនង និង ផ្តល់សេវាឲ្យទាន់ពេលជូនប្រជាពលរដ្ឋ។

លោក ប្រាក់ សោភ័ណ  បានមានប្រសាសន៍ថា ក្នុងលក្ខណៈជាគ្រួសារតែមួយ នៃមហាគ្រួសារមន្ត្រីរាជការសាលាខេត្តសៀមរាប ដែលឆ្លងតាមរយៈការបំពេញការងារនឿយហត់ របស់ថ្នាក់ដឹកនាំ មន្ត្រីរាជការ និងកម្មករសាលាខេត្ត  អស់រយៈពេល១ឆ្នាំមកនេះ ធ្វើឲ្យទទួលបាននូវលទ្ធផល ជាផ្លែផ្កាជាទីមោទនក្រៃលែង។ អភិបាលខេត្តបានបន្តថា ក្រោមការដឹកនាំរបស់ប្រមុខរាជរដ្ឋាភិបាល ក្រោមគោលនយោបាយឈ្នះ ឈ្នះ បានធ្វើឲ្យប្រទេសជាតិទាំងមូលទទួលបានសន្តិភាពពេញលេញ និងធ្វើឲ្យសេដ្ឋកិច្ចជាតិ មានការអភិវឌ្ឍរីកចម្រើនលើគ្រប់វិស័យ។

លោកបានលើកឡើងថា នេះជាប្រពៃណី របស់ប្រមុខរាជរដ្ឋាភិបាលកម្ពុជា នៅក្នុងរដូវបុណ្យភ្ជុំបិណ្ឌ បុណ្យចូលឆ្នាំដែលជាទំនៀមទំលាប់ប្រពៃណីជាតិម្តងៗ តែងតែធ្វើការជួបសំណេះសំណាលជាមួយបងប្អូនជាមន្ត្រីចូលនិវត្តន៍ ដែលជារៀមច្បង និង បងប្អូនមន្ត្រីរាជការ កម្មករ  សាលាខេត្តសៀមរាបទាំងអស់  ព្រមទាំងឧបត្ថម្ភនូវគ្រឿងឧបភោគបរិភោគ និង ថវិកា ដើមី្បឲ្យបងប្អូនយកទៅប្រើប្រាស់ទៅតាមសេចក្តីតម្រូវការក្នុងឱកាសបុណ្យភ្ជុំបិណ្ឌ ដើមី្បឲ្យបងប្អូនមន្រ្ដីរាជការធ្វើនូវចង្ហាន់ យកទៅប្រគេនព្រះសង្ឃ  ដើមី្បឧទិ្ទសកុសលផល បុណ្យជូនដល់វិញ្ញាណក្ខន្ត លោកអ្នកមានគុណ ញាតិកាប្រាំពីរសន្ដាន ដែលបានចែកឋានទៅ តាមរយៈព្រះសង្ឃជាស្រែបុណ្យ  ព្រមទាំងសូមឲ្យវិញ្ញាណក្ខន្ធអ្នកទាំងអស់ បានទទួល និងជួយរំដោះឲ្យរួចចាកផុតពីទុក្ខទោសទាំងឡាយ ឧបាយភូមិណាមួយឲ្យបានទៅសោយសុខក្នុងសុគតិភពកុំបីឃ្លាងឃ្លាតឡើយ។ ក្នុងនោះដែរលោក ក៏បានលើកឡើងពីផែនការរៀបចំ តំបន់ទេសចរណ៍វប្បធម៌ក្នុងក្រុង ដើមី្បបង្កើតនូវទីកន្លែងសម្រាប់ភ្ញៀវទេសចរណ៍កម្សាន្ត ។

ក្នុងពិធីនេះដែរ អភិបាលខេត្តសៀមរាប ក៏បានធ្វើការប្រគល់ថវិកាឧបត្ថម្ភ ជានិមិត្តរូបដល់បណ្តាទីចាត់ការ អង្គភាពទាំង៦ និងតំណាងមន្ត្រីជាប់កិច្ចសន្យា ព្រមទាំងកម្មករផងដែរ ៕

ដោយ៖ គឿនវេត