លោក ពេជ្រ ស្រស់ ប្រតិកម្មលើករណីស្ត្រីជាប៉ូលីសចរាចរណ៍បំបៅកូនក្នុងម៉ោងធ្វើការ ត្រូវមេព្រមាន និងធ្វើកិច្ចសន្យា២ដង

 ក្រោយពីស្ត្រីជាប៉ូលីសចរាចរមួយរូបនៅអធិការដ្ឋានគរបាលស្រុកសៀមប៉ាង ខេត្តស្ទឹងត្រែង ត្រូវបានមេហៅទៅព្រមាន និងធ្វើកិច្ចសន្យារហូតពីរដង ដោយគ្រាន់តែបំបៅកូននៅក្នុងម៉ោងធ្វើការនោះ មានអ្នកលេងសង្គម facebook រាប់ម៉ឺននាក់ ក្នុងនោះក៏មានលោកពេជ្រ ស្រស់ ដែលជាប្រធានគណបក្សយុវជនមួយរូបផងដែរ បានចេញប្រតិកម្មលើករណីនេះ និងបានស្នើឲ្យថ្នាក់លើពិនិត្យ ហើយចាត់វិធានការដើម្បីលើកកម្ពស់ស្ត្រី។

លោក ពេជ្រ ស្រស់ ប្រធានគណបក្សយុវជនកម្ពុជា បានសរសេរនៅលើហ្វេសប៊ុករបស់ខ្លួននាព្រឹកនេះថា ដោយសាររូបភាព១សន្លឹកបំបៅកូន លោកស្រីប៉ូលីសត្រូវថ្នាក់លើហៅឲ្យធ្វើកិច្ចសន្យា២ដង ខណៈនេះលោកស្រីប៉ូលីសរៀបរាប់ប្រាប់ខ្ញុំថា រូបគាត់គ្មានកម្លាំងចិត្តធ្វើការងារទៀតនោះទេ។

លោក ពេជ្រ ស្រស់ លើកឡើងទៀតថា លោកនាយជាទីគោរព ! ក្នុងនាមខ្ញុំបានឆ្លងកាត់ភាពជាកូនរបស់ស្រ្តីមួយរូប ខ្ញុំសូមលោកនាយមេត្តាបញ្ឈប់ការបំបាក់ទឹកចិត្ត និងគំរាមលោកស្រីប៉ូលីសម្នាក់នេះទៀតទៅ ព្រោះភាពជាម្តាយត្រូវចិញ្ចឹមកូនគ្រប់កាលៈទេសៈបែបនេះហើយ។

ម្យ៉ាងវិញទៀតនោះ លោកស្រីប៉ូលីសដែលបានបំបៅកូននេះ គឺមិនបានប្រព្រឹត្តឲ្យខុសច្បាប់រដ្ឋទេ គឺគ្រាន់តែឆ្លៀតបំបៅកូនពេលម៉ោងការងារ នៅពេលដែលកូនតូចត្រូវការនូវស្បៀងបន្ទាន់បែបនេះនោះ ពីព្រោះសារជាតិជាក្មេងឃ្លានមិនស្គាល់ពេលវេលាទេណាលោកនាយ។ អ្វីដែលគួរអត់ឱនឲ្យបាន គឺសូមលោកនាយអត់ឱនឲ្យផងទៅ ពីព្រោះក្នុងនាមជាម្តាយគឺថាបែបនេះហើយ ដោយម្តាយតែងតែបំពេញតម្រូវការឲ្យកូនគ្រប់ពេលវេលា។

ដោយឡែកកាលពីម្សិលមិញ ប្រធានគណបក្សរូបនេះបានចេញប្រតិកម្មថា ឱលោកនាយអើយលោកនាយ តើលោកនាយកើតចេញពីនរណាទៅ ? បានជាលោកនាយមិនយល់ពីតម្លៃជាម្តាយសោះអញ្ចឹង។ លោកនាយគួរលើកទឹកចិត្តភាពជាម្តាយ នៃលោកស្រីប៉ូលីសម្នាក់នេះ ព្រោះគាត់ខំបម្រើជាតិផង  បម្រើអង្គភាពផង  និងបំពេញតួនាទីជាមេទៀត (ម្តាយ) ចុះហេតុអ្វីលោកនាយឲ្យគាត់ធ្វើកិច្ចសន្យាបែបនេះទៅវិញ?

លោកនាយមានឃើញសំណេររបស់លោកស្រីទេ គឺលោកស្រីបានបញ្ជាក់ឲ្យមនុស្សគ្រប់រូប ដែលជាកូននោះឲ្យយល់ដឹងពីការលះបង់របស់ម្តាយ ហើយឲ្យកូនៗគ្រប់រូបដឹងគុណផង”។ ជាមួយគ្នានោះលោក ពេជ្រ ស្រស់ ក៏បានប្រកាសផ្ដល់ថវិកាចំនួន៥០ម៉ឺនរៀលផងដែរ៕

អត្ថបទ៖ កោះកែវ