ប្រជាពលរដ្ឋឃុំព្រែកដាច់ សុំអន្តរាគមន៍ពីអភិបាលខេត្តកណ្តាល ជួយស្ថាបនាផ្លូវចាក់បេតុង​មួយ​ខ្សែ

ប្រជាពលរដ្ឋរស់នៅភូមិព្រែកដាច់ ឃុំព្រែកដាច់ ស្រុកលើកដែក ខេត្តកណ្តាល បានស្នើសុំទៅលោក គួច ចំរើន អភិបាលខេត្តកណ្តាលឲ្យជួយអន្តរាគមន៍ស្ថាបនាផ្លូវចាក់ក្រាលបេតុង ដែលអាជ្ញាធរលោកស្ថាបនាបានតែជាងពាក់កណ្តាលរួចផ្អាក​សកម្មភាពអស់រយៈពេលជាង៤ឆ្នាំ ធ្វើឲ្យប្រជាពលរដ្ឋលោកពិបាកធ្វើដំណើរពិសេសនារដូវវស្សា។

យោងតាមសំណើររបស់លោកតា គង់ ចាន់ អាយុ៧៥ឆ្នាំជាគណៈកម្មកាវត្តបុទុមគង្គាហៅ (ព្រែកដាច់) មានទីតាំងស្ថិតក្នុងភូមិព្រែកដាច់ ឃុំព្រែកដាច់ ស្រុកលើកដែក ខេត្តកណ្តាលបានឲ្យដឹងថា លោកតាក៏ដូចជាព្រះសង្ឃ និងបងប្អូនប្រជាពលរដ្ឋរស់នៅក្នុងមូលដ្ឋានខាងលើមានការលំបាកក្នុងការធ្វើដំណើរឆ្ពោះមកធ្វើបុណ្យនៅវត្តបុទុមគង្គាហៅវត្ត(ព្រែកដាច់)​ដោយសារផ្លូវឆ្ពោះមកវត្តធ្វើបានតែជាងពាក់កណ្តាលហើយនៅសល់ប្រមាណកន្លះគីឡូម៉ែត្រទៀតមិនបានស្ថាបនាបន្តដែលបង្កឲ្យផ្លូវក្លាយជាជង្ហុកធំៗ លំបាកធ្វើដំណើរណាស់។

លោកតា គង់ ចាន់ បានបញ្ជាក់ថា កាលពីអំឡុង៤ឆ្នាំកន្លងទៅអាជ្ញាធរបានដាក់គ្រឿងចក្រស្ថាបនាផ្លូវចាក់ក្រាលបេតុងចាប់ពីផ្លូវមុខសាលាស្រុកលើកដែកឆ្ពោះមកវត្តបុទុមគង្គា ហៅវត្តព្រែកដាច់ប៉ុន្តែការស្ថាបនាបានប្រមាណជាង១គីឡូម៉ែត្រក៏បានផ្អាកការស្ថាបនារួចទុកចោលមកដល់ថ្ងៃនេះ។ អ្វីដែលលំបាកនោះគឺខែវស្សាផ្លូវដែលមិនទាន់បានស្ថាបនាក្លាយជា​ភក់ជ្រាំលំបាកធ្វើដំណើរដឹកកសិផលចេញពីចំការមកលក់នៅទីផ្សារ។

លោកតា គង់ ចាន់បញ្ជាក់ថា៖ «ដូច្នេះហើយទើបបងប្អូនប្រជាពលរដ្ឋរស់នៅឃុំព្រែកដាច់ព្រមទាំងព្រះសង្ឃ និងគណកម្មការវត្តសូមគោរពស្នើសុំទៅលោក គួច ចំរើន អភិបាលខេត្តកណ្តាលមេត្តាជួយធ្វើការជួសផ្លូវចាក់បេតុងដែលនៅសល់ប្រមាណកន្លះគីឡូម៉ែត្រនេះផងព្រោះលំបាកធ្វើដំណើរណាស់»៕

អត្ថបទ៖ នរា