យុវជន ៣ នាក់ បាត់បង់ជីវិតដោយសារលង់ទឹក

សពយុវជន៣នាក់ត្រូវបានរកឃើញបន្ទាប់ពីបាត់ខ្លួនដោយទឹកគួចយកទៅបាត់ជិត២៤ម៉ោង កាល​ពីល្ងាចថ្ងៃទី០២ ខែតុលា ឆ្នាំ២០២៤ វេលាម៉ោង១៦ និង១៥នាទី នៅចំណុចស្ពាន​កំពង់លៀស ស្ថិតក្នុងភូមិព្រៃល្វាកើត ឃុំព្រៃល្វា ស្រុកព្រៃកប្បាស ខេត្តតាកែវ។

តាមការបញ្ជាក់ពីសមត្ថកិច្ចស្រុកព្រៃកប្បាស គិតមកត្រឹមថ្ងៃត្រង់ទី០៣ខែតុលានេះ សពយុវជនដែលទឹកគួចបណ្តាល​ឲ្យលង់ស្លាប់ត្រូវ​បានរក​ឃើញ។

សពជនរងគ្រោះទាំង៣នាក់នោះមានឈ្មោះ៖ ១ឈ្មោះ ជិន នូ អាយុ២២ឆ្នាំ រស់នៅភូមិរកា ឃុំស្នោ ស្រុកព្រៃកប្បាស ខេត្តតាកែវ។ ទី២ ឈ្មោះ ម៉េង ហ៊ាង អាយុ២០ឆ្នាំ រស់នៅភូមិលេខ៦ សង្កាត់បឹងកេងកង៣ ខណ្ឌចំការមន រាជធានីភ្នំពេញ។ ទី៣ឈ្មោះ ហេង មុន្នីហ៊ាង អាយុ២០ឆ្នាំ រស់នៅភូមិកោះតូច ឃុំពាមជីគង ស្រុកកងមាស ខេត្តកំពង់ចាម។

ប្រភពពីសមត្ថកិច្ចបានបញ្ជាក់ថា មុនពេលកើតហេតុពួកគាត់បាននាំគ្នាចុះទៅលេងទឹក នៅចំណុចស្ពានកំពង់លៀសស្ថិតក្នុងភូមិកើតហេតុខាងលើ ហើយត្រូវបានទឹកហូរគួចយកទៅបាត់ទាំង៣នាក់។

លុះព្រឹកឡើង ថ្ងៃទី០៣ខែឆ្នាំដដែល វេលាម៉ោង០៦ព្រឹក សមត្ថកិច្ចស្រុកព្រៃកប្បាស ដែលដឹកនាំកម្លាំដោយលោកវរសេនីយ៍ឯក ឡេង ប៊ុនឡុង អធិការនគរបាលស្រុក បានដឹកនាំកម្លាំងអធិការដ្ឋាននគរបាលចុះស្វែងរកជនរងគ្រោះ ទាំង ៣នាក់ដែលបានបាត់ខ្លួន រហូតដល់ម៉ោង១០ និង៤៦នាទី ទើបរកឃើញសពជនរងគ្រោះទាំង៣នាក់ បន្ទាប់មកកម្លាំងជំនាញ នៃអធិការដ្ឋាននគរបាល ស្រុកព្រៃកប្បាស សហការជាមួយកម្លាំងប៉ុស្តិ៍នគរបាលរដ្ឋបាលព្រៃល្វា លោកមេភូមិ លោកមេឃុំ និងលោកគ្រូពេទ្យឃុំ បង្កើតជាគណៈកម្មការធ្វើការពិនិត្យនិងសន្និដ្ឋានថាជនរងគ្រោះពិតជា បានស្លាប់ដោយសារលង់ទឹកប្រាកដមែន។ បច្ចុប្បន្នសពជនរងគ្រោះទាំង៣នាក់ ត្រូវបានប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី៕

អត្ថបទ៖ វីរៈ