ព័ត៌មានជាតិ

៣ ថ្ងៃ នៃពិធីបុណ្យភ្ជុំបិណ្ឌ ខេត្តកោះកុងមានអ្នកទេសចរ ១ ម៉ឺន ៦ ពាន់នាក់ ទៅលេងកម្សាន្ត

បានផុស

២៤ នាទី មុន

នៅ

ថ្ងៃសុក្រ ៤ តុលា ២០២៤

ដោយ

ខេត្តកោះកុងបានទទួលភ្ញៀវទេសចរសរុប ១ ម៉ឺន ៦ ពាន់នាក់ ដែលមានចំណាប់អារម្មណ៍មកលេងកម្សាន្តនៅអំឡុងពេល ៣ ថ្ងៃ នៃពិធីបុណ្យភ្ជុំបិណ្ឌឆ្នាំនេះ បើធៀបនឹងឆ្នាំទៅកើនបាន ៨ ពាន់នាក់ ប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាគុណ ភក្តី ជាប្រធានការិយាល័យផ្សព្វផ្សាយព័ត៌មានទេសចរណ៍ នៃមន្ទីរទេសចរណ៍ខេត្តកោះកុង បានឱ្យដឹងនៅថ្ងៃទី ៤ តុលា នេះថា ទេសចរជាតិ ១៦,៣៣៦ នាក់ និងទេសចរបរទេស ៣៩៦ នាក់ បាននាំគ្នាមកលេងកម្សាន្តលំហែកាយនៅតាមរមណីយដ្ឋាននានាក្នុងភូមិសាស្ត្រខេត្ត ដោយកើន ៨,២៣៤ នាក់ ស្មើនឹង ៩៦% ធៀបនឹងរយៈពេលដូចគ្នាឆ្នាំ ២០២៣។

បើតាម លោក សាគុណ ភក្តី មូលហេតុដែលធ្វើឱ្យចំនួនទេសចរកើនតិចតួចយ៉ាងដូច្នេះ ក៏ព្រោះតែស្ថានភាពផ្លូវពីចំណុចផ្លូវបំបែកស្រែអំបិលមកកាន់តំបន់ឆ្នេរសមុទ្រជ្រោយស្វាយ និងកោះស្តេច មានភាពងាយស្រួល និងចំណាយរយៈពេលតិច។ រីឯអាកាសធាតុមានអំណោយផលល្អផងដែរ។

អំឡុងពេល ៣ ថ្ងៃ នៃពិធីបុណ្យភ្ជុំបិណ្ឌ អាជីវករ និងប្រតិបត្តិករទេសចរណ៍នៅតាមរមណីយដ្ឋាន ភោជនីយដ្ឋាន មិនបានឡើងថ្លៃនោះទេ ដោយរក្សាតម្លៃដើមនៅដដែល និងមានការទទួលយកបានពីសំណាក់ភ្ញៀវទេសចរគ្រប់មជ្ឈដ្ឋាន។

កន្លងទៅថ្មីៗ នេះ លោក មឿន សារ៉េន អ្នកគ្រប់គ្រងភោជនីយដ្ឋានឆ្មាបាត់ និងលោក ឡាយ តាំ តំណាងរមណីយដ្ឋានឆ្នេរសុភមង្គល ថ្លែងថា ពួកគាត់មិនដំឡើងថ្លៃសេវាកម្មរបស់ខ្លួនឡើយ ដោយរក្សាតម្លៃដដែល ព្រមទាំងមានការបញ្ចុះតម្លៃទៀតដល់អ្នកទេសចរដែលបានមកលេងកម្សាន្តនៅរមណីយដ្ឋាន។

៨ ខែ ឆ្នាំ ២០២៤ ខេត្តកោះកុង បានទទួលស្វាគមន៍ភ្ញៀវទេសចរជាតិ និងអន្តរជាតិ ៤៧ ម៉ឺននាក់ បើប្រៀបធៀបរយៈពេលដូចគ្នាឆ្នាំ ២០២៣ កើនឡើង ១៦ ម៉ឺននាក់។ ខេត្តកោះកុងមានតំបន់ទេសចរធម្មជាតិ និងកែច្នៃជាច្រើនដែលកំពុងមានសក្ដានុពលដ៏ទាក់ទាញ ខណៈផ្លូវជាតិលេខ ៤៨ ស្ថាបនារួចរាល់ហើយ គេរំពឹងថា កំណើនអ្នកទេសចរ នឹងកើនកាន់តែច្រើនបន្ថែមទៀត៕

អត្ថបទ ៖ សិរីវឌ្ឍនៈ