ខេត្តកំពតទទួលបានភ្ញៀវទេសចរជាង១២ម៉ឺននាក់ក្នុងឱកាសបុណ្យភ្ជុំបិណ្ឌ

នៅថ្ងៃទី៤ ខែតុលា ឆ្នាំ២០២៤នេះ លោក សយ សុីណុល ប្រធានមន្ទីរទេសចរណ៍ខេត្តកំពតបានឲ្យដឹងថា រយ:ពេល៣ ថ្ងៃនៃពិធីបុណ្យភ្ជុំបិណ្ឌប្រពៃណីជាតិ ខេត្តកំពតទទួលបានភ្ញៀវទេសចរជាតិ និងអន្តរជាតិបានចូលមកលេងលម្ហែរកម្សាន្ត និងស្នាក់នៅខេត្តជាង១២ម៉ឺននាក់។

លោក សយ ស៊ីណុល ប្រធានមន្ទីរទេសចរណ៍ខេត្តកំពតបានប្រាប់ឱ្យដឹងទៀតថា ក្នុងរយ:ពេល៣ថ្ងៃក្នុងឱកាសនៃពិធីបុណ្យភ្ជុំបិណ្ឌ ភ្ញៀវទេសចរចូលមកលម្ហែរលេងកម្សាន្តក្នុងខេត្តកំពតមានចំនួន ១២៤.០៦៩នាក់ ក្នុងនោះមានភ្ញៀវទេសចរជាតិ ១២៣.៤៩១នាក់ និងភ្ញៀវទេសចរបរទេសមានចំនួន៥៧៨នាក់។

លោកវរេសនីយ៍ឯក ពុធ ស៊ឺង នាយការិយាល័យនគរបាលចរាចរណ៍ផ្លូវគោកនៃស្នងការដ្ឋានខេត្តកំពតបានបញ្ជាក់ថា រយ:ពេល៣ថ្ងៃនៃពិធីបុណ្យភ្ជុំបិណ្ឌ គិតពីថ្ងៃទី១ដល់ថ្ងៃទី៣ ខែតុលា ឆ្នាំ២០២៤ នៅទូទាំងខេត្តកំពតពុំមានករណីគ្រោះថ្នាក់ចរាចរណ៍អ្វីមួយកើតឡើងនោះទេ។

ដោយឡែកខេត្តកែបឯនោះវិញ បើតាមលោក ប៉ុក ទាំង ប្រធានស្តីទីមន្ទីរទេសចរណ៍ខេត្តកែប បានប្រាប់ឱ្យដឹងថា រយ:ពេល៣ថ្ងៃនៃពិធីបុណ្យភ្ជុំបិណ្ឌប្រពៃណីជាតិ ដោយគិតពីថ្ងៃទី១ រហូតដល់ថ្ងៃទី៣ ខែតុលា ឆ្នាំ២០២៤ ភ្ញៀវដែលបានមកលេងលម្ហែរកម្សាន្ត និងស្នាក់នៅក្នុងខេត្តកែបមានចំនួន ៧៩.៥៣៨នាក់។ បរិមាណនេះបានកើនឡើង​២៦,១១ភាគរយ បើប្រៀបធៀបនឹងឆ្នាំមុនដែលមានចំនួន៦២,១៩០នាក់។

លោក ប៉ុក ទាំង ប្រធានស្តីទីមន្ទីរទេសចរណ៍ខេត្តកែបបានបញ្ជាក់ថា ក្នុងចំណោមនោះ ភ្ញៀវទេសចរជាតិមាន ៧៩.១៤៣នាក់ និងភ្ញៀវទេសចរបរទេសមានចំនួន៣៩៥នាក់។ ចំណែកស្ថានភាពទូទៅមានលក្ខណ:ល្អប្រសើរដោយមន្ទីរជំនាញមិនបានទទួលបណ្តឹងពីភ្ញៀវពាក់ព័ន្ធនឹងភាពមិនប្រក្រតីកន្លែងណាមួយទាក់ទិនដំណើរកម្សាន្តរបស់ភ្ញៀវទេសចរជាតិ និងភ្ញៀវទេសចរអន្តរជាតិដែលមកលេងកម្សាន្តក្នុងខេត្តកែបដោយប្រការអ្វីណាមួយនោះឡើយ៕

អត្ថបទ៖ សឹង រ៉ាត់