រដ្ឋបាលខេត្តកំពត ប្រមូលបញ្ជីរាយនាមមុខម្ហូបសេវាកម្មទេសចរណ៍ដើម្បីរក្សាតម្លៃសមរម្យ

រដ្ឋបាល​ខេត្តកំពត ​បាន​ប្រកាស​ជា​ផ្លូវការ​នូវ​ការ​ប្រមូល​បញ្ជី​រាយនាម​គ្រប់​សេវាកម្ម​ម្ហូបអាហារ​និង​ទេសចរណ៍​ដែល​មាន​នៅ​ទូទាំង​ខេត្ត។ ទិន្នន័យនេះនឹងត្រូវតម្កល់ទុកនៅមន្ទីរទេសចរណ៍ខេត្ត និងរដ្ឋបាលខេត្តក្នុងគោលបំណងត្រួតពិនិត្យ ជាពិសេសដើម្បីដោះស្រាយភាពមិនប្រក្រតីនៃតម្លៃស្នាក់នៅ និងម្ហូបអាហារឡើងថ្លៃក្នុងពិធីបុណ្យនានា។ នេះបើតាមសេចក្តីជូនដំណឹងរបស់រដ្ឋបាលខេត្តកំពតនៅថ្ងៃទី ០៤ ខែតុលា ឆ្នាំ ២០២៤។

គំនិតផ្តួចផ្តើមនេះ មានគោលបំណងទប់ស្កាត់ប្រតិកម្មជាសាធារណៈទៅនឹងតម្លៃម្ហូបអាហារឡើងថ្លៃ ដែលធ្វើឱ្យប៉ះពាល់ដល់ភ្ញៀវទេសចរជាតិ និងអន្តរជាតិមកលេងកម្សាន្តក្នុងខេត្តនេះ។

ជាមួយគ្នានេះ រដ្ឋបាលខេត្តកំពត លើកទឹកចិត្តដល់ភ្ញៀវទេសចរដែលអញ្ជើញមកកម្សាន្តនៅខេត្តរបស់ខ្លួនរាយការណ៍ចូលមកកាន់ផេក​ ក្នុងករណីម្ហូបអាហារ និងកន្លែងស្នាក់នៅឡើងថ្លៃមិនសមហេតុផល។
រដ្ឋបាលខេត្តបញ្ជាក់ថា៖«ភ្ញៀវទេសចរដែលអញ្ជើញមកកម្សាន្តនៅខេត្តកំពត ប្រសិនបើមានកន្លែងស្នាក់នៅ កន្លែងលក់ម្ហូបអាហារក្នុងខេត្តកំពតមានការតម្លើងថ្លៃ ដែលបងប្អូនយល់ថាមិនសមស្រប សូមថតឈ្មោះទីតាំង និងតម្លៃនោះ ចូលមកផេកយើងខ្ញុំបាន រដ្ឋបាលខេត្តនឹងធ្វើការត្រួតពិនិត្យជូនភ្លាមៗ»។

បន្ថែមពីលើនេះ រដ្ឋបាលខេត្តកំពត សូមអំពាវនាវដល់អាជីវករលក់ម្ហូបអាហារ និងអ្នកផ្តល់កន្លែងស្នាក់នៅទាំងអស់រក្សាតម្លៃដើមរបស់ខ្លួន ដើម្បីជាប្រយោជន៍ដល់មនុស្សគ្រប់គ្នា និងលើកកម្ពស់ឧស្សាហកម្មវិស័យទេសចរណ៍កម្ពុជា។

គួររំឭកថា ក្នុងឱកាសបុណ្យភ្ជុំបិណ្ឌ ដែលជាពេលវេលាដ៏ពេញនិយមសម្រាប់ប្រជាជនកម្ពុជា ធ្វើដំណើរកម្សាន្ត និងទៅលេងកន្លែងទេសចរណ៍នានា គេសង្កេតឃើញតម្លៃម្ហូបមានការឡើងថ្លៃគួរឱ្យកត់សម្គាល់។ តួយ៉ាង ក្នុងឱកាសបុណ្យភ្ជុំបិណ្ឌនេះ ភ្ញៀវដែលទៅលេងខេត្តកែប បានសម្តែងការមិនពេញចិត្តចំពោះបាយឆាមួយចានតម្លៃ ៦០,០០០រៀល ដោយចាត់ទុកថាតម្លៃនេះលើសពីតម្លៃធម្មតា៕