សហជីព និង​កម្មករ​និយោជិត​នៅ​កម្ពុជា រំភើប​យ៉ាង​ខ្លាំង ក្រោយពី​កម្ពុជា​បំបែក​ឯតទគ្គកម្ម «​ការតាំង​បង្ហាញ​រថយន្ត​ទំនើប​ច្រើនជាងគេ​បំផុត​លើ​ពិភពលោក​»

ភ្នំពេញ ៖ តំណាង​សហជីព​ធំៗ និង​តំណាង​កម្មករ​និយោជិត​នៅ​កម្ពុជា បាន​អបអរសាទរ និង​រំភើប​រីករាយ​យ៉ាងខ្លាំង​ដែល​កម្ពុជា​បាន​បំបែក​ឯតទគ្គកម្ម «​ការ​តាំង​បង្ហាញ​រថយន្ត​ទំនើប​ច្រើនជាងគេ​បំផុត​លើ​ពិភពលោក (THE LARGEST DISPLAY OF SUPER CARS / HYPER CARS)» តាមរយៈ​ព្រឹត្តិការណ៍ Gumball 3000 Rally in Cambodia កាលពី​ថ្ងៃទី​១៧ ខែកញ្ញា ឆ្នាំ​២០២៤​។

លោក សំ សឿន ប្រធាន​សហភាព​ពលកម្ម​ជាតិ​កម្ពុជា បាន​ចូលរួម​អបអរសាទរ និង​សប្បាយរីករាយ​យ៉ាង​ខ្លាំង​ចំពោះ​កម្ពុជា​បំបែក​ឯតទគ្គកម្ម «​ការតាំង​បង្ហាញ​រថយន្ត​ទំនើប​ច្រើនជាងគេ​បំផុត​លើ​ពិភពលោក តាមរយៈ​ព្រឹត្តិការណ៍ Gumball 3000 Rally in Cambodia ដែលមាន​រថយន្ត​ចំនួន ១៧៩​គ្រឿង​។

លោក​បន្ត​ថា វា​ជា​ជោគជ័យ​ថ្មី​របស់​រាជរដ្ឋាភិបាល ក៏ដូចជា​ប្រជាជន​កម្ពុជា​ទាំងមូល ដែល​បាន​បំបែក​ឯតទគ្គកម្ម​ថ្មី​បន្ថែមទៀ​ត ហើយ​វា​គឺជា​កិត្តិនាម​ដ៏​អស្ចារ្យ​ថែមទៀត​សម្រាប់​មុខមាត់​ប្រទេស​កម្ពុជា​។

មេ​សហជីព​រូបនេះ​បន្ថែម​ថា «​ក្នុងនាម​តំណាង​សហជីព ខ្ញុំ​សូម​ចូលរួម​អបអរសាទរ​ចំពោះ​ព្រឹត្តិការណ៍ Gumball 3000 ដែល​បាន​ផ្តល់​ផលចំណេញ​យ៉ាងច្រើន​មហិមា​ដល់​កម្ពុជា ទាំង​វិស័យ​ទេសចរណ៍ ទាំង​ចរន្ត​សេដ្ឋកិច្ច​ជាតិ ទាំង​កិច្ចការ​សប្បុរស ជាពិសេស​បង្ហាញ​ទៅ​ពិភពលោក​ឲ្យ​ឃើញច្បាស់​ពី​សន្តិភាព សេរីភាព វប្បធម៌ បេតិកភណ្ឌ និង​ទឹកដី​អច្ឆរិយ​នៃ​កម្ពុជា​យើង​»​។

លោក ហង្ស រ៉ាវី ប្រធាន​សហភាព​សហជីព​រក្សា​សិទ្ធិ​កម្មករ​កម្ពុជា (CWPUC) បាន​ចូលរួម​អបអរសាទរ​ចំពោះ​ការ​បំបែក​កំណត់ត្រា​ពិភពលោក (Guinness World Records) របស់​កម្ពុជា​តាមរយៈ​ការតាំង​បង្ហាញ​រថយន្ត​ទំនើប​ដ៏​ធំ​បំផុត​ដែល​ត្រូវបាន​រៀបចំ​ដោយ​ក្រសួងទេសចរណ៍​នៃ​ព្រះរាជាណាចក្រ​កម្ពុជា នៅ​ខេត្តសៀមរាប​តាមរយៈ​ព្រឹត្តិការណ៍ Gumball 3000 Rally​។​

​លោក​បន្តថា លើស​ពី​សម្រស់ និង​ភាព​សម្បូរ​បែប​នៃ​រថយន្ត​ទំនើបៗ​ជាច្រើន​គ្រឿង​នៃ​ព្រឹត្តិការណ៍ Gumball 3000 គឺ​ព្រឹត្តិការណ៍​នេះ​បានផ្ដល់​ផលប្រយោជន៍​ដល់​កម្ពុជា​យ៉ាងច្រើន​លើសលប់​រួមមាន កិត្តិយស​កម្ពុជា​លើ​ឆាក​អន្តរជាតិ ពិភពលោក​កាន់តែ​ស្គាល់​កម្ពុជា ចំណូល​សម្រាប់​វិស័យសេដ្ឋកិច្ច (​ស្នាក់នៅ ហូបចុក ធ្វើដំណើរ ទិញ​វត្ថុ​អនុស្សាវរីយ៍​) និង​ឱកាស​នៃ​ការវិនិយោគ​បន្ថែមទៀត​។

លោក រ៉ាវី បាន​បញ្ជាក់​ថា «​កម្ពុជា​អាច​ចាប់​យក​ឱកាស​រៀបចំ​ព្រឹត្តិការណ៍​នេះ​បាន ក៏ដោយ​សារ​កម្ពុជា​មាន​សុខសន្តិភាព សន្តិសុខ សណ្ដាប់ធ្នាប់​ល្អ ហេដ្ឋារចនាសម្ព័ន្ធ​គាំទ្រ និង​អ្នក​ជ្រោមជ្រែង​ខ្នះខ្នែង​យក​ព្រឹត្តិការណ៍​នេះ​មក​កម្ពុជា​»​។

ទន្ទឹម​នឹង​នេះ អ្នកស្រី ហង្ស កថា កម្មការិនី​រោងចក្រ ស៊ូ​វៃ ហ្គា​មិន បាន​និយាយថា អ្នកស្រី​ចូលរួម​អបអរសាទរ និង​ពេញចិត្ត​យ៉ាងខ្លាំង​ចំពោះ​គណៈកម្មការ​រៀបចំ​កម្ម​វិធី រាជរដ្ឋាភិបាល និង​អ្នកចូលរួម​ទាំងអស់​ដែល​បាន​ចូលរួម​ដោយ​ស្ម័គ្រចិត្ត និង​បាន​បរិច្ចាគ​ធនធាន​ផ្ទាល់ខ្លួន ដើម្បី​រួមចំណែក​ទ្រទ្រង់​សកម្មភាព​របស់​មន្ទីរ​ពេទ្យ​កុមារ​អង្គរ​ខេត្តសៀមរាប​តាមរយៈ​កម្មវិធី Gumball 3000​។

កម្មការិនី​រូបនេះ​ថា «​តាមរយៈ​ព្រឹត្តិការណ៍​នេះ​ផងដែរ ខ្ញុំ​ក៏​សូម​ថ្លែងអំណរគុណ​ចំពោះ​ក្រុមគ្រូពេទ្យ​នៃ​មន្ទីរពេទ្យ​កុមារ​អង្គរ​ខេត្តសៀមរាប​ដែល​បាន​ខិតខំ​ព្យាបាល និង​ថែទាំ​សុខភាព ព្រមទាំង​បាន​ជួយសង្គ្រោះ​អាយុជីវិត​ដល់​កុមារ​កម្ពុជា នាពេល​កន្លងមករ​ហូ​ត​មកដល់​បច្ចុប្បន្ន​»​។

សូម​បញ្ជាក់​ថា ក្នុង​ព្រឹត្តិការណ៍​ប្រារព្ធ​ខួប​រយៈពេល ២៥​ឆ្នាំ នៃ​ការបង្កើតឡើង​ព្រឹត្តិការណ៍ Gumball 3000 ក្រោម​កិច្ចសម្របសម្រួល​របស់​ក្រុមហ៊ុន​ជីបម៉ុង ដោយមាន​កិច្ចសហការ​ពី​ក្រសួងទេសចរណ៍​ផង​នោះ គណៈកម្មការ​រៀបចំ​ព្រឹត្តិការណ៍​នេះ បានសម្រេច​ធ្វើដំណើរ​ឆ្លងកាត់​ប្រទេស​កម្ពុជា កាលពី​ថ្ងៃទី​១៥ ដល់​១៧ ខែកញ្ញា​។ ស្រប​ជាមួយគ្នា​នោះ ក៏​មាន​ការរៀបចំ​ព្រឹត្តិការណ៍​បង្ហាញ​រថយន្ត​នៅមុខ​ប្រាសាទ​អង្គរ ដើម្បី​បំបែក​កំណត់ត្រា​ពិភពលោក​តែម្តង​៕