រដ្ឋមន្ត្រីរ៉ែ និងថាមពល៖ទប់មិនឱ្យភ្លើងឡើងថ្លៃ ហើយបញ្ចុះតម្លៃជូនពលរដ្ឋ ជាគោលនយោបាយរបស់សម្ដេចធិបតី​

រដ្ឋមន្ត្រីក្រសួងរ៉ែ និងថាមពល លោក កែវ​ រតនៈ បានអះអាងថា ការទប់តម្លៃអគ្គីសនីមិនឱ្យឡើងថ្លៃ ហើយបញ្ចុះតម្លៃអគ្គីសនី ជាគោលនយោបាយរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដើម្បីកាត់បន្ថយការចំណាយរបស់ពលរដ្ឋ និងជួយសម្រួលវិស័យផ្សេងៗទៀត។  លោករដ្ឋមន្ត្រីក្រសួងរ៉ែ និងថាមពល អះអាងដូច្នេះ ក្នុងពេលធ្វើបាឋកថាស្ដីពី «គោលនយោបាយថាមពលកម្ពុជា» នៅសាកលវិទ្យាល័យភូមិន្ទភ្នំពេញ នារសៀលថ្ងៃទី០៤ ខែតុលា ឆ្នាំ២០២៤។

លោក កែវ រតនៈ សង្កត់ធ្ងន់ដូច្នេះ៖«ការខិតខំ មិនធ្វើឱ្យថ្លៃអគ្គីសនីឡើងនេះ គឺជាគោលនយោបាយសំខាន់របស់សម្ដេចបវរធិបតី ហ៊ុ​ន ម៉ាណែត ជាការកាត់បន្ថយចំណាយរបស់ប្រជាពលរដ្ឋផង ហើយនឹងជួយសម្រួលផ្នែកឧស្សាហកម្ម ពាណិជ្ជកម្ម កសិកម្មផងដែរ»។

តាមលោករដ្ឋមន្ត្រីរ៉ែ និងថាមពល ការទប់ស្កាត់មិនឱ្យតម្លៃអគ្គីសនីឡើងថ្លៃនេះ ធ្វើឡើងបានក្រោមរូបភាពចំនួន២គឺ ទី១​ មិនដំឡើងថ្លៃអគ្គីសនី ពោលគឺចាប់ពីសម្ដេច ហ៊ុន ម៉ាណែត ​បានឡើងកាន់តំណែងជានាយករដ្ឋមន្ត្រីកម្ពុជា តម្លៃអគ្គីសនីនៅកម្ពុជា គ្មានការឡើងថ្លៃឡើយ។

ជុំវិញករណីតម្លៃអគ្គីសនីនេះ  លោក កែវ រតនៈ លើកឡើងថា​ ក្រោយពីវិបត្តិកូវីដ១៩ រាតត្បាតជាសកល និងបញ្ហាសង្គ្រាមរុស្សី-អ៊ុយក្រែន តម្លៃថាមពលនៅទូទាំងពិភពលោកបានកើនឡើង មិនថាតែសហរដ្ឋអាមេរិក ថៃ វៀតណាម និងសិង្ហបុរី បានឡើងថ្លៃជាបន្តបន្ទាប់ នៅក្នុងកម្រិតតម្លៃតិច និងច្រើន ហើយគ្មានប្រទេសណាមួយចុះថ្លៃថាមពលឡើយ។ ស្របពេលដែលប្រទេសនានា បានដំឡើងថ្លៃថាមពល ក្រោយរងនូវវិបត្តិកូវីដ១៩ និងសង្គ្រាមរុស្សី-អ៊ុយក្រែន កម្ពុជា បានព្យាយាមទប់មិនឱ្យតម្លៃអគ្គីសនីកើនឡើង ដោយបានបញ្ចេញថវិការប​ស់រដ្ឋាភិបាល តាមរយៈអគ្គីសនីកម្ពុជា។

លោករដ្ឋមន្ត្រី ក៏បានបង្ហើយឱ្យដឹងថា កាលពីថ្ងៃទី២៤ ខែកញ្ញា កន្លងទៅ សម្ដេចធិបតី ហ៊ុន ម៉ាណែត បានសម្រេចផ្ដល់ការអនុគ្រោះបន្ថែមទៀតដល់រោងម៉ាស៊ីនកិនស្រូវ អ្នកសម្ងួតស្រូវ ដើម្បីកាត់បន្ថយការចំណាយក្នុងការកិនស្រូវ និងសម្ងួតស្រូវ ក្នុងន័យជួយកសិករ និងរុយផលិតកម្មស្រូវឱ្យកាន់តែទូលាយ ដើម្បីនាំចេញអង្ករខ្មែរទៅកាន់ពិភពលោក៕