អភិបាលខេត្តកែប ប្រកាសទទួលយកការរិះគន់ក្នុងន័យស្ថាបនា ដើម្បីកែលម្អ និងដោះស្រាយបញ្ហាតម្លៃម្ហូបអាហារ

នៅក្នុង​រយៈ​ពេល​ ០៣ថ្ងៃ​ នៃ​ពិធីបុណ្យ​ភ្ជុំបិណ្ឌ​ ប្រពៃណីជាតិ​ខ្មែរ​ មាន​ភ្ញៀវទេសចរជាតិ-អន្តរជាតិចំនួន​ ៧៩,៥៣៨​ នាក់​ បានទៅលេងកម្សាន្តនៅខេត្តកែប គឺបានកើនឡើង​ ២៦,១១% ​(១៦,៤៧២​ នាក់)​ បើប្រៀបធៀបនឹង​ឆ្នាំ​២០២៣​។ ជាមួយនឹងចំនួនភ្ញៀវទេសចរនេះ លោក សោម ពិសិដ្ឋ អភិបាលខេត្តកែប ក៏បានប្រកាសទទួលយកការរិះគន់ក្នុងន័យស្ថាបនាទាំងអស់ ដើម្បីយកទៅកែលម្អ និងដោះស្រាយបញ្ហាខ្វះខាត ជាពិសេស ពាក់ព័ន្ធនឹងបញ្ហាតម្លៃម្ហូបអាហារ។

តាមរយៈទំព័រហ្វេសប៊ុកកាលពីយប់ថ្ងៃទី០៤ ខែតុលា ឆ្នាំ២០២៤ លោកអភិបាលខេត្ត បានសរសេរថា៖«រដ្ឋបាលខេត្ត សូមទទួលយកនូវរាល់មតិរិះគន់ក្នុងន័យស្ថាបនារបស់បងប្អូនប្រជាពលរដ្ឋ និងភ្ញៀវទេសចរទាំងអស់ ដើម្បីជាមូលដ្ឋានក្នុងការកែលម្អ និងដោះស្រាយនូវរាល់ចំណុចខ្វះខាតដែលជាបញ្ហាកង្វល់របស់បងប្អូន ហើយក៏ជាចំណុចដែលរដ្ឋបាលខេត្តបានយកចិត្តទុកដាក់ជាប្រចាំ ឲ្យកាន់តែល្អប្រសើរ សំដៅធ្វើយ៉ាងណាឲ្យខេត្តកែបកាន់តែមានភាពទាក់ទាញ និងខិតខំបង្កើនការអភិវឌ្ឍបន្ថែមនូវតំបន់សក្ដានុពលទេសចរណ៍នានា សម្រាប់ទទួលស្វាគមន៍ដំណើរកម្សាន្តរបស់បងប្អូនប្រជាពលរដ្ឋជាបន្តទៀត»។

ការប្រកាសរបស់លោក សោម ពិសិដ្ឋ អភិបាលខេត្តកែបនេះ ធ្វើឡើងបន្ទាប់ពីមានប្រជាពលរដ្ឋជាច្រើន បានរិះគន់យ៉ាងខ្លាំងពីបញ្ហាសេវាកម្មនានា ជាពិសេស បញ្ហាតម្លៃម្ហូបអាហារនៅក្នុងខេត្តកែប។ ពួកគេ បានមិនពេញចិត្តសោះឡើយចំពោះអាជីវករមួយចំនួននៅទីនោះ ដែលបានលក់ក្នុងតម្លៃថ្លៃ និងមិនស្មោះត្រង់ដល់ពួកគេដែលនាំក្រុមគ្រួសារ និងនាំមិត្តភក្តិបងប្អូនទៅលេងកម្សាន្តនៅខេត្តកែប។ ប៉ុន្តែ អភិបាលខេត្តកែប បានអះអាងថា រដ្ឋបាលខេត្ត បានរៀបចំបានយ៉ាងល្អហើយ ប៉ុន្តែ ក៏នៅមានការរិះគន់កើតមានឡើងដដែល។

លោក សោម ពិសិដ្ឋ បានគូសបញ្ជាក់ថា៖ «ទោះបី​ជា​ការខិតខំប្រឹង​ប្រែង​ឲ្យ​ល្អឥតខ្ចោះ​យ៉ាងណាក៏ដោយ​ យេីងក៏អាចនៅមាន​ចន្លោះ​ប្រហោង​ និងភាព​ខ្វះខាត​ខ្លះៗផងដែរ​ ដូចជារយៈ​ពេល​កន្លងមក​នេះ​មាន​ការិះគន់​ផ្សេងៗ​ និង​បញ្ហា​មួយចំនួនតូចពាក់ព័ន្ធ​ទៅនឹង​តម្លៃ​ម្ហូបអាហារ​ នៅខេត្ត​កែប​»។ អាស្រ័យដូច្នេះហើយ រដ្ឋបាល​ខេត្តកែប បានជម្រាបជូននថា​ ក្នុងករណីដែលប្រជាពលរដ្ឋជួបប្រទះនូវភាពមិនប្រក្រតីណាមួយលើការផ្ដល់សេវាកម្មនានា ពិសេសពាក់ព័ន្ធនឹងតម្លៃម្ហូបអាហារ សូមទំនាក់ទំនងទៅកាន់លេខទូរសព្ទដូចខាងក្រោម ៖

– 012 821 411

– 088 432 0034

– 099 549 789 ៕