ព័ត៌មានជាតិ

អភិបាលខណ្ឌសែនសុខ ដឹកនាំក្រុមការងារ បូមទឹកចាក់ដីឈូសឆាយទឹកដក់ នៅមណ្ឌលប្រឡងវិទ្យាល័យ សម្តេច ហ៊ុន សែន ភ្នំពេញថ្មី

បានផុស

៤ ថ្ងៃ មុន

នៅ

ថ្ងៃចន្ទ ៧ តុលា ២០២៤

ដោយ

រយៈពេល ២-៣ ថ្ងៃ កន្លងទៅនេះ មានភ្លៀងធ្លាក់យ៉ាងខ្លាំង បង្កការជន់លិចតាមតំបន់មួយចំនួនក្នុងមូលដ្ឋានខណ្ឌសែនសុខ ជាពិសេសនៅមណ្ឌលវិទ្យាល័យ សម្តេច ហ៊ុន សែន ភ្នំពេញថ្មី ដូច្នេះ ដោយមានការយកចិត្តទុកដាក់ពី លោក ម៉ូវ ម៉ានិត អភិបាលខណ្ឌសែនសុខ បានដឹកនាំក្រុមការងារចុះបូមទឹកចាក់ដីបំពេញកន្លែងទឹកដក់តាមមុខបន្ទប់ប្រឡង ផ្លូវថ្មើរជើង ដើម្បីងាយស្រួលដល់បេក្ខជនមកប្រឡងសញ្ញាប័ត្រមធ្យមសិក្សាទុតិយភូមិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ូវ ម៉ានិត បានឲ្យដឹងថា ដោយមណ្ឌលវិទ្យាល័យ សម្តេច ហ៊ុន សែន ភ្នំពេញថ្មី រងការជន់លិច និងមានទឹកដក់មុខថ្នាក់មួយចំនួន រូបលោកបានដឹកនាំក្រុមការងារ យករថយន្តមកបូមទឹកចេញ និងបានចាក់ដីបំពេញ និងឈូសឆាយ បង្កលក្ខណៈងាយស្រួលដល់បេក្ខជនមកប្រឡងសញ្ញាបត្រមធ្យមសិក្សាទុតិយភូមិ សម្រាប់សម័យប្រឡង នាថ្ងៃទី ៨-៩ ខែតុលា ឆ្នាំ ២០២៤ ខាងមុខនេះ។

សូមបញ្ជាក់ថា យោងតាមអ្នកនាំពាក្យក្រសួងអប់រំ យុវជន និងកីឡា បានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះ មានបេក្ខជនដាក់ពាក្យចូលរួមប្រឡងប្រមាណ ១៣ ម៉ឺន ៧ ពាន់ ៤០ នាក់ ចែកជា ២៣០ មណ្ឌល ក្នុងមួយបន្ទប់ត្រៀមដាក់បេក្ខជនប្រឡងចំនួន ២៥ នាក់។ ការប្រឡងបែងចែកជាបេក្ខជនថ្នាក់វិទ្យាសាស្ត្រ មានចំនួនជិត ៤ ម៉ឺននាក់ និងបេក្ខជនថ្នាក់វិទ្យាសាស្ត្រសង្គម មានចំនួនជាង ៩ ម៉ឺននាក់។

លោក ម៉ូវ ម៉ានិត ក៏បានណែនាំដល់បេក្ខជនទាំងអស់ សូមកុំមានការភិតភ័យ នាំឲ្យបាត់បង់ការចងចាំ ប៉ះពាល់ការប្រឡង និងសូមជូនពរដល់បេក្ខជនទាំងអស់ប្រឡងបាននិទ្ទេសល្អគ្រប់គ្នា៕

អត្ថបទ ៖ សំណាង