ទើបប្រឡងចប់មួយព្រឹក បេក្ខជនប្ដេជ្ញា​យក​និទ្ទេស​ល្អជូនខ្លួនឯង និងគ្រួសារ

ទោះបីជាការប្រឡងមានការរឹតបន្តឹងក៏ដោយ បេក្ខជនប្រឡងនៅវិទ្យាល័យបាក់ទូក បានប្តេជ្ញាខ្ពស់ក្នុងការយកនិទ្ទេសល្អជូនខ្លួនឯង និងក្រុមគ្រួសារ។

បេក្ខជនប្រឡងបាក់ឌុបនៅមណ្ឌលវិទ្យាល័យបាក់ទូក សម្ដែងក្ដីសប្បាយរីករាយ ចំពោះការប្រឡងពេញមួយព្រឹកនេះ ព្រោះពួកគាត់ធ្វើបានល្អច្រើន ដែលកត្តានេះអាចកើតឡើងបានដោយសារការខិតខំរៀនសូត្រពេញ១ឆ្នាំ ទន្ទេញមេរៀន រំលឹកមេរៀន មកជាយូរហើយ មុនមកដល់ដំណាក់កាលប្រឡងនៅថ្ងៃនេះ។ បេក្ខជនរំពឹងខ្ពស់ ក្នុងការប្រឡងឱ្យបានជាប់ និងជាប់ក្នុងការទទួលបាននិទ្ទេសល្អ ដើម្បីសម្រាប់ខ្លួនឯងផង និងផ្តល់ក្តីសប្បាយចិត្តជូនដល់ឪពុកម្តាយផង។

ឪពុកម្តាយអាណាព្យាបាលសិស្សានុសិស្ស ដែលបានទៅឈររង់ចាំដើម្បីជាកម្លាំងចិត្តដល់កូនៗរបស់ខ្លួន បានបង្ហាញការគាំទ្របំផុតចំពោះក្រសួងដែលបានរឹតបន្តឹងការប្រឡងប្រកបដោយប្រសិទ្ធិភាព ព្រោះនេះជាការធ្វើឱ្យធនធានមនុស្ស កាន់តែមានគុណភាពខ្លាំងខ្លា ដើម្បីជាសសរទ្រូងដ៏រឹងមាំសម្រាប់សង្គមជាតិទៅថ្ងៃអនាគត់។

ក្នុងនោះដែរ នៅមណ្ឌលប្រលងវិទ្យាល័យបាក់ទូក លោក ថេង សុថុល អភិបាលនៃគណៈអភិបាលខណ្ឌ៧មករា អញ្ជើញកាត់វិញ្ញាសារជូនដល់បេក្ខជន ប្រឡងមធ្យមសិក្សារទុតិយភូមិផងដែរ។ លោកអភិបាលខណ្ឌបញ្ជាក់ថា វិទ្យាល័យបាក់ទូក មានមណ្ឌលប្រឡងចំនួន០៣ មានបន្ទប់ប្រឡង១០៧បន្ទប់ និងបេក្ខជនប្រឡងសរុប ២៦៥៤អង្គ នាក់។

ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៣-២០២៤ នឹងប្រព្រឹត្តិទៅរយៈពេល២ថ្ងៃ គឺថ្ងៃទី០៨ ដល់ថ្ងៃទី០៩ ខែតុលា ឆ្នាំ២០២៤៕

អត្ថបទ៖ សុភា