ព័ត៌មានជាតិ

ម៉ាស៊ីនបូមទឹកកងអង្គរក្ស សម្តេចតេជោ ជួយបូមរហូតបានរីងស្ងួត នៅផ្សារបឹងព្រលិត

បានផុស

៤ ខែ មុន

នៅ

ថ្ងៃអង្គារ ៨ តុលា ២០២៤

ដោយ

បើសិនជាពុំមានម៉ាស៊ីនបូមទឹករបស់កងអង្គរក្ស សម្តេចតេជោ ជួយបូមនោះទេ តំបន់ផ្សារបឹងព្រលឹតដែលរងការលិចលង់រយៈពេល ៣ ថ្ងៃ មកនោះ អាចប្រឈមនឹងការលិចលង់ជាច្រើនថ្ងៃ ដូចអំឡុងខែវស្សា ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រសាសន៍ លោក ចេង មុនីរ៉ា អភិបាលខណ្ឌច្បារអំពៅ បានឲ្យដឹងនៅថ្ងៃទី ៨ ខែតុលា នេះថា គិតមកដល់ព្រឹកមិញនេះ តំបន់ជុំវិញផ្សារបឹងព្រលឹត ស្ថិតក្នុងភូមិអូរអណ្តូង ១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ បានរីងស្ងួតដូចដើមវិញហើយ។ ពិសេសជាងនេះ កុំតែបានម៉ាស៊ីនបូមទឹករបស់កងអង្គរក្ស សម្តេចតេជោ ចំនួន ៤ គ្រឿង បានដាក់បូមតាមប្រព័ន្ធលូតូចរុញកម្លាំងទឹកចូលទៅលូធំ បង្ហួសទៅស្ថានីយបូមទឹកព្រែកបារាំងទេនោះ ច្បាស់ជានៅបន្តលិចលង់ ខណៈភ្លៀងមួយមេធំបន្ថែមទៀត នាវេលាទៀបភ្លឺថ្ងៃទី ៨ តុលា នេះ។

លោកអភិបាលខណ្ឌច្បារអំពៅ តំណាងឲ្យប្រជាពលរដ្ឋរស់នៅក្នុងតំបន់ទឹកលិច បានសម្ដែងការដឹងគុណដល់ សម្តេចតេជោ ដែល សម្តេច បានបញ្ជាឲ្យក្រុមបច្ចេកទេសកងអន្តរាគមន៍ នៃបញ្ជាការដ្ឋានកងអង្គរក្សរបស់ សម្តេច ដឹកយកម៉ាស៊ីនបូមទឹកចល័តចំនួន ៤ គ្រឿង មកដាក់បូមបានទាន់ពេល ធ្វើឲ្យប្រជាពលរដ្ឋសប្បាយចិត្ត ព្រោះតែទឹកបានរីងស្ងួតដូចដើមវិញហើយ។

គួររំលឹកថា ក្នុងអំឡុងយប់ថ្ងៃទី ៥-៦ ខែតុលា នេះ មានភ្លៀងធ្លាក់ខ្លាំងជាបន្តបន្ទាប់ ធ្វើឲ្យតំបន់ផ្សារបឹងព្រលឹត និងទីតាំងមួយចំនួន បានរងការលិចលង់ដោយជំនន់ទឹកភ្លៀងហក់ឡើងខ្លាំងជិត ១ ម៉ែត្រ បង្កឲ្យលិចលង់ផ្ទះប្រជាពលរដ្ឋតែមួយប៉ប្រិចភ្នែក៕

អត្ថបទ ៖ នរា