ក្រសួងអប់រំ ព្រមានឱ្យអ្នកចែកចាយវិញ្ញាសាប្រឡងបាក់ឌុបលុបចេញជាបន្ទាន់ មុននឹងក្រសួងចាត់ការតាមផ្លូវច្បាប់

«ម្ចាស់គណនីនៃបណ្តាញសង្គមនានា ដែលបានបង្ហោះវិញ្ញាសាប្រឡងទាំងអស់ ត្រូវលុបចេញជាបន្ទាន់ មុនពេលក្រសួងមានវិធានការផ្លូវច្បាប់។»។នេះគឺជាការព្រមានរបស់ក្រសួងអប់រំ យុវជន និងកីឡា នៅរសៀលថ្ងៃទី០៨ ខែតុលា នេះ បន្ទាប់ពីមានការចែកចាយជាប្រធានវិញ្ញាសាប្រឡងពាសពេញបណ្ដាញសង្គមហ្វេសប៊ុក។

ជាមួយគ្នានេះ ក្រសួងក៏បានព្រមានដល់បេក្ខជន អនុរក្ស គណៈមេប្រយោគ និងគណៈកម្មការនានា ព្រមទាំងសាធារណជន មិនត្រូវសរសេរ ឬថតចម្លងប្រធានវិញ្ញាសានៃការប្រឡងសញ្ញាបត្រមធ្យមសិក្សាទុតិយភូមិ តាមគ្រប់រូបភាព ដើម្បីបង្ហោះចែកចាយនៅតាមបណ្តាញសង្គមនានា។ តាមក្រសួងអប់រំ ការបង្ហោះវិញ្ញាសាប្រឡងលើបណ្តាញសង្គម ជាអំពើហាមឃាត់។

ក្រសួងអប់រំ ព្រមានបែបនេះ គឺដើម្បីធានាបាននូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន និងចៀសវាងការដាក់ និង ទទួលទណ្ឌកម្មនានា ចំពោះបេក្ខជន អនុរក្ស គណៈមេប្រយោគ និងគណៈកម្មការនានា ព្រមទាំងសាធារណជន ក្នុង អំឡុងពេលនៃដំណើរការសំណេរ នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៨ តុលា ២០២៤។

ក្រសួងអប់រំ បានបង្គាប់ឱ្យគណៈមេប្រយោគ ប្រធានមណ្ឌលប្រឡង និងគណៈកម្មការនានា ព្រមទាំងបេក្ខជន ទាំងអស់ ត្រូវអនុវត្តការព្រមាននេះឱ្យមានប្រសិទ្ធភាពប្រកបដោយស្មារតីទទួលខុសត្រូវខ្ពស់៕

ដោយ៖ង៉ិល ណារ៉ាត់