ប្រឡងបាក់ឌុបថ្ងៃទី១ បេក្ខជនមានបញ្ហាសុខភាពជិត៣០នាក់ ក្នុងនោះមាន២នាក់ត្រូវបញ្ចប់ការប្រឡង

ក្រសួងអប់រំយុវជននិងកីឡា បានឱ្យដឹងថា ដំណើរការសំណេរនៅថ្ងៃទី១ នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង០៨ តុលា ២០២៤ មានបេក្ខជនមានបញ្ហាសុខភាពចំនួន២៧នាក់ ក្នុងនោះមាន២នាក់ត្រូវបញ្ចប់ការប្រឡង។ អនុរក្ស អប្បមាទ និងជំនួយការចំនួន១០នាក់ មានបញ្ហាសុខភាព។

ខេត្តកោះកុង និងស្ទឹងត្រែងជួបបញ្ហាភ្លៀងខ្លាំង និងដាច់ចរន្តអគ្គិសនីមួយរយៈ។ នៅរសៀលប្រឡងថ្ងៃទី១មានករណីសិស្សមួយរូបនៅខេត្តតាកែវ បានយកទូរសព្ទចូលក្នុងបន្ទប់ប្រឡង និងនៅខេត្តកណ្តាលមានករណីអនុរក្សប្រើប្រាស់ទូរសព្ទក្នុងអំឡុងពេលបំពេញភារកិច្ច។

ជាមួយគ្នានេះដែរថ្ងៃប្រឡងទី១ក៏មានបេក្ខជនអវត្តមានសរុប២៣១៨នាក់ ស្រី៨៩៨នាក់ ក្នុងនោះបេក្ខជនស្វៃរិនអវត្តមាន១៩១២នាក់។ ចំនួនអវត្តមានកើនលើសព្រឹកថ្ងៃទី៨ ខែតុលា ឆ្នាំ២០២៣ ចំនួន១៩៨នាក់។

ក្រសួងអប់រំបានបន្តថា ដំណើរការសំណេរនៅថ្ងៃទី១នៃការប្រឡងសញ្ញាបត្រមធ្យមសិក្សាទុតិយភូមិបានប្រព្រឹត្តទៅដោយរលូន និងមិនមានបាតុភាពមិនប្រក្រតីណាមួយកើតឡើងឡើយ បើទោះបីមានភ្លៀងធ្លាក់តិចតួចនៅតាមមណ្ឌលមួយចំនួន ប៉ុន្តែដំណើរការសំណេរនៅតែមានដំណើរការល្អមានសភាពស្ងប់ស្ងាត់ និងរបៀបរៀបរយល្អ ដោយមានការយកចិត្តទុកដាក់ និងទំនួលខុសត្រូវខ្ពស់ពីសំណាក់គណៈមេប្រយោគទូទាំងប្រទេស គណៈអប្បមាទទូទាំងប្រទេស ជំនួយការអប្បមាទទូទាំងប្រទេស ប្រធាន អនុប្រធានមណ្ឌល គណៈកម្មការកណ្ដាល គណៈកម្មការត្រួតពិនិត្យអគារ
គណៈកម្មការអនុរក្ស ដោយមានការចូលរួមសហការពីសហភាពសហព័ន្ធយុវជនកម្ពុជា អង្គភាពប្រឆាំងអំពើពុករលួយ មន្ត្រីសុខាភិបាល និងអាជ្ញាធរមានសមត្ថកិច្ចពាក់ព័ន្ធ។

បេក្ខជនបានគោរពបទប្បញ្ញត្តិនៃការប្រឡងព្រមទាំងបានប្រឹងប្រែងក្នុងការធ្វើកិច្ចការតាមសមត្ថភាពរៀងៗខ្លួនដោយគ្មានយកសំណៅឯកសារ និងឧបករណ៍អេឡិចត្រូនិកចូលមណ្ឌលប្រឡងឡើយ។

គួរបញ្ជាក់ថា ប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ២០២៤ មានបេក្ខជនចុះឈ្មោះប្រឡងសរុប ១៣៧ ០៤០ នាក់ (ស្រី ៧៤ ៨៨២នាក់) ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៣៩ ៣៥៨ នាក់ (ស្រី ២៣ ៧១៥ នាក់) បេក្ខជនថ្នាក់វិទ្យាសាស្ត្រសង្គមមានចំនួន ៩៧ ៦៨២ នាក់ (ស្រី ៥១១៦៧ នាក់) ចែកជា២៣០ មណ្ឌល ត្រូវជា ៥ ៥៣៣ បន្ទប់ ក្នុងនោះថ្នាក់វិទ្យាសាស្ត្រមានចំនួន ៧៣ មណ្ឌល ត្រូវជា ១ ៦០២ បន្ទប់ និងថ្នាក់វិទ្យាសាស្ត្រសង្គម មានចំនួន ១៥៧ មណ្ឌល ត្រូវជា ៣ ៩៣១ បន្ទប់៕

អត្ថបទ៖ សំអឿន