ព័ត៌មានជាតិ

រដ្ឋបាលខណ្ឌឫស្សីកែវ ដាក់ម៉ាស៊ីនបូមទឹករំដោះការជន់លិច ក្នុងមូលដ្ឋានខណ្ឌឫស្សីកែវ

បានផុស

៣៨ វិនាទី មុន

នៅ

ថ្ងៃពុធ ៩ តុលា ២០២៤

ដោយ

ក្រោយមានភ្លៀងធ្លាក់ជាបន្តបន្ទាប់ប៉ុន្មានយប់ជាប់គ្នាមកនេះ ជំនន់ទឹកភ្លៀងបានជន់លិចតំបន់មួយចំនួនតាមភូមិ និងខ្នងផ្ទះប្រជាពលរដ្ឋ ជាពិសេសតំបន់ក្នុងមូលដ្ឋានខណ្ឌឫស្សីកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីរសៀលថ្ងៃទី ០៨ ខែកញ្ញា ឆ្នាំ ២០២៤ ម្សិលមិញ រដ្ឋបាលខណ្ឌឫស្សីកែវ ដឹកនាំផ្ទាល់ដោយ លោក ស្មាស់ រិទ្ធី អភិបាលខណ្ឌស្ដីទី បានដឹកនាំមន្ត្រីក្រោមឱវាទ ចុះពិនិត្យស្ថានីយបូមទឹកគីឡូម៉ែត្រលេខ ០៩ គឺកំពុងដំណើរការម៉ាស៊ីនបូមទឹកចំនួន ១១ គ្រឿង ក្នុងនោះបូមទឹកដោយម៉ាស៊ីនគោយន្ត ០៧ គ្រឿង និងម៉ាស៊ីនធំ ០៤ គ្រឿង ហើយស្ថានភាពទឹកនៅចំណុចស្ថានីយខាងលើបានស្រកប្រមាណ ០២ តឹក បើធៀបកាលពីព្រឹកម្សិលមិញ។

បន្ថែមទៀតនោះ លោកបន្តចុះពិនិត្យស្ថានភាពទឹកនៅព្រែកអូរវែង ត្រង់ចំណុចស្ពានវត្តទួល មានការស្រកចុះប្រមាណជាង ០១ ម៉ែត្រ ពីខឿនស៊ីផាយ ធៀបកាលពីថ្ងៃទី ០៧ ខែតុលា ឆ្នាំ ២០២៤។

ជាចុងក្រោយ លោកអភិបាលខណ្ឌស្ដីទី បានបញ្ជាក់ថា អាជ្ញាធរតាមសង្កាត់ កំពុងខិតខំរំដោះទឹកនៅទីតាំងដែលរងការលិចលង់ និងសូមបញ្ជាឲ្យមន្ត្រីពាក់ព័ន្ធ ត្រូវបន្តចុះពិនិត្យស្ថានភាពទឹកលិចផ្លូវ និងលំនៅឋានពលរដ្ឋឲ្យជាប់ជាប្រចាំ ដើម្បីរកដំណោះស្រាយជូនពួកគាត់ និងត្រូវតាមដានស្ថានភាពទឹក ២៤ ម៉ោង លើ ២៤ ម៉ោង ដើម្បីងាយស្រួលវាយតម្លៃ និងឆ្លើយតបទាន់ពេលវេលាក្នុងករណីកើតមានគ្រោះអាសន្នជាយថាហេតុណាមួយ៕

អត្ថបទ ៖ សុភា