ក្រុមហ៊ុនជប៉ុនបង្កើនការកែច្នៃគ្រាប់ស្វាយចន្ទីពី ៣០០ តោន ទៅ ១ ៥០០ តោន ​ក្នុង​មួយ​​ឆ្នាំ

នៅក្នុងជំនួប​ជាមួយ​មន្រ្តី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងក្រុមហ៊ុនជប៉ុន MIRARTH បាន​ពិភាក្សាអំពីការពង្រីក​សមត្ថភាពកែច្នៃគ្រាប់ស្វាយចន្ទី​របស់ក្រុមហ៊ុន​នៅកម្ពុជា។

នៅក្នុងជំនួបនោះ តំណាងក្រុមហ៊ុនជប៉ុន MIRARTH បានរាយការណ៍ពីវឌ្ឍនភាពនៃប្រតិបត្តិការរបស់ខ្លួន ដោយក្រុមហ៊ុន​​​​​ប្រកាស​បង្កើន​សមត្ថភាពកែច្នៃគ្រាប់ស្វាយចន្ទីឲ្យបាន​ដល់ ១ ៥០០ តោន ក្នុងមួយឆ្នាំ ពីប្រតិបត្តិការ​​ដំបូងកែច្នៃ​បាន​​​​ត្រឹម​ ៣០០ តោន ក្នុង​ឆ្នាំ២០២១។

ជាមួយគ្នានេះ តំណាង​ក្រុមហ៊ុន MIRARTH ក៏បានលើកឡើង​អំពីលទ្ធភាពសិក្សា​ចម្រាញ់​យក​ប្រេង​ពីសំបកគ្រាប់​ និងដើមស្វាយចន្ទី​ ដែលការសិក្សានឹងប្រើប្រាស់​រយ:ពេល ២ ឆ្នាំ។ ក្រុមហ៊ុន​បាន​ស្នើសុំកិច្ចសហការ និងការ​គាំទ្រ​ពីក្រសួង​លើ​​ភាពអនុលោមតាមស្តង់ដារ និងការវិភាគ​សមាសធាតុ​អាហារូបត្ថម្ភនៃផលិតផលគ្រាប់សា្វយចន្ទី​។

​កម្ពុជាជា​ប្រទេស​នាំ​ចេញ​ស្វាយចន្ទី​ដ៏​ធំមួយរបស់ពិភពលោក​​ ប៉ុន្តែ​មួយផ្នែកធំមិនបានធ្វើការកែច្នៃ​ ដោយសារតែកម្ពុជានៅ​ខ្វះកន្លែងសមស្របដើម្បីធ្វើការសម្ងួត រក្សាទុក និងកែច្នៃ ធ្វើឱ្យគ្រាប់ស្វាយចន្ទីដែលប្រមូលបានភាគច្រើនត្រូវនាំចេញទាំងឆៅនិងក្នុងតម្លៃទាប។ 

ថ្លែងនៅក្នុងពិធីសម្ពោធជាផ្លូវការនូវរោងចក្រកែច្នៃគ្រាប់ស្វាយចន្ទី និងសំបកស្វាយចន្ទី​របស់ក្រុមហ៊ុន MIRARTH នៅ​ក្នុងឃុំជ័យ ស្រុកកំពង់ស្វាយ ខេត្តកំពង់ធំ​ អគ្គនាយកក្រុមហ៊ុន MIRARTH Green Tech លោក Kentaro Taniguchi បានមានប្រសាសន៍ថា កម្ពុជាជាប្រទេសដែលផលិតគ្រាប់ស្វាយចន្ទីលំដាប់ពិភពលោក ប៉ុន្តែស្វាយ​ចន្ទីមួយផ្នែកធំដែល​កម្ពុជា​នាំ​ចេញមិនបានធ្វើការកែច្នៃ​។

តាមរយៈការ​បើកដំណើរការ​រោងចក្រកែច្នៃគ្រាប់ស្វាយចន្ទីនៅ​កម្ពុជា អគ្គនាយកក្រុមហ៊ុន MIRARTH Green Tech បានអះអាង​ថា នឹង​អាចបង្កើនតម្លៃបន្ថែមដល់គ្រាប់ស្វាយចន្ទី និងអាចលើកស្ទួយប្រាក់ចំណូលរបស់ពលរដ្ឋដែលជាលទ្ធផលអាចចូលរួមចំណែកអភិវឌ្ឍសេដ្ឋកិច្ចកម្ពុជាផងដែរ។

គិតត្រឹមឆ្នំា២០២៣ កម្ពុជាមានផ្ទៃដីដំាដុះស្វាយចន្ទីប្រមាណជិត ៥២ម៉ឺនហិកតា និងទទួលបានទិន្នផលសរុបចំនួន ៧២ម៉ឺនតោន។ ចំណែក ឯការនំាចេញគ្រាប់ស្វាយចន្ទីឆៅទៅទីផ្សារអន្តជាតិបានចំនួនប្រមាណ ៦២ម៉ឺនតោន ទៅកាន់ប្រទេស វៀតណាម ចិន ជប៉ុន បង់ក្លាដែស ឥណ្ណា ថៃ និងសហរដ្ឋអាមេរិក។ ដោយឡែក ក្នុងឆ្នាំ២០២៤ នេះ តម្លៃគ្រាប់ស្វាយចន្ទីស្រស់មានតម្លៃប្រមាណពី ១ ០០០ ទៅ ១ ៣០០ ដុល្លារ ក្នុងមួយតោន។

បើតាម​មន្រ្តី​ក្រសួង​កសិកម្ម កម្ពុជាកំពុងជំរុញការនាំចេញគ្រាប់ស្វាយចន្ទីកែច្នៃទៅកាន់ទីផ្សារជប៉ុនឱ្យបានជាង ១០០ តោន ក្នុងឆ្នាំ ២០២៤ ​ខណៈ​ដែល​គ្រាប់​ស្វាយចន្ទីកែច្នៃរបស់កម្ពុជាដែលនាំទៅជប៉ុនទទួលបានការគាំទ្រច្រើន ដោយសារមានគុណភាព​ខ្ពស់ ​និង​មានជម្រើសច្រើនសម្រាប់អ្នកបរិភោគ៕

បន្ត​ចុចអាន៖ ក្រុមហ៊ុនជប៉ុន MIRARTH Green Tech បើកសម្ពោធរោងចក្រនៅខេត្តកំពង់ធំដែលអាចកែច្នៃគ្រាប់ស្វាយចន្ទី១៥០០តោនក្នុងមួយឆ្នាំ