ប្រធានក្រុមហ៊ុនសាជីវកម្មកូរ៉េ បង្ហាញបំណងសិក្សាបង្កើតរោងចក្រកែច្នៃសំរាមសំណល់ប្លាស្ទិក ទៅជារបស់ប្រើប្រាស់នៅកម្ពុជា

លោក Kim Sangyoung ប្រធានក្រុមហ៊ុនសាជីវកម្មដេហាន របស់​សាធារណរដ្ឋកូរ៉េ  នៅ​ក្នុង​ឱកាស​ចូល​ជួប​រដ្ឋមន្ត្រី​ក្រសួង​បរិស្ថាន នា​ថ្ងៃ ទី​០៩ ខែ​តុលា ម្សិល​មិញ​នេះ បាន​បង្ហាញ​ពី​គោល​បំណង​សិក្សា​បង្កើត​រោងចក្រ​កែច្នៃសំរាមសំណល់ប្លាស្ទិក ទៅជារបស់ប្រើប្រាស់នៅកម្ពុជា។

ក្នុង​ឱកាស​នៃ​ជំនួបរដ្ឋមន្រ្តីក្រសួងបរិស្ថាន លោក Kim Sangyoung ក្រៅពី​ថ្លែង​កោត​សរសើរ​ និងវាយតម្លៃខ្ពស់ចំពោះ ជោគជ័យការដាក់ចេញយុទ្ធនាការ កាត់បន្ថយការប្រើប្រាស់ប្លាស្ទិក របស់ក្រសួងបរិស្ថាន នាពេលកន្លងមក ដែល​បានដោះស្រាយបញ្ហាប្លាស្ទិកនៅតាមសាលារៀន វត្តអារាម និងទីសាធារណៈនានា លោកក៏​បាន​បញ្ជាក់​ដែរ​ថា បច្ចុប្បន្នក្រុមហ៊ុនកំពុង​បង្កើត​ទំនាក់ទំនង​ជាមួយបណ្តា​ដៃគូរដ្ឋាភិបាល និងឯកជនផ្សេងៗ ដើម្បីជួយកែច្នៃកាកសំណល់ប្លាស្ទិក ដែល​មានគុណភាព​សម្រាប់ប្រើប្រាស់​ឡើងវិញម្តងទៀត។

ជា​ការ​ឆ្លើយ​តប លោក​រដ្ឋមន្ត្រី អ៊ាង សុផល្លែត បាន​គូស​បញ្ជាក់​ថា «សំណល់ប្លាស្ទិកជាសត្រូវទី១ របស់ខ្ញុំ។ ខ្ញុំមិនចង់ឱ្យកម្ពុជា ត្រូវបានបំពុលដោយប្លាស្ទិកទេ។ យើងត្រូវចូលរួមសាមគ្គីគ្នាកាត់បន្ថយការប្រើប្រាស់ និងលុប​បំបាត់បញ្ហាប្លាស្ទិក ដើម្បីការពារជីវិតរបស់ប្រជាពលរដ្ឋ និងដើម្បីកម្ពុជាស្អាត»។

លោករដ្ឋមន្រ្តី​បានបន្ត​ថា ការប្រយុទ្ធប្រឆាំងសំរាម និង​សំណល់ប្លាស្ទិក ជាសកម្មភាពជាអាទិភាពមួយ របស់រាជរដ្ឋាភិបាលកម្ពុជា។ ភាពស្អាត នៅក្នុង«យុទ្ធសាស្ត្រចក្រាវិស័យបរិស្ថាន» ត្រូវបានក្រសួងបរិស្ថាន ដាក់ចេញយុទ្ធនាការកាត់បន្ថយការប្រើប្រាស់ប្លាស្ទិក «ថ្ងៃនេះ ខ្ញុំនឹងមិនប្រើថង់ប្លាស្ទិក» ដែល មានការចូលរួមពីមនុស្សជាង ៩,៥ លាននាក់ និង យុទ្ធនាការ «កម្ពុជាស្អាត ខ្មែរធ្វើបាន» គឺជាគំនិតផ្តួចផ្តើមមួយដើម្បីលើកទឹកចិត្តដល់សិស្សានុសិស្ស និងអ្នកភូមិនៅតាមភូមិនីមួយៗ ឃុំ ស្រុក និងខេត្តទាំងអស់គ្នា ក្នុងការសម្អាត និងប្រមូលសំរាមជុំវិញផ្ទះ សាលារៀន វត្តអារាម និងទីសាធារណៈឱ្យប្រមូល ការគ្រប់គ្រង និងការចោលសំរាម ប្លាស្ទិកឱ្យបានត្រឹមត្រូវ។

លោក រដ្ឋមន្ត្រី ក៏​បាន​សង្កត់​ធ្ងន់​ថា នៅក្នុងឆ្នាំ២០២៥ ខាងមុខនេះ ក្រសួងនឹងផ្តល់ជូនធុងសំរាមដល់សាលារៀន វត្តអារាម និងមន្ទីរពេទ្យ ដើម្បីជំរុញឱ្យមានការគ្រប់គ្រងកាកសំណល់ ប្លាស្ទិក និងចាត់វិធានការឆ្ពោះ ទៅរកការកាត់បន្ថយកាកសំណល់ នាពេលអនាគត និងដំណើរការអភិវឌ្ឍរបស់កម្ពុជា មាននិរន្តរភាពយូរអង្វែងតទៅ៕

​