ព័ត៌មានជាតិ

៩ ខែ ឆ្នាំនេះ មានកម្មករជួបគ្រោះថ្នាក់នៅកន្លែងធ្វើការ និងគ្រោះថ្នាក់ចរាចរណ៍ ជាង ១ ម៉ឺននាក់

បានផុស

៥ ខែ មុន

នៅ

ថ្ងៃព្រហស្បតិ៍ ១០ តុលា ២០២៤

ដោយ

នៅក្នុងរយៈពេល ៩ ខែ ឆ្នាំ ២០២៤ នេះ មានកម្មករ-និយោជិត ជួបគ្រោះថ្នាក់នៅកន្លែងធ្វើការ និងគ្រោះថ្នាក់ចរាចរណ៍នៅលើដងផ្លូវប្រមាណជាង ១២ ០០០ នាក់ ស្ត្រីមានជាង ៦ ៥០០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ១០ តុលា នេះថា ចាប់ពីខែមករា រហូតមកដល់ខែកញ្ញា ឆ្នាំ ២០២៤ នេះ មានកម្មករ-និយោជិតជួបគ្រោះថ្នាក់នៅកន្លែងធ្វើការ និងគ្រោះថ្នាក់ពេលធ្វើដំណើរចំនួន ១២ ៦៤៥ នាក់ ស្រី ៦ ៥៦០ នាក់ ក្នុងនោះគ្រោះថ្នាក់នៅកន្លែងធ្វើការចំនួន ៥ ៥២៨ នាក់ និងស្រី ២ ៥៥៥ នាក់ និងគ្រោះថ្នាក់ពេលធ្វើដំណើរ ចំនួន ៧ ១១៧ នាក់ ស្រី ៤ ០០៥ នាក់។

លោករដ្ឋលេខាធិការ បានបន្តថា មានកត្តាសំខាន់ ៣ ដែលជំរុញឱ្យមានករណីគ្រោះថ្នាក់ចរាចរណ៍កើតឡើង ក្នុងនោះរួមមាន កត្តាមនុស្ស យានយន្ត និងកត្តាផ្លូវ។ គ្រោះថ្នាក់ចរាចរណ៍ភាគច្រើនបង្កឡើងពីកត្តាមនុស្ស ដូចជាបើកបរលើសល្បឿនកំណត់ ការមិនគោរពសិទ្ធិអាទិភាព មិនយោគយល់គ្នា ការមិនប្រកាន់ស្តាំ មិនគោរពភ្លើង និងស្លាកសញ្ញាចរាចរណ៍ ការវ៉ាជែង ការដឹកកម្មករលើសទម្ងន់ និងការបើកបរក្រោមឥទ្ធិពល នៃគ្រឿងស្រវឹង។

ដើម្បីបញ្ចៀសគ្រោះថ្នាក់ចរាចរណ៍នេះ លោក កត្តា អ៊ន បានសំណូមពរដល់អ្នកបើកបរ ត្រូវបើកបរដោយប្រុងប្រយ័ត្ន និងយោគយល់គ្នា និងគោរពច្បាប់ចរាចរណ៍ កុំបើកបរលើសល្បឿនកំណត់ បើកបរខុសគន្លងផ្លូវ កុំវ៉ាជែង និងកុំបើកបរពេលងងុយគេង និងស្ថិតក្រោមឥទ្ធិពល នៃគ្រឿងស្រវឹង ត្រូវមានបណ្ណបើកបរត្រឹមត្រូវ ហើយអ្នកបើកបរត្រូវគិតថា «វាសនា និងអាយុជីវិតរបស់កម្មករ-និយោជិតនៅលើរថយន្តពឹងផ្អែក និងផ្ញើវាសនាលើយើង រួមទាំងខ្លួនយើងផងដែរ»។ ដូច្នេះត្រូវបើកបរដោយប្រុងប្រយ័ត្ន ដើម្បីធានាសុវត្ថិភាពដល់អ្នកជិះ។

ជាមួយគ្នានេះដែរ លោក កត្តា អ៊ន ស្នើឱ្យសមត្ថកិច្ច ត្រូវពង្រឹងការអនុវត្តច្បាប់ចំពោះអ្នកល្មើសច្បាប់ឱ្យបានតឹងរ៉ឹងបំផុត ដើម្បីកាត់បន្ថយអត្រាគ្រោះថ្នាក់ចរាចរណ៍នៅលើដងផ្លូវឱ្យនៅកម្រិតទាបបំផុត។

គួរបញ្ជាក់ថា ឆ្នាំ ២០២៣ កន្លងទៅ មានកម្មករ-និយោជិត ជួបគ្រោះថ្នាក់ការងារ និងគ្រោះថ្នាក់ចរាចរណ៍ចំនួន ១៣ ៤៧៤ ករណី ដោយមានជនរងគ្រោះសរុប ១៤ ៣១២ នាក់ ស្រី ៧ ៣៩៨ នាក់៕

អត្ថបទ ៖ សំអឿន