ពលរដ្ឋមានអត្តសញ្ញាណប័ណ្ណសញ្ជាតិខ្មែរផុតសុពលភាព ឬមានសុពលភាពតិចជាង១៨០ថ្ងៃ អាចស្នើសុំប្ដូរថ្មីបាន

យោងតាមសេចក្ដីជូនដំណឹងរបស់អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បានឲ្យដឹងថា ប្រជាពលរដ្ឋមានអត្តសញ្ញាណប័ណ្ណសញ្ជាតិខ្មែរដែលផុតសុពលភាព ឬមានសុពលភាពតិចជាង១៨០ថ្ងៃ អាចស្នើសុំប្ដូរថ្មីបាន។

សូមបញ្ជាក់ផងដែរកន្លងទៅ គឺអគ្គនាយកដ្ឋានអត្តសញ្ញាណកម្ម បានកំណត់សុពលភាពតិចជាង៩០ថ្ងៃទើបអាចស្នើរសុំថ្មីបាន។ ដូច្នេះអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ សូមជម្រាបជូនព័ត៌មានសារជាថ្មី អំពីការស្នើសុំអត្តសញ្ញាណប័ណ្ណសញ្ជាតិខ្មែរ សម្រាប់ប្រជាពលរដ្ឋដែលមានអាយុ ១៥ឆ្នាំឡើងហើយពុំទាន់មានអត្តសញ្ញាណប័ណ្ណសញ្ជាតិខ្មែរសម្រាប់ប្រើប្រាស់ និងប្រជាពលរដ្ឋមានអត្តសញ្ញាណប័ណ្ណសញ្ជាតិខ្មែរដែលផុតសុពលភាព ឬមានសុពលភាពតិចជាង១៨០ថ្ងៃ។

សូមបញ្ជាក់មន្ថែមថា នៅតាមបណ្តាអធិការដ្ឋាននគរបាលខណ្ឌទាំង១៤ នៃស្នងការដ្ឋាននគរបាលរាជធានីភ្នំពេញ បានពង្រឹងអនុវត្តភារកិច្ចការងារបម្រើសេវាសាធារណៈជូនប្រជាពលរដ្ឋ ជាពិសេសសេវាលើការងារផ្តល់អត្តសញ្ញាណប័ណ្ណសញ្ជាតិខ្មែរ សៀវភៅគ្រួសារ(ក៤) សៀវភៅស្នាក់នៅ(ក២) នៅក្នុងនោះនៅថ្ងៃទី០៩ ខែតុលា ឆ្នាំ២០២៤ នគរបាលបានផ្ដល់សេវា ជូនពលរដ្ឋរួមមាន៖

ទី១.ផ្តល់សេវាធ្វើអត្តសញ្ញាណប័ណ្ណ សរុបចំនួន៧៤៤នាក់ ផ្តល់ឡើងវិញ ចំនួន៦៦៧នាក់ និងផ្តល់ថ្មីចំនួន៧៧នាក់។
ទី២.ផ្តល់សៀវភៅស្នាក់នៅថ្មី ១៨គ្រួសារ ទុតិយតាសៀវភៅស្នាក់នៅ ៤៣គ្រួសារ និងផ្តល់សៀវភៅគ្រួសារថ្មី ២៥គ្រួសារ និងទុតិយតាសៀវភៅគ្រួសារ ១៦គ្រួសារ៕

អត្ថបទ៖ សុភា