UN អរគុណ សម្តេចធិបតី ដែលបានបន្តរក្សាទុកកងកម្លាំងមួកខៀវកម្ពុជានៅលីបង់

លោក Jean-Pierre Lacroix អគ្គលេខាធិការរងអង្គការសហប្រជាជាតិ ទទួលបន្ទុកប្រតិបត្តិការរក្សាសន្តិភាពបានថ្លែងអំណរគុណចំពោះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានបន្តរក្សាទុកកងកម្លាំងមួកខៀវដ៏ក្លាហាននៅប្រទេសលីបង់។

អគ្គលេខាធិការរងអង្គការសហប្រជាជាតិ អរគុណបែបនេះ នាថ្ងៃទី១០ ខែតុលា ឆ្នាំ២០២៤ ​ក្នុងឱកាសជួបជាមួយទេសរដ្ឋមន្រ្តី​ លី​ ធុជ​ អនុប្រធាន​ទី១​ អាជ្ញាធរ​មីន​។

លោកអគ្គលេខាធិការរង បានបញ្ជាក់ថាសុវត្ថិភាពរបស់កងកម្លាំង គឺជាសុវត្ថិភាពរបស់អង្គការសហប្រជាជាតិ លោក ក៏បានចូលរួមរំលែកមរណទុក្ខជាមួយសម្តេចធិបតី ចំពោះការបាត់បង់ នាយឧត្តមសេនីយ៍​ សែម សុវណ្ណនី ដែលជាមិត្តភ័ក្ដិជិតស្និទ្ធ និងបានរួមចំណែកក្នុងសកម្មភាពរក្សាសន្តិភាព និងសន្តិសុខ ក្រោមឆ័ត្ររបស់​អង្គការ​សហប្រជាជាតិ​៕