ព័ត៌មានជាតិ

អភិបាលរងខេត្តកោះកុង ប្រាប់ដល់ប្រជានេសាទប្រុងប្រយ័ត្នខ្ពស់ ការចេញទូកទៅសមុទ្រអំឡុងរដូវវស្សា

បានផុស

៤ ខែ មុន

នៅ

ថ្ងៃចន្ទ ១៤ តុលា ២០២៤

ដោយ

អភិបាលរងខេត្តកោះកុង បានប្រាប់ដល់ប្រជានេសាទនៅឃុំជ្រោយស្វាយ ស្រុកស្រែអំបិល សូមប្រុងប្រយ័ត្នខ្ពស់ចំពោះការចេញទូកទៅសមុទ្រ អំឡុងរដូវវស្សា ដោយងាយប្រឈមនឹងគ្រោះថ្នាក់ជាយថាហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការក្រើនរម្លឹករបស់ លោកស្រី អ៊ី នារីនេត អភិបាលរងខេត្តកោះកុង ក្នុងពិធីប្រគល់បណ្ណ និងសៀវភៅពិនិត្យលក្ខណៈបច្ចេកទេសជលយានជូនដល់ប្រជាពលរដ្ឋចំនួន ១១០ គ្រួសារ ក្នុងមូលដ្ឋានស្រុកស្រែអំបិល កាលពីថ្ងៃទី ១១ ខែតុលា ឆ្នាំ ២០២៤ ថ្មីៗ នេះ។

លោកស្រីអភិបាលរងខេត្ត ក៏សូមឲ្យប្រជានេសាទភ្ជាប់ប្រព័ន្ធប្រកាសអាសន្នដែលមានលេខ ១២៩៤ ដើម្បីអាចដឹងទុកជាមុនអំពីការប្រែប្រួលអាកាសធាតុ។ ជាក់ស្ដែងរាល់មានសភាពការណ៍អំពីគ្រោះមហន្តរាយណា ប្រព័ន្ធនឹងផ្តល់ព័ត៌មានជូនដល់ប្រជាពលរដ្ឋដែលបានភ្ជាប់ឲ្យមានការប្រុងប្រយ័ត្ន។

ដោយឡែកសម្រាប់ការប្រគល់បណ្ណ និងសៀវភៅពិនិត្យលក្ខណៈបច្ចេកទេសជលយានជូនដល់ប្រជាពលរដ្ឋចំនួន ១១០ គ្រួសារ ត្រូវបាន លោកស្រី អ៊ី នារីនេត គូសបញ្ជាក់ថា ស្រុកស្រែអំបិល ជាស្រុកចុងក្រោយហើយដែលទទួលបានប័ណ្ណជលយាន និងសៀវភៅពិនិត្យលក្ខណៈយាន ក្រោយពីពលរដ្ឋអ្នកនេសាទនៅក្រុង-ស្រុកចំនួន ៦ ផ្សេងទៀត បានចុះបញ្ជី ទូក នាវា និងកប៉ាល់ ចប់ជាស្ថាពរ។

តំណាងលោកស្រី មិថុនា ភូថង លោកស្រីអភិបាលរងខេត្តកោះកុង ក៏ស្នើដល់ប្រជានេសាទគ្រប់រូប ប្រើប្រាស់ឧបករណ៍នេសាទតាមច្បាប់កំណត់ដែលផ្ទុយការហាមឃាត់អាចបំផ្លាញដល់ធនធានជលផល និងធនធានធម្មជាតិ។ បន្តចូលរួមអភិរក្សធនធានជលផលដែលកំពុងមានឲ្យបានគង់វង្ស និងកុំចេញទៅនេសាទទាំងអាកាសធាតុមានព្យុះភ្លៀងផងដែរ។

គួរជម្រាបថា ការចុះបញ្ជីជលយាននេះ ក្រុមការងារខេត្ត និងមន្ទីរពាក់ព័ន្ធ បានបង្កលក្ខណៈងាយស្រួលដល់ប្រជានេសាទដល់ក្បែរលំនៅឋានតែម្ដង ដើម្បីកាត់បន្ថយចំណាយពេលវេលា ថវិកា និងសម្រួលរាល់ការលំបាករបស់ពួកគាត់ ដោយជំនួសមកវិញផ្តល់ជូនភាពស្របច្បាប់។

អ្នកស្រី ពោល ទេវ និងលោក ពៅ ធឿន ជាប្រជានេសាទដែលបានទទួលបណ្ណជលយាន យល់ថា ការចុះបញ្ជីទូកនេះជាភាពស្របច្បាប់មួយក្នុងនាមជាប្រជាពលរដ្ឋអ្នកនេសាទ ដោយសារវាមានសារៈសំខាន់ណាស់សម្រាប់ពួកគាត់។ ម្យ៉ាងទៀត ពួកគាត់ក៏លែងសូវបារម្ភពេលចុះទៅនេសាទនៅសមុទ្រម្តងៗ ខណៈមានឯកសារត្រឹមត្រូវតាមច្បាប់កំណត់ដោយអាជ្ញាធរ និងមន្ទីរជំនាញពាក់ព័ន្ធ៕

អត្ថបទ ៖ សិរីវឌ្ឍនៈ