ព័ត៌មានជាតិ

មន្ត្រីជាន់ខ្ពស់ ប.ស.ស ៖ ៩ ខែនេះ ខេត្តកំពតមិនមានគ្រោះថ្នាក់ចរាចរណ៍ លើរថយន្តដឹកកម្មករ-និយោជិត ទេ

បានផុស

៥ ខែ មុន

នៅ

ថ្ងៃចន្ទ ១៤ តុលា ២០២៤

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត (ស.ផ.ក) បានលើកឡើងថា រយៈពេល ៩ ខែ ក្នុងឆ្នាំ ២០២៤ នេះ ខេត្តកំពតមិនមានករណីគ្រោះថ្នាក់ចរាចរណ៍កើតឡើងលើរថយន្តដឹកកម្មករ-និយោជិតនោះទេ។ មានន័យថា អ្នកបើករថយន្តដឹកកម្មករ-និយោជិតនៅក្នុងខេត្តនេះ បានយល់ដឹងកាន់តែច្បាស់ និងគោរពច្បាប់ចរាចរណ៍ ក៏ដូចជាសុវត្ថិភាពក្នុងពេលធ្វើដំណើរបានល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពិធីអប់រំផ្សព្វផ្សាយច្បាប់ស្តីពី “ចរាចរណ៍ផ្លូវគោក សុវត្ថិភាពក្នុងការធ្វើដំណើរ និងសុវត្ថិភាពលើមធ្យោបាយដឹកជញ្ជូន ជូនដល់អ្នកបើកបរយានយន្តដឹកកម្មករ-និយោជិត និងកម្មករ-និយោជិត” ស្ថិតនៅរោងចក្រ POU CHEN (CAMBODiA) CO., LTD. ក្នុងខេត្តកំពត លោកបណ្ឌិតអគ្គនាយករង ក៏បានជំរុញលើកទឹកចិត្តដល់គ្រប់ក្រសួង ស្ថាប័ន ឬផ្នែកពាក់ព័ន្ធ ត្រូវបង្កើនការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកឱ្យកាន់តែទូលំទូលាយបន្ថែមទៀត និងបញ្ជ្រាបនូវហានិភ័យដែលបង្កឡើងដោយគ្រោះថ្នាក់ចរាចរណ៍ឱ្យគ្រប់គ្នាបានដឹងជាប្រចាំ ដែលនេះជាការចូលរួមចំណែកយ៉ាងសំខាន់ ដើម្បីកាត់បន្ថយអត្រាគ្រោះថ្នាក់ចរាចរណ៍ ស្របតាមអនុសាសន៍ណែនាំដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ជាមួយគ្នានេះ លោក សេង សិរីបុត្រ អភិបាលរង នៃគណៈអភិបាលខេត្តកំពត ក៏បានសម្តែងនូវការអរគុណ និងកោតសរសើរចំពោះស្ថាប័នពាក់ព័ន្ធនានា ពិសេស ប.ស.ស. ដែលកន្លងមកតែងតែយកចិត្តទុកដាក់ខ្ពស់ក្នុងការចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកជូនដល់អ្នកបើកបររថយន្តដឹកកម្មករ-និយោជិត ពិសេសកម្មករ-និយោជិត តាមគ្រប់រូបភាព ធ្វើយ៉ាងណាឱ្យកម្មករ-និយោជិតទាំងអស់បានយល់ដឹងកាន់តែច្បាស់ស្តីពីចរាចរណ៍ផ្លូវគោក និងសុវត្ថិភាពក្នុងពេលធ្វើដំណើរ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ចាប់ពីខែមករា រហូតមកដល់ខែកញ្ញា ឆ្នាំ ២០២៤ នេះ មានកម្មករ-និយោជិតជួបគ្រោះថ្នាក់នៅកន្លែងធ្វើការ និងគ្រោះថ្នាក់ពេលធ្វើដំណើរចំនួន ១២ ៦៤៥ នាក់ ស្រី ៦ ៥៦០ នាក់ ក្នុងនោះគ្រោះថ្នាក់នៅកន្លែងធ្វើការចំនួន ៥ ៥២៨ នាក់ និងស្រី ២ ៥៥៥ នាក់ និងគ្រោះថ្នាក់ពេលធ្វើដំណើរចំនួន ៧ ១១៧ នាក់ ស្រី ៤ ០០៥ នាក់។

លោករដ្ឋលេខាធិការបានបន្តថា មានកត្តាសំខាន់ ៣ ជំរុញឱ្យមានករណីគ្រោះថ្នាក់ចរាចរណ៍កើតឡើង ក្នុងនោះរួមមាន កត្តាមនុស្ស យានយន្ត និងកត្តាផ្លូវ។ គ្រោះថ្នាក់ចរាចរណ៍ភាគច្រើនបង្កឡើងពីកត្តាមនុស្សដូចជាបើកបរលើសល្បឿនកំណត់ ការមិនគោរពសិទ្ធិអាទិភាព មិនយោគយល់គ្នា ការមិនប្រកាន់ស្តាំ មិនគោរពភ្លើង និងស្លាកសញ្ញាចរាចរណ៍ ការវ៉ាជែងការដឹកកម្មករលើសទម្ងន់ និងការបើកបរក្រោមឥទ្ធិពល នៃគ្រឿងស្រវឹង។

គួរបញ្ជាក់ថា សម្រាប់ក្នុងឆ្នាំ ២០២៤ ក្រុមការងារ ស.ផ.ក បានរៀបចំពិធីអប់រំផ្សព្វផ្សាយ “ច្បាប់ស្តីពីចរាចរណ៍ផ្លូវគោកសុវត្ថិភាពក្នុងការធ្វើដំណើរ និងសុវត្ថិភាពលើមធ្យោបាយដឹកជញ្ជូន ជូនអ្នកបើកបរយានយន្តដឹកកម្មករ-និយោជិត និងកម្មករ-និយោជិត” នៅតាមបណ្តាខេត្តមួយចំនួនរួមមាន ខេត្តស្វាយរៀង ខេត្តកំពង់ស្ពឺ ខេត្តកំពង់ឆ្នាំង ខេត្តកណ្តាល ខេត្តតាកែវ ខេត្តព្រះសីហនុ ខេត្តកំពង់ចាម ខេត្តបន្ទាយមានជ័យ និងខេត្តកំពត ដែលជាខេត្តទី ៩ មានអ្នកចូលរួមសរុបប្រមាណចំនួន ៤ ៣០០ នាក់។ ដោយឡែកនៅតាមបណ្ដាខេត្តផ្សេងៗ ទៀត នឹងបន្តចុះផ្សព្វផ្សាយជាបន្តបន្ទាប់៕

អត្ថបទ ៖ សំអឿន