សម្ដេចធិបតី ថា សង្គ្រាម ជាគ្រោះមហន្តរាយបង្កដោយមនុស្សដ៏គួរឱ្យភ័យខ្លាច

ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានចាត់ទុកចេតនាទាញសង្គមជាតិឱ្យធ្លាក់ចូលក្នុងភ្នក់ភ្លើងសង្គ្រាម គឺជាគ្រោះមហន្តរាយបង្កឡើងដោយមនុស្សដ៏គួរឱ្យភ័យខ្លាចបំផុត ដែលទាមទារឱ្យរួមគ្នាទប់ស្កាត់ជាដាច់ខាត។

សម្ដេចធិបតី ហ៊ុន ម៉ាណែត បានអំពាវនាវដល់សាធារណជន និងភាគីពាក់ព័ន្ធបន្តចូលរួមជាមួយរាជរដ្ឋាភិបាលនៅក្នុងសកម្មភាពគ្រប់គ្រងគ្រោះមហន្តរាយ រួមគ្នាទប់ស្កាត់រាល់ចេតនាបង្កចលាចលសង្គម ការញុះញង់បង្កអស្ថេរភាព បំផ្លាញសន្តិភាព ក្នុងបំណងទាញសង្គមជាតិធ្លាក់ចូលក្នុងភ្នក់ភ្លើងសង្គ្រាមបង្ហូរឈាមជាថ្មីណាមួយ ដែលជា «គ្រោះមហន្តរាយបង្កដោយមនុស្សដ៏គួរឱ្យភ័យខ្លាច» តាមរយៈល្បិចកលដ៏ខ្មៅកខ្វក់របស់ក្រុមជនឧទ្ទាមក្រៅច្បាប់មួយក្តាប់តូច។

ការអំពាវនាវរបស់ប្រមុខរាជរដ្ឋាភិបាល ធ្វើឡើងតាមរយៈសារលិខិតមួយច្បាប់ផ្ញើជនរួមជាតិ ក្នុងឱកាសទិវាជាតិគ្រប់គ្រងគ្រោះមហន្តរាយ ថ្ងៃទី១៣ ខែតុលា ឆ្នាំ២០២៤។

សម្ដេចធិបតី បានរម្លឹក និងសម្ដែងការដឹងគុណចំពោះសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងបច្ចុប្បន្នជាប្រធានព្រឹទ្ធសភា ដែលសម្ដេចបានការពារយ៉ាងមោះមុតនូវសុខសន្តិភាព និងសុវត្ថិភាពជូនប្រជាជន ដឹកនាំគ្រប់គ្រងគ្រោះមហន្តរាយ ដោយប្រយុទ្ធ ទប់ស្កាត់ រក្សាការពារអាយុជីវិត និងជីវភាពប្រជាជនពីគ្រប់មុខសញ្ញាគ្រោះថ្នាក់ ដោយមិនទុកឱ្យប្រជាជនណាម្នាក់រងគ្រោះ ដោយមិនមានការទទួលខុសត្រូវឡើយ។

តាមសារលិខិតរបស់សម្តេចធិបតី ហ៊ុន ម៉ាណែត រាជរដ្ឋាភិបាលអាណត្តិថ្មីនេះនឹងបន្តផ្តល់អាទិភាពខ្ពស់លើការងារគ្រប់គ្រងគ្រោះមហន្តរាយ ដោយបន្តរក្សា និងបង្កើនភាពធន់នឹងគ្រោះមហន្តរាយ តាមរយៈការវិនិយោគជារួមទៅលើកំណើនសេដ្ឋកិច្ច សង្គមជាពហុវិស័យប្រកបដោយបរិយាប័ន្ន ដែលជាឆ្អឹងខ្នងនៃសមត្ថភាពជាតិក្នុងការគ្រប់គ្រង និងកាត់បន្ថយ ហានិភ័យគ្រោះមហន្តរាយ ជាមួយនឹងការវិនិយោគទៅលើវិស័យជួរមុខក្នុងការកសាងសមត្ថភាពឆ្លើយតបនៅគ្រប់កម្រិត ទាន់ពេលវេលា មានប្រសិទ្ធភាព និងអាចស្តារឡើងវិញបានយ៉ាងឆាប់រហ័ស ក្រោយគ្រោះមហន្តរាយ។  

សម្តេចធិបតី ហ៊ុន ម៉ាណែត ប្រធានគណៈកម្មាធិការជាតិគ្រប់គ្រងគ្រោះមហន្តរាយ គូសបញ្ជាក់ថា ការគ្រប់គ្រងគ្រោះមហន្តរាយ ជាការងារពហុវិស័យ ជាការងារប្រទាក់ក្រឡាពាក់ព័ន្ធស្ទើរគ្រប់ទិដ្ឋភាពសេដ្ឋកិច្ច សង្គមរបស់ប្រទេសជាតិ ដែលត្រូវធ្វើឡើងប្រកបដោយបរិយាបន្ន។ ហេតុនេះ គ្រប់វិស័យសុទ្ធតែជាប់ពាក់ព័ន្ធ និងត្រូវរួមចំណែកដោយផ្ទាល់ ឬដោយប្រយោលនៅក្នុងសកម្មភាពនៃការកាត់បន្ថយហានិភ័យគ្រោះមហន្តរាយ។

សម្តេចធិបតី ក៏បានអំពាវនាវឱ្យបង្កើនការយល់ដឹងអំពីមុខសញ្ញាគ្រោះថ្នាក់ ការអប់រំផ្សព្វផ្សាយ ព័ត៌មានព្យាករណ៍ និងការប្រកាសឱ្យដឹងមុន និងចូលរួមក្នុងសកម្មភាពទប់ស្កាត់ ការពារ និងកាត់បន្ថយគ្រោះមហន្តរាយ ក៏ដូចជារួមចំណែកជាមួយរាជរដ្ឋាភិបាលក្នុងការរក្សាកំណើនសេដ្ឋកិច្ច វិនិយោគ ពង្រីកមុខរបរដែលធន់ ដើម្បីរក្សាស្ថេរភាពជីវភាពរស់នៅជាមួយការរស់នៅស្អាត បរិស្ថានល្អ និងភូមិ-ឃុំមានសុវត្ថិភាព។

គួរជម្រាបថា ប្រធានបទសម្រាប់ទិវាអន្តរជាតិកាត់បន្ថយហានិភ័យគ្រោះមហន្តរាយ ឆ្នាំ២០២៤ គឺ«តួនាទីនៃការអប់រំក្នុងការការពារ និងផ្តល់អំណាចដល់កុមារសម្រាប់អនាគតដែលគ្មានគ្រោះមហន្តរាយ» សំដៅកាត់បន្ថយហានិភ័យ និងការបាត់បង់ជាសាកល។ រីឯ ទិវាអាស៊ានគ្រប់គ្រងគ្រោះមហន្តរាយ នឹងផ្តោតលើមូលបទ «ការកសាងអាស៊ានដែលមានភាពធន់ តាមរយៈការស្តារឡើងវិញបន្ទាប់ពីគ្រោះមហន្តរាយប្រកបដោយ បរិយាបន្ន និងនិរន្តរភាព»។ សម្រាប់កម្ពុជា ការគ្រប់គ្រងគ្រោះមហន្តរាយ គឺសំដៅការពារការអភិវឌ្ឍ និងសុខុមាលភាពរបស់ប្រជាជន ត្រូវបានលើកយកជាប្រធានបទសម្រាប់ទិវាជាតិគ្រប់គ្រងគ្រោះមហន្តរាយ ក្នុងឆ្នាំ២០២៤នេះ៕