សម្ដេច គុយ សុផល ត្រូវបានតែងតាំងជាប្រធានគណៈកម្មាធិការរៀបចំបុណ្យជាតិ-អន្តរជាតិ ជំនួសសម្ដេច គង់ សំអុល

សម្ដេចមហាមន្ត្រី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ត្រូវបានព្រះករុណា ព្រះបាទសម្ដេច ព្រះបរនាថ នរោត្តម សីហមុនី ចេញព្រះរាជក្រឹត្យ តែងតាំងជាប្រធានគណៈកម្មាធិការជាតិរៀបចំបុណ្យជាតិ-អន្តរជាតិ នាថ្ងៃទី១៤ ខែតុលា ឆ្នាំ២០២៤ នេះ។

តំណែងជាប្រធានគណៈកម្មាធិការជាតិរៀបចំបុណ្យជាតិ-អន្តរជាតិ របស់សម្ដេចមហាមន្ត្រី គុយ សុផល  គឺជំនួសតំណែងរបស់សម្ដេចចៅហ្វាវាំងវរវៀងជ័យអធិបតីស្រឹង្គា​ គង់ សំអុល ដែលទទួលមរណៈភាព កាលពីថ្ងៃទី០២ ខែកញ្ញា ឆ្នាំ២០២៤ ថ្មីៗកន្លងទៅនេះ។

ក្នុងព្រះរាជក្រឹត្យដដែល ព្រះមហាក្សត្រ ក៏បានតែងតាំង ទីប្រឹក្សារាជរដ្ឋាភិបាល អនុប្រធានអចិន្ត្រៃយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិ  លោក ឈិន កេតនា ឱ្យធ្វើជាអនុប្រធានអចិន្ត្រៃយ៍គណៈកម្មាធិការជាតិរៀបចំបុណ្យជាតិ-អន្តរជាតិ  បន្ថែមលើមុខងារបច្ចុប្បន្ន ដែលមានឋានៈនិងបុព្វសិទ្ធិស្មើឧបនាយករដ្ឋមន្ត្រី។

ចំណែក លោក សេង ទៀង រដ្ឋលេខាធិការទីស្ដីការគណៈរដ្ឋមន្ត្រីត្រូវបានតែងតាំងជាអនុប្រធានគណៈកម្មាធិការជាតិរៀបចំបុណ្យជាតិ-អន្តរជាតិ   មានឋានៈស្មើរដ្ឋមន្ត្រី។ លោក គង់ សោភ័ណ ដែលបច្ចុប្បន្នជារដ្ឋលេខាធិការក្រសួងមហាផ្ទៃ, លោក ជូ គឹមឡេង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ, លោក វង្ស ពិសេន អគ្គមេបញ្ជាការកងយោធពលខេមរភូមិន្ទ, លោក ស សុខា​ អគ្គមេបញ្ជាការ និងជាមេបញ្ជាការកងរាជអាវុធហត្ថ, លោក លោក ស ថេត អគ្គស្នងការនគរបាលជាតិ និងលោក សុក ខា  ត្រូវបានតែងតាំងជាអនុប្រធានគណៈកម្មាធិការជាតិរៀបចំបុណ្យជាតិ-អន្តរជាតិ៕

ដោយ៖ ង៉ិល ណារ៉ាត់