រដ្ឋបាលខេត្តព្រះសីហនុ ប្រកាសផ្អាកចាក់វ៉ាក់សាំង Sinopharm និងរង់ចាំវ៉ាក់សាំងបន្ថែម

រដ្ឋបាលខេត្តព្រះសីហនុ នៅយប់ថ្ងៃទី១០ ខែមីនា នេះបានចេញសេចក្ដីជូនដំណឹងថា ដោយវ៉ាក់សាំងប្រភេទ Sinopharm ត្រូវបានចាក់អស់គ្រប់ចំនួន ដូច្នេះរដ្ឋបាលខេត្តសូមផ្អាកការចាក់វ៉ាក់សាំងសម្រាប់ក្រុមមនុស្សដែលមានអាយុចាប់ពីអាយុ១៨ឆ្នាំ ដល់ ៥៩ឆ្នាំ (អ្នកថ្មី) មួយរយៈសិន ដោយត្រូវរង់ចាំការផ្តល់វ៉ាក់សាំងបន្ថែមទៀត ពីក្រសួងសុខាភិបាល។

រដ្ឋបាលខេត្តព្រះសីហនុ បានបញ្ជាក់ទៀតថា ចំពោះអ្នកដែលបានចាក់វ៉ាក់សាំងលើកទី១ ត្រូវបន្តចាក់លើកទី២ តាមកាលបរិច្ឆេទដែលបានកំណត់ដោយក្រុមគ្រូពេទ្យ។ 

រដ្ឋបាលខេត្តព្រះសីហនុ បានជូនដំណឹងផងដែរថា រដ្ឋបាលខេត្ត បានទទួលពីក្រសួងសុខាភិបាលនូវ វ៉ាក់សាំងប្រភេទ Sinopharm ចំនួន ៦,៦០០ដូស (dose) សម្រាប់ចាក់ជូនមនុស្សក្រុមអាយុ ១៨ឆ្នាំ ដល់ ៥៩ឆ្នាំ ស្មើចំនួនមនុស្ស ៣ ៣០០នាក់ ដែលនៅពេលនេះគឺបានចាក់គ្រប់ចំនួនវ៉ាក់សាំងដែលមានរួចហើយ។ ចំពោះវ៉ាក់សាំងប្រភេទ Astra Zeneca រដ្ឋបាលខេត្តទទួលបានចំនួន ១៥,០០០ដូស (dose) ហើយត្រូវចាក់ជូនដល់ក្រុមមនុស្សងាយរងគ្រោះមានអាយុ ចាប់ពី ៦០ឆ្នាំឡើង នៅបន្តដំណើរការជាធម្មតា៕

អត្ថបទ៖ ច័ន្ទ វីរៈ