តំណាងរាស្ត្រខេត្តរតនគិរី គ្រោងសាងសង់ស្ពានបណ្ដែតទឹកឆ្លងកាត់អូរ កាទឹង ដើម្បីសម្រួលការធ្វើដំណើររបស់ពលរដ្ឋ

លោក គិត ទ្រី អ្នកតំណាងរាស្ត្រមណ្ឌលរតនគិរី កាលពីព្រឹកថ្ងៃទី១៤ ខែតុលា ឆ្នាំ២០២៤ អមដំណើរដោយលោកម៉ា វិចិត្រ អភិបាលរងខេត្ត ប្រធានមន្ទីរអភិវឌ្ឈន៍ជនបទ រួមនិងអភិបាលស្រុក បានចុះពិនិត្យស្ថានភាពការធ្វើដំណើររបស់ប្រជាពលរដ្ឋដែលឆ្លងកាត់អូរ កាទឹង ដោយមធ្យាបាយជិះទូកដ ដែលត្រូវបង់ប្រាក់៥០០០រៀលក្នុងមួយថ្ងៃ។ ក្នុងដំណើរចុះពិនិត្យនេះ តំណាងរាស្ត្រមណ្ឌលរតនគិរី ក៏បានគ្រោងសាងសង់ស្ពានបណ្ដែតទឹកមួយប្រវែង១៤ម៉ែត្រ ទទឹង៤ម៉ែត្រដើម្បីសម្រួលដល់ការធ្វើដំណើររបស់ប្រជាពលរដ្ឋ។

លោក នូ ថេ អភិបាលស្រុកលំផាត់ បានបានឲ្យដឹងថា ស្ពានបណ្តែតទឹកដែលគ្រោងសាងសង់នេះ ស្ថិតនៅចំណុចចំណុចកណ្តាល (អូរកាទឹង) ភូមិសាមខា ក្នុងឃុំជ័យឧត្តម ស្រុកលំផាត់ និងភូមិនាងដី ក្នុងឃុំសិរីមង្គល ស្រុកកូនមុំ។លោកអភិបាលស្រុកបន្ថែមថា កន្លងមក ប្រជាពលរដ្ឋទាំង២ភូមិនេះ មិនមានស្ពានឆ្លងកាត់ទៅមកនោះទេ ហើយពួកគាត់ជិះទូកដចម្លងដោយចំណាយថវិកាជារៀងរាល់ថ្ងៃ។

ដោយសារមានការលំបាករបស់ប្រជាពលរដ្ឋ លោក គិត ទ្រី រួមនិងអាជ្ញាធរស្រុកទាំង២ បានឯកភាពស្នើសុំមករដ្ឋបាលខេត្ត ពិនិត្យលទ្ធភាពជួយសាងសង់ស្ពានបណ្តែតទឹកមានប្រវែង១៥ម៉ែត្រ ទទឹង៤ម៉ែត្រ ជូនប្រជាពលរដ្ឋទាំង២ភូមិ បានធ្វើដំណើរឆ្លងកាត់។

នៅក្នុងឱកាសនេះដែរ លោក គិត ទ្រី សំណូមពរដល់អាជ្ញាធរខេត្ត ធ្វើយ៉ាងណាសូមពន្លឿនគម្រោងស្ពានបណ្តែតទឹកដែលស្រុកទាំង២ បានស្នើសុំឲ្យបានលឿនបំផុត និងពេលដែលរដ្ឋបាលខេត្តអនុម័តហើយអាជ្ញាធរស្រុកទាំង២ត្រូវអនុវត្ត ការសាងសង់ភ្លាម ពីព្រោះស្ពាននេះពិតជាមានសារៈសំខាន់ណាស់ សម្រាប់ប្រជាពលរដ្ឋស្រុកទាំង២ សម្រួលក្នុងការដឹកកសិផល ឬដឹកអ្នកជំងឺ និងអ្នកមានផ្ទៃពោះឆាប់ទៅដល់មន្ទីរពេទ្យ មិនពិបាកក្នុងការធ្វើដំណើរតាមផ្លូវវាងឡើយ៕

អត្ថបទ៖ វុទ្ធឦសាន