ខេត្តសៀមរាប រៀបចំពិធីគោរពវិញ្ញាណក្ខ័ន្ត ព្រះបរមរតនកោដ្ឋ គម្រប់ខួប១២ឆ្នាំ ដើម្បីរំលឹកដឹងគុណដល់វីរភាពរបស់ទ្រង់

ថ្ងៃទី១៥ ខែ តុលា ឆ្នាំ២០២៤នេះ គឺជាថ្ងៃគម្រប់ខួប១២ឆ្នាំដែលព្រះករុណាសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាជាតិ ព្រះបរមរតនកោដ្ឋ បានយាងចូលទីវង្គត់។ នៅថ្ងៃនេះ សៀមរាបដូចជានៅរាជធានីភ្នំពេញ និងបណ្តាខេត្តផ្សេងៗទៀតដែរ បានរៀបចំពិធីគោរពវិញ្ញាណក្ខ័ន្ត ព្រះបរមរតនកោដ្ឋ ដើម្បីរំលឹកពីព្រះវីរៈសកម្មភាពរបស់ព្រះអង្គសម្រាប់ប្រទេសកម្ពុជា និងប្រជានុរាស្រ្តខ្មែរ។

លោក លី សំរិទ្ធ ប្រធានក្រុមប្រឹក្សាខេត្តសៀមរាប ព្រមទាំងលោកលោកស្រីជាសមាជិក សមាជិកាក្រុមប្រឹក្សាខេត្ត លោក លោកស្រី អភិបាលរងខេត្ត កងកម្លាំងប្រដាប់អាវុធទាំង៣ លោក លោកស្រី ថ្នាក់ដឹកនាំមន្ទីរ-អង្គភាព និងលោក លោកស្រី នាយក នាយករងទីចាត់ការ ប្រធាន-អនុប្រធានអង្គភាព ចំណុះសាលាខេត្ត បានអញ្ជើញចូលរួមក្នុងទិវាប្រារព្ធព្រះរាជពិធីគោរពព្រះវិញ្ញាណក្ខន្ធ ខួបគម្រប់ ១២ឆ្នាំ (១៥ តុលា ២០១២-១៥ តុលា ២០២៤) នៃការយាងសោយព្រះទិវង្គតរបស់ព្រះករុណា សម្តេចព្រះ នរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ នៅព្រះរាជដំណាក់ខេត្តសៀមរាប។

ដ្បិតវេលាកន្លងទៅ ១២ឆ្នាំហើយក្តី ប៉ុន្តែ ប្រជារាស្ត្រខ្មែរគ្រប់ស្រទាប់វណ្ណៈ នៅតែចងចាំជានិច្ចចំពោះគុណូបការៈ និងវីរភាពដ៏អស្ចារ្យរបស់ព្រះករុណា សម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ពិសេសការលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិ ក្នុងការទាមទារឯករាជ្យភាពពីអាណានិគមនិយមបារាំង នាថ្ងៃទី៩ ខែវិច្ឆិកា ឆ្នាំ១៩៥៣។ ដូច្នេះហើយ​ អាជ្ញាធររាជការ​ និងប្រជាពលរដ្ឋនៅក្នុងខេត្តសៀមរាប សូមថ្វាយមហាព្រះរាជកុសលព្រះវិញ្ញាណក្ខន្ធព្រះករុណា សម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ សូមស្តេចយាងបដិសន្ធិកិច្ច ព្រះបរមសុគតិភព កុំបីឃ្លៀងឃ្លាតឡើយ៕

ដោយ៖ គឿន វេត