ព័ត៌មានជាតិ

អភិបាលខេត្តបាត់ដំបងលើកឡើងថា ការរៀបចំបុណ្យអុំទូក ទាក់ទាញភ្ញៀវទេសចរ និងបង្កើនសេដ្ឋកិច្ចពលរដ្ឋ

បានផុស

៥ ខែ មុន

នៅ

ថ្ងៃពុធ ១៦ តុលា ២០២៤

ដោយ

នៅថ្ងៃទី១ នៃពិធីបុណ្យអុំ បណ្ដែតប្រទីប និងសំពះព្រះខែ អកអំបុក នៅខេត្តបាត់ដំបង លោក សុខ លូ អភិបាល នៃគណៈអភិបាលខេត្តបាត់ដំបង បានគូសបញ្ជាក់ថា ការរៀបចំពិធីបុណ្យអុំទូកជារៀងរាល់ឆ្នាំ គឺបានជួយទាក់ទាញទាំងភ្ញៀវទេសចរមកលេងកម្សាន្តផង និងជួយបង្កើនទាំងសេដ្ឋកិច្ចរបស់ពលរដ្ឋនៅក្នុងខេត្តបាត់ដំបងផ្ទាល់ផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ លូ បានលើកឡើងថា សម្រាប់បុណ្យអុំទូកក្នុងឆ្នាំ២០២៤ នេះ ក៏ដូចជាឆ្នាំមុនៗ គឺរដ្ឋបាលខេត្តបាត់ដំបង បានកំណត់យកថ្ងៃចេញព្រះវស្សា រៀបចំបុណ្យអុំទូក បណ្ដែតប្រទីប និងសំពះព្រះខែ អកអំបុក ដើម្បីជាការអបអរដល់ថ្ងៃចេញព្រះវស្សា។

ជាក់ស្ដែង ឆ្នាំនេះ បុណ្យអុំទូក ធ្វើឡើងត្រូវនឹងថ្ងៃទី១៦ ទី១៧ ខែតុលា ឆ្នាំ២០២៤ ដោយឆ្នាំនេះ ឃើញថា តាំងពីមិនទាន់ដល់ពេលប្រណាំងទូក គឺមានប្រជាពលរដ្ឋមកលេងកម្សាន្តជាច្រើនកុះករ។ និយាយជារួម តាមរយៈការរៀបចំបុណ្យអុំទូក គឺប្រាកដណាស់ មិនថាតែរដ្ឋបាលខេត្ត ក៏ដូចជាប្រជាពលរដ្ឋនៅក្នុងខេត្តទទួលបានអត្ថប្រយោជន៍ជាច្រើន។

ទី១ ពលរដ្ឋអាចទទួលបានចំណូលសេដ្ឋកិច្ចតាមរយៈការលក់ដូរ ក៏ដូចជាផ្ទះសំណាក់ សណ្ឋាគារ ភោជនីយដ្ឋាននានា តាមរយៈការមកលេងកម្សាន្តរបស់ពលរដ្ឋទាំងក្នុងខេត្ត និងនៅបណ្ដាខេត្ត ដែលជាហេតុជំរុញឱ្យការលក់ដូរ និងការកក់ បន្ទប់មានការកើនឡើង។

ទី២ ជួយទាក់ទាញភ្ញៀវទេសចរពីតាមបណ្ដាខេត្តនានាដែលចង់មកលេង និងស្គាល់ខេត្តបាត់ដំបង ជាហេតុអាចធ្វើឱ្យលើកក្រោយៗទៀត ទេសចរទាំងអស់នោះនឹងត្រឡប់មកលេងខេត្តបាត់ដំបងជាថ្មីម្តងទៀត ហើយនេះបានផ្តល់ផលប្រយោជន៍ជាច្រើនទាំងទេសចរណ៍ និងសេដ្ឋកិច្ចរបស់ខេត្តបន្តទៀត។

ទន្ទឹមនេះ សុខ លូ ក៏បានអំពាវនាវដល់ប្រជាពលរដ្ឋ ក្នុងខេត្ត ក៏ដូចជាអ្នកក្រៅខេត្ត រួមទាំងជនបរទេស អញ្ជើញមកលេងកម្សាន្តបុណ្យអុំទូក ដែលមានរយៈពេល ២ ថ្ងៃពេញ គឺនៅថ្ងៃទី១៦ និងទី១៧ ខែតុលា នេះ លើទឹកដីខេត្តបាត់ដំបង ដែលជាខេត្តពោរពេញទៅដោយសក្ដានុពលផ្នែកវិស័យកសិកម្ម និងទេសចរណ៍ដ៏សម្បូរបែប៕