ព័ត៌មានជាតិ

កម្ពុជា គ្រោងសហការជាមួយថៃ អនុញ្ញាតឱ្យពលករខ្មែរអាចធ្វើតេស្ត និងព្យាបាលជំងឺអេដស៍ ក្នុងមន្ទីរពេទ្យណាមួយនៅថៃ

បានផុស

៤ ខែ មុន

នៅ

ថ្ងៃពុធ ១៦ តុលា ២០២៤

ដោយ

លោក ឈឹម ឃិនដារ៉េត អគ្គលេខាធិការ នៃអាជ្ញាធរជាតិប្រយុទ្ធនឹងជំងឺអេដស៍ (NAA) បានមានប្រសាសន៍នៅរសៀលថ្ងៃទី ១៦ តុលា នេះថា នៅពេលខាងមុខ អ្នកបច្ចេកទេសកម្ពុជា នឹងពិភាក្សាជាមួយភាគីថៃ ដើម្បីអាចឈានទៅចុះអនុស្សរណៈ នៃការយោគយល់គ្នាមួយ ឱ្យពលករខ្មែរធ្វើការនៅប្រទេសថៃ អាចធ្វើតេស្ត និងទទួលការព្យាបាលជំងឺអេដស៍នៅមន្ទីរពេទ្យណាមួយនៅប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអគ្គលេខាធិការបានបន្តថា គម្រោងនេះបានធ្វើឡើងបន្ទាប់ពីកាលពីថ្ងៃទី ១១ ខែតុលា ឆ្នាំ ២០២៤ លោកទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានដឹកនាំប្រតិភូអន្តរក្រសួងរួមមាន អាជ្ញាធរជាតិប្រយុទ្ធនឹងជំងឺអេដស៍ ទីស្ដីការគណៈរដ្ឋមន្ត្រី និងក្រសួងសុខាភិបាល ចុះទស្សនកិច្ចសិក្សានៅមន្ទីរពេទ្យផ្តល់សេវាថែទាំ ព្យាបាលជំងឺអេដស៍ នៅតាមខេត្តថៃ ជាប់ខេត្តបន្ទាយមានជ័យ និងខេត្តប៉ៃលិន រួមមានខេត្តស្រះកែវ និងខេត្តចន្ទបុរី។

លោកអគ្គលេខាធិការបានបន្តទៀតថា គោលបំណង នៃទស្សនកិច្ចនេះ ដើម្បីសិក្សាស្វែងយល់អំពីការងារទប់ស្កាត់មេរោគអេដស៍ និងជំងឺអេដស៍នៅប្រទេសថៃ ជាពិសេសនៅខេត្តជាប់ព្រំដែនកម្ពុជា-ថៃ។

ស្វែងរកយន្តការកិច្ចសហការជាមួយភាគីថៃ ដើម្បីផ្តល់សេវាធ្វើតេស្តរកមេរោគអេដស៍ និងថែទាំ ព្យាបាលជំងឺអេដស៍ដល់ពលករខ្មែរដែលទៅធ្វើការនៅប្រទេសថៃ។

លោកអគ្គលេខាធិការបានបន្ថែមថា បន្ទាប់ពីទស្សនកិច្ចនេះ នឹងមានក្រុមការងារបច្ចេកទេសទៅពិភាក្សាលម្អិតអំពីរបៀបរបបសហប្រតិបត្តិការកម្ពុជា-ថៃ ដែលអាចឈានទៅចុះហត្ថលេខាលើ MOU នាពេលខាងមុខនេះ។

យ៉ាងណាក៏ដោយ លោកអគ្គលេខាធិការ បានបន្ថែមឱ្យដឹងទៀតថា «រហូតមកដល់ពេលនេះ យើងមិនទាន់មានព័ត៌មានច្បាស់លាស់ផ្លូវការពីចំនួនពលករខ្មែរផ្ទុកមេរោគអេដស៍ដែលធ្វើការក្នុងប្រទេសនៅឡើយទេ ហើយករណីនេះ ក៏ជាកម្មវត្ថុមួយ នៃដំណើរទស្សនកិច្ចរបស់ប្រតិភូអន្តរក្រសួងផងដែរ»។

គួរបញ្ជាក់ថា បច្ចុប្បន្នមានពលករខ្មែរកំពុងស្នាក់នៅ និងធ្វើការនៅប្រទេសថៃ ចំនួន ១ ២៦២ ១៧៥ នាក់ ស្រី ៥០៨ ៦៤៦ នាក់ ជាមធ្យមទទួលបានប្រាក់ខែ ៤០០ ដុល្លារ ក្នុង ១ ខែ និងបានផ្ញើថវិកាមកក្រុមគ្រួសារវិញប្រមាណជាង ២ ពាន់លានដុល្លារ ក្នុង ១ ឆ្នាំ បានចូលរួមលើកស្ទួយសេដ្ឋកិច្ចគ្រួសារ ក៏ដូចជាសេដ្ឋកិច្ចជាតិកាន់តែរីកចម្រើនបន្ថែមទៀត៕

អត្ថបទ ៖ សំអឿន