ព័ត៌មានជាតិ

អភិបាលខណ្ឌកំបូល ដឹកនាំកម្លាំងចុះស្ដារលូ និងដាក់ម៉ាស៊ីនបូមទឹកលិច ក្នុងមូលដ្ឋាន

បានផុស

៤ ខែ មុន

នៅ

ថ្ងៃព្រហស្បតិ៍ ១៧ តុលា ២០២៤

ដោយ

អភិបាលខណ្ឌកំបូល ដឹកនាំកម្លាំងចុះស្ដារលូ និងដាក់ម៉ាស៊ីនបូមទឹកលិចក្នុងមូលដ្ឋាន ក្រោយជំនន់ទឹកភ្លៀងជាបន្តបន្ទាប់មិនស្រក ធ្វើឲ្យជន់លិចផ្លូវមួយចំនួនក្នុងខណ្ឌកំបូល ពិបាកដល់ប្រជាពលរដ្ឋធ្វើដំណើរ ឬ ប្រកបមុខរបរទទួលទាន ក៏ដូចជាសិស្សានុសិស្សទៅសាលារៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីរសៀលថ្ងៃទី ១៦ ខែតុលា ឆ្នាំ ២០២៤ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានដឹកនាំមន្ត្រីរដ្ឋបាលខណ្ឌ និងសង្កាត់ ចុះស្តារលូ និងដាក់ម៉ាស៊ីនបូមទឹកលិចផ្លូវក្នុងភូមិ ស្ថិតនៅភូមិកន្ទោកជើង សង្កាត់កន្ទោក និងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។

ជុំវិញបញ្ហាខាងលើ លោកអភិបាលខណ្ឌកំបូល ក្រោយទទួលព័ត៌មាន បានដឹកនាំមន្ត្រីក្រោមឱវាទ ចុះពិនិត្យ និងដោះស្រាយភ្លាមៗ ផងដែរ។

ជាមួយគ្នានេះ លោកអភិបាលខណ្ឌកំបូល បញ្ជាក់ប្រាប់ កម្ពុជាថ្មី ថា ទីតាំងខាងលើនេះ ទឹកលិចខ្លាំង ដោយសារប៉ុន្មានថ្ងៃនេះ មានភ្លៀងធ្លាក់ជាបន្តបន្ទាប់ និងប្រជាពលរដ្ឋខ្លះបានយកវត្ថុរឹងបាំងមាត់អណ្ដូងលូ ជាហេតុធ្វើឲ្យមានការស្ទះទឹក។

លោកអភិបាលខណ្ឌកំបូល បញ្ជាក់បន្ថែមថា ប្រព័ន្ធលំហូរទឹកនៅតំបន់នោះទាប ហើយត្រូវហូរកាត់ផ្លូវជាតិ ៣ ឆ្លងទៅមូលដ្ឋានខណ្ឌដង្កោ។ បច្ចុប្បន្ន រដ្ឋបាលខណ្ឌ កំពុងដាក់ម៉ាស៊ីនបូមពន្លឿន និងស្តារអណ្ដូងទៅ ដើម្បីឲ្យទឹកស្រកទាន់ពេលវេលា៕

អត្ថបទ ៖ សំណាង