ព័ត៌មានជាតិ

ពលរដ្ឋភូមិបាគូ ស្នើអាជ្ញាធរពន្លឿនការស្ថាបនាផ្លូវ ២ ខ្សែ កំពុងខូចខាតខ្លាំង

បានផុស

២៤ វិនាទី មុន

នៅ

ថ្ងៃព្រហស្បតិ៍ ១៧ តុលា ២០២៤

ដោយ

ប្រជាពលរដ្ឋបានទទូចស្នើសុំអាជ្ញាធរសង្កាត់ដង្កោ សូមមេត្តាជួយពន្លឿន និងបង្ហើយការងារចាក់បេតុងផ្លូវចំនួន ០២ ខ្សែ ក្នុងភូមិបាគូ ដែលកំពុងខូចខាតយ៉ាងខ្លាំងដោយសារមានការស្ថាបនាប្រព័ន្ធលូ ដើម្បីរំដោះទឹកជន់លិចនារដូវវស្សាឲ្យរួចរាល់ផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងផ្លូវចំនួន ០២ ខ្សែ ដែលកំពុងរងការខូចខាតដោយការកាយដាក់ប្រព័ន្ធលូបង្ហូរទឹក និង បញ្ចៀសទឹកនេះ ស្ថិតក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។

បើតាមការបញ្ជាក់ពី លោកស្រី សឿង សេរី ចៅសង្កាត់ដង្កោ បានប្រាប់ឲ្យដឹងថា ផ្លូវចំនួន ២ ខ្សែ ក្នុងភូមិបាគូនេះ អាជ្ញាធរបានប្រើប្រាស់ថវិកាអភិវឌ្ឍន៍សម្រាប់ឆ្នាំ ២០២៤ ធ្វើការផ្លាស់ប្ដូរប្រព័ន្ធលូថ្មី បណ្ដាលឲ្យមានការខូចខាតផ្លូវ។ ក្នុងនោះដែរ អាជ្ញាធរបានដាក់ដេញថ្លៃរួចហើយ ដើម្បីធ្វើការស្ថាបនាផ្លូវនេះឡើងវិញឲ្យបានស្អាត ប៉ុន្តែដោយសារតែខាងក្រុមហ៊ុនធ្វើផ្លូវសុំពន្យារពេល ជាហេតុធ្វើឲ្យប៉ះពាល់ដល់ប្រជាពលរដ្ឋពិបាកក្នុងការធ្វើដំណើរ។

ដោយឡែកបើតាម លោក ហេង បញ្ញា ជាប្រជាពលរដ្ឋរស់នៅក្នុងភូមិបានឲ្យដឹងថា បើមេឃមិនភ្លៀងរយៈពេល ២ ទៅ ៣ ថ្ងៃ ប្រជាពលរដ្ឋក្នុងភូមិអាចជិះម៉ូតូចេញចូលបានជាធម្មតា ប៉ុន្តែបើមានភ្លៀងធ្លាក់តែមួយមេពួកគាត់មិនអាចចេញចូលបាននោះទេ ដោយសារតែបែកភក់ជោកជាំពេញផ្លូវចូលភូមិតែម្ដង ហើយរថយន្ត និងម៉ូតូ ក៏មិនអាចធ្វើដំណើរបាននោះដែរ។

ប្រជាពលរដ្ឋម្នាក់ សុំមិនបញ្ចេញឈ្មោះ ដែលជាអ្នករស់នៅក្នុងភូមិខាងលើ ក៏បានលើកឡើងដូចលោក ហេង បញ្ញា ដែរ ពាក់ព័ន្ធនឹងបញ្ហាលំបាកក្នុងការធ្វើដំណើរ និងសំណូមដល់អាជ្ញាធរ សូមមេត្តាជួយពន្លឿនក្នុងការស្ថាបនាផ្លូវ ២ ខ្សែនេះ បន្តឡើងវិញផង កុំទុកចោលទាល់តែមេឃឈប់ភ្លៀង៕

អត្ថបទ ៖ ម៉េង