ព័ត៌មានជាតិ

អភិបាលខេត្តកំពតជំរុញឱ្យអាជ្ញាធរ និង មន្ត្រីជំនាញពាក់ព័ន្ធ បង្ការទប់ស្កាត់បង្ក្រាបរាល់បទល្មើសតាមមូលដ្ឋាន

បានផុស

៥ ខែ មុន

នៅ

ថ្ងៃព្រហស្បតិ៍ ១៧ តុលា ២០២៤

ដោយ

កំពត ៖ នាថ្ងៃទី ១៧ ខែតុលា ឆ្នាំ២០២៤ នេះលោក ម៉ៅ ធនិន អភិបាលខេត្តកំពត បានថ្លែងនៅកិច្ចប្រជុំគណៈបញ្ជាការឯកភាពរដ្ឋបាលខេត្តកំពត អភិបាលខេត្តក៏បានលើកឡើងថា នាពេលកន្លងមកស្ថានភាព សន្តិសុខសណ្តាប់ធ្នាប់នៅខេត្តកំពត មានភាពល្អប្រសើរបានមានភ្ញៀវទេសចរណ៍ចូលចិត្តមកលេងលម្ហែកម្សាន្តគួរឱ្យកក់ក្តៅក្នុងចិត្តដោយសារមន្ត្រីរាជការ អាជ្ញាធរ និងជំនាញកម្លាំងសមត្ថកិច្ចបានសហការគ្នាធ្វើការបានយ៉ាងល្អប្រសើរណាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីពង្រឹងដល់គោលនយោបាយភូមិឃុំមានសុវត្ថិភាព និង ដើម្បីឆ្លើយតបទៅនឹងតម្រូវការជីវភាពរស់នៅរបស់ប្រជាពលរដ្ឋ លោកអភិបាលខេត្តកំពត បានណែនាំដល់អាជ្ញាធរ មន្ត្រីជំនាញពាក់ព័ន្ធ កងកម្លាំង ឱ្យយកចិត្តទុកដាក់លើការងារ ៥ចំណុចសំខាន់ៗ ពិសេសត្រូវចូលរួមសហការ បង្ការ ទប់ស្កាត់ និងបង្ក្រាបរាល់បទល្មើសក្នុងមូលដ្ឋានរបស់ខ្លួន ឲ្យកាន់តែល្អប្រសើរ និងមានប្រសិទ្ធភាពខ្ពស់។

ប៉ុន្តែយ៉ាងណាក៏ដោយ ខេត្តកំពតក៏នៅការងារខ្វះចន្លោះមួយចំនួន ដែលទាមទាឲ្យមានការចូលរួមសហការគ្នា ធ្វើឲ្យកាន់តែល្អប្រសើរថែមទៀត ក្នុងនោះមានដូចជា៖ ១.ការងារការពារធនធានធម្មជាតិ ២.ការងារបង្ក្រាបបទល្មើសផ្សេងៗ (ពិសេសគ្រឿងញៀន និងល្បែងស៊ីសង) ៣.ការងារការពារបូរណភាពទឹកដីទាំងព្រំដែនទឹក និងគោក ៤.ការងារការពារវប្បធម៌ និងសម្បត្តិបេតិកភណ្ឌជាតិនៅតំបន់ភ្នំបូកគោ និង៥.ការងារតបណ្តាញទឹកភ្លើងជួនប្រជាពលរដ្ឋជាដើម ។

លោក ម៉ៅ ធនិន អភិបាលខេត្តកំពត បានបញ្ជាក់ថា បទល្មើសកើតឡើងនៅកន្លែងណា អាជ្ញាធរកន្លែងនោះ ត្រូវរាយការណ៍ និងមានចំណាត់ការ ដោះស្រាយទៅតាមនិតិវិធីច្បាប់ ដែលបានកំណត់។

នៅក្នុងកិច្ចប្រជុំនោះដែរ លោកម៉ៅ ធនិន អភិបាលខេត្តកំពតក៏បានជំរុញលើកទឹកចិត្តដល់ អាជ្ញាធរស្រុកជាប់ព្រំដែនប្រទេសជិតខាង ត្រូវមានស្មារតីប្រុងប្រយ័ត្ន និងឆន្ទៈខ្ពស់ គិតគូរអំពីផលប្រយោជន៍ជាតិ និងប្រជាជនជាធំ ពិសេសអាជ្ញាធរត្រូវណែនាំប្រជាពលរដ្ឋរស់នៅតាមខ្សែបន្ទាត់ព្រំដែនឱ្យយល់ដឹងច្បាស់ អំពីការងារព្រំដែន ហើយរួមគ្នាការពារឱ្យបានល្អ កុំឱ្យមានជាតិសាសន៍ដទៃ មកជួល ឬ មកអាស្រ័យផល លើដីកម្ពុជាជាដាច់ខាត៕

ដោយ ៖ សឹង រ៉ាត់