ថ្នាក់ដឹកនាំសភាកម្ពុជា ឡាវ វៀតណាម ជួបជជែកគ្នាពីការពង្រឹងពង្រីកកិច្ចសហប្រតិបត្តិការតាមព្រំដែន

ឱកាសចូលរួមមហាសន្និបាតអាយប៉ាលើកទី៤៥ នៅរដ្ឋធានីវៀងចន្ទន៍ សម្តេចរដ្ឋសភាធិបតី ឃួន សុដារី បានអញ្ជើញទទួលទានអាហារពេលព្រឹក និងពិភាក្សាការងារក្រៅផ្លូវការជាមួយប្រធានសភាឡាវ និងវៀតណាម ដែលនេះជាទម្លាប់របស់ថ្នាក់ដឹកនាំនៃប្រទេសទាំងបី នៅពេលជួបគ្នា។ ថ្នាក់ដឹកនាំសភាកម្ពុជា ឡាវ វៀតណាម បានជជែកគ្នាពីការពង្រឹងពង្រីកកិច្ចសហប្រតិបត្តិការតាមព្រំដែន។

សម្តេច ឃួន សុដារី ប្រធានរដ្ឋសភានៃកម្ពុជា បានអរគុណចំពោះលោក សាយសំផន ភុមវិហាន ប្រធានរដ្ឋសភាឡាវ ដែលបានចំណាយពេលវេលាដ៏មមាញឹកអំឡុងពេលរៀបចំមហាសន្និបាតអន្ដរសភាអាស៊ានលើកទី៤៥ មករៀបចំជំនួបត្រីភាគីក្រៅផ្លូវការរវាងថ្នាក់ដឹកនាំសភានៃប្រទេសទាំងបី នៅព្រឹកថ្ងៃ១៨ ខែតុលាឆ្នាំ២០២៤ ក្នុងគោលដៅពង្រឹងសាមគ្គីភាព មិត្តភាព និងកិច្ចសហប្រត្តិការគ្រប់ជ្រុងជ្រោយរវាងរដ្ឋសភា និងប្រជាជននៃប្រទេសទាំងបី។ 

សម្តេចប្រធានរដ្ឋសភា បានគូសបញ្ជាក់ថា កិច្ចសហប្រតិបត្តិការ និងមិត្តភាពជាប្រពៃណី ជាទ្រព្យសម្បត្តិដ៏មានតម្លៃនិងជាមូលដ្ឋានគ្រឹះនៃទំនាក់ទំនងសហប្រតិបត្តិការលើគ្រប់វិស័យ ហើយបានផ្តល់ជាលទ្ធផលជាវិជ្ជមានដល់ប្រជាជាតិ និងប្រជាជនទាំងបី និងក្នុងតំបន់។ ថ្នាក់ដឹកនាំនៃរដ្ឋសភា នៃប្រទេសទាំងបីបានប្តេជ្ញាចិត្តរួមគ្នាបន្តពូនជ្រុំ និងពង្រឹងមិត្តភាពជាប្រពៃណី និងភាពជាដៃគូយុទ្ធសាស្រ្តគ្រប់ជ្រុងជ្រោយ និងយូរអង្វែងនេះ ដោយយកប្រជាជនជាស្នូល។

កិច្ចសហប្រតិបត្តិការប្រទេសទំាងបីមិនត្រឹមផ្តល់ផលប្រយោជន៍ដល់ប្រជាជនកម្ពុជា ឡាវ និងវៀតណាមប៉ុណ្ណោះទេ តែជាការសំខាន់នៅក្នុងការរក្សាបានសុខសន្តិភាព ស្ថិរភាពសង្គមនិងការលើកកម្ពស់ពហុនិយម នៅក្នុងបរិបទសកលលោកកំពុងប្រឈមនឹងស្ថានការណ៍ដ៏ស្មុគស្មាញ ប្រែប្រួលយ៉ាងឆាប់រហ័ស សណ្តាប់ធ្នាប់សកលបានធ្លាក់ចុះ សង្រ្គាមបានផ្ទុះឡើងជាបន្តបន្ទាប់នោះ។ នេះជាការបន្ថែមរបស់សម្ដេចប្រធានរដ្ឋសភាកម្ពុជា។

ថ្នាក់ដឹកនាំសភាកម្ពុជា ឡាវ និងវៀតណាម បានជជែកគ្នាពីការពង្រឹងពង្រីកកិច្ចសហប្រតិបត្តិការរវាងប្រទេសទាំងបីលើបញ្ហាសន្តិសុខ ប្រយុទ្ធប្រឆាំងបទល្មើសឆ្លងដែន វិស័យពាណិជ្ជកម្ម និងនីតិវីធីសម្រួលទំនិញឆ្លងកាត់ព្រំដែននៃប្រទេសទាំងបីឱ្យបានកាន់តែល្អឡើងថែមទៀត។ ដោយឡែក វិស័យទេសចរណ៍ ក៏បានប្តេជ្ញាថា នឹងជំរុញអនុវត្ដបន្ថែមទៀតនូវ «ប្រទេសបី គោលដៅមួយ» ដើម្បីជួយសម្រួលដល់អ្នកទេសចរអាចធ្វើទេសចរណ៍ជាកញ្ចប់រវាងទាំងបីប្រទេសបានកាន់ តែងាយស្រួល។

ថ្នាក់ដឹកនាំរដ្ឋសភាប្រទេសទាំងបី សង្ឃឹមថានឹងមានជំនួបអាហារពេលព្រឹកត្រីភាគីបន្តពេលក្រោយទៀត។ ជំនួបអាហារពេលព្រឹកក្រៅផ្លូវការ និងមិត្តភាពនេះ បានប្រព្រឹត្តទៅ ក្នុងបរិយាកាសស្និទ្ធស្នាល ភាតរភាព ការគោរពនិងការយល់គ្នាទៅវិញទៅមក៕