រដ្ឋាភិបាលចែកស្រូវពូជ ៤៦៧ តោន ដល់កសិករ ដែល​រងផលប៉ះពាល់ដោយសារគ្រោះទឹកជំនន់

លោក ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី ១៨ ខែតុលា ឆ្នាំ ២០២៤ បានចុះចែកស្រូវពូជជូនដល់ប្រជាពលរដ្ឋដែលរងផលប៉ះពាល់ដោយសារគ្រោះទឹកជំនន់ចំនួន ៤៦៧ តោន ដល់កសិករមកពី ៧ ក្រុង/ស្រុក នៅសាលាស្រុកកំពង់ស្វាយ​ ខេត្តកំពង់ធំ។

លោករដ្ឋមន្រ្តី​បានពាំនាំនូវការសួរសុខទុក្ខ និងការយកចិត្តទុកដាក់ពីសំណាក់ប្រមុខរាជរដ្ឋាភិបាល សម្ដេចមហាបវរធិបតីនាយករដ្ឋមន្ដ្រី ជូនដល់បងប្អូនប្រជាកសិករដែលរងផលប៉ះពាល់ដោយសារគ្រោះទឹកជំនន់។​

លេីសពីនេះ​លោកបានផ្តល់អនុសាសន៍ឱ្យបងប្អូនប្រជាកសិករចូលរួមសហការគិតគូរឱ្យបានវែងឆ្ងាយ​ ទទួលស្តាប់នូវការណែនាំរបស់ក្រសួងស្ថាប័នពាក់ព័ន្ធ​ពីការព្យាករណ៍ធាតុអាកាស បំរែបំរួលអាកាសធាតុ​ ដេីម្បីកាត់បន្ថយនូវផលប៉ះពាល់​ ដោយមិនប្រថុយធ្វេីស្រែទាំងមានហានិភ័យខ្ពស់។

បេីតាម​ លោករដ្ឋមន្រ្តី​ គោលដៅរបស់រាជរដ្ឋាភិបាល​គឺជួយបងប្អូនប្រជាកសិករ​ឱ្យមានសន្តិសុខស្បៀង​ និងមានប្រសិទ្ធ​ភាពសេដ្ឋកិច្ច​ ពោលគឺមានហូបគ្រប់គ្រាន់​ និងមានបាន​ ដោយរាជរដ្ឋាភិបាល​មិនទុកនរណាម្នាក់ចោលនោះទេ​ និងតែង​តែយកចិត្តទុកដាក់​ ផ្តល់ជំនួយ​ ព្រមទាំងជួយស្តារនូវផលប៉ះពាល់កន្លងមក។

បើតាមលោក រដ្ឋមន្រ្តី​ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា រាជរដ្ឋាភិបាលបានដាក់ចេញនូវកម្មវិធីគោលនយោបាយអាទិភាព ក្នុងការរក្សាស្ថេរភាពថ្លៃកសិផល កាត់បន្ថយថ្លៃដេីមផលិត​ ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ និងការរៀបចំសហគមន៍កសិកម្មទំនើប ដើម្បីជួយគាំទ្រលើផ្នែកបច្ចេកទេស ការផ្តល់ព័ត៌មានការប្រឹក្សាយោបល់ និងជួយដោះស្រាយបញ្ហាពាក់ព័ន្ធនឹងការងារកសិកម្មដល់កសិករក្នុងគោលបំណងបង្កើនផលិតភាពកសិកម្ម ជំរុញជីវភាព ធានាបាននូវសន្តិសុខ និងសុវត្តិភាពស្បៀងផងដែរ៕