រដ្ឋមន្ត្រីក្រសួង ធនធានទឹក និងឧតុនិយម ដឹកនាំមន្ត្រីជំនាញ​ ចុះ​ពិនិត្យ​ស្ថានភាពបាក់ស្រុតច្រាំងទន្លេ នៅស្រុកស្រីសន្ធរ

កំពង់ចាម​ ៖​ រដ្ឋមន្ត្រីក្រសួង ធនធានទឹក និងឧតុនិយម និងអភិបាលខេត្តកំពង់ចាម​ បានដឹកនាំមន្ត្រីជំនាញ​ ចុះពិនិត្យស្ថានភាពបាក់ស្រុតច្រាំងទន្លេ នៅស្រុកស្រីសន្ធរ។

នារសៀលថ្ងៃទី១៩ ខែតុលា ឆ្នាំ២០២៤ លោក អ៊ុន ចាន់ដា អភិបាលខេត្តកំពង់ចាម បានដឹកនាំ ក្រុមការងារខេត្ត មន្ត្រីបច្ចេកទេស និងអាជ្ញាធរ​ពាក់ព័ន្ធ អញ្ជើញអមដំណើរ លោក​រដ្ឋមន្ត្រី ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ចុះពិនិត្យស្ថានភាពច្រាំង ដែលបានបាក់ស្រុត ចូលទៅក្នុងទន្លេមេគង្គ ស្ថិតនៅចំណុចភូមិមាន់ដប់លើ (មុខវត្តមាត់ដប់ ) ឃុំមានជ័យ ស្រុកស្រីសន្ធរ។

តាម​ការ​បញ្ជាក់ពី​អាជ្ញាធរ​មូលដ្ឋាន បាន​ឱ្យដឹង​ថា ច្រាំងទន្លេដែលបានបាក់ស្រុត ខាងលើ មានបណ្ដោយប្រវែងប្រមាណ ៨០ម៉ែត្រ និង​បាន​បាក់ស្រុតចូលក្នុងទន្លេ ទទឹងប្រវែង១៥ ទៅ២០ម៉ែត្រ។  បន្ទាប់ពី ​លោករដ្ឋមន្ត្រី និង​លោក​អភិបាលខេត្ត បានបន្តចុះពិនិត្យច្រាំងទន្លេ ដែលបានបាក់ស្រុត នាពេលកន្លង ស្ថិតនៅព្រំប្រទល់ ឃុំមានជ័យ ដែលនៅសល់ចម្ងាយពីផ្លូវ70B ប្រវែង២ម៉ែត្រ ទៅ៣ម៉ែត្រប៉ុណ្ណោះ។

ឆ្លៀត​ក្នុង​ឱកាស​នោះ លោក​រដ្ឋមន្ត្រី ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម​ បានចាត់ឲ្យមន្ត្រីបច្ចេកទេសក្រសួង សហការជាមួយអាជ្ញាធរខេត្តកំពង់ចាម ដើម្បីសិក្សាលទ្ធភាពក្នុងការស្តារ និងជួសជុលច្រាំងទន្លេឡើងវិញ។ ហើយ​លោក​រដ្ឋមន្ត្រី បាន​ស្នើ​ឱ្យ​បងប្អូន​ប្រជាពលរដ្ឋ​នៅ​តំបន់​នេះត្រូវ​ចេះសហការ​ជាអាជ្ញាធរមូលដ្ឋាន​ក្នុងការ​រាយការណ៍​មក​មន្ត្រីជំនាញ​នៅពេលមានគ្រោះមហន្តរាយបាក់ស្រុតច្រាំងទន្លេបង្កឲ្យប៉ះពាល់ដល់លំនៅដ្ឋាន​ និងហេដ្ឋារចនាសម្ព័ន្ធនានាក្នុងមូលដ្ឋាន៕

អត្ថបទ​និង​រូបភាព​ ៖​ ឡេក​ ចាន់ពេជ្រ​