ព័ត៌មានជាតិ

ក្រសួងការងារ ប្រកាសពីតម្រូវការកម្លាំងពលកម្មក្នុងស្រុកជាង ៥ ម៉ឺនកន្លែង នៅទូទាំងប្រទេស បម្រើលើវិស័យធំៗ ៣

បានផុស

២៣ វិនាទី មុន

នៅ

ថ្ងៃចន្ទ ២១ តុលា ២០២៤

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសពីតម្រូវការកម្លាំងពលកម្មក្នុងស្រុកចំនួន ៥៥ ៩៨៩ កន្លែង នៅទូទាំងប្រទេស សម្រាប់បម្រើទៅលើវិស័យធំៗ ៣ រួមមាន វិស័យឧស្សាហកម្ម សេវាកម្ម និងកសិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងការងារ បានឱ្យដឹងថា កម្លាំងពលកម្មចំនួន ៥៥ ៩៨៩ កន្លែង ក្នុងនោះ វិស័យឧស្សាហកម្មមានតម្រូវការចំនួន ៤២ ៩៤៤ កន្លែង វិស័យសេវាកម្មមានចំនួន ៣ ៨២២ កន្លែង និងវិស័យកសិកម្មមានចំនួន ៩ ២២៣ កន្លែង។

ក្នុងនោះនៅខេត្តរតនគីរីមានតម្រូវការផ្នែកកសិកម្មចំនួន ៤ ៣៦៣ កន្លែង ខេត្តកំពង់ស្ពឺមានតម្រូវការកម្លាំងពលកម្មផ្នែកឧស្សាហកម្ម ១២ ៥៦៣ កន្លែង។ ខេត្តកំពង់ឆ្នាំងមានតម្រូវការផ្នែកឧស្សាហកម្ម ១០ ២០០ កន្លែង។ រាជធានីភ្នំពេញមាន ១០ ៣២០ កន្លែង ក្នុងនោះផ្នែកឧស្សាហកម្ម ៨ ២៧៥ កន្លែង និងផ្នែកសេវាកម្ម ២ ០៤៥ កន្លែង។ខេត្តស្វាយរៀងមានចំនួន ៣ ៩១៤ កន្លែង ក្នុងនោះវិស័យឧស្សាហកម្មមាន ៣ ៧៥១ កន្លែង និងសេវាកម្ម ១៦៣ កន្លែង។ ខេត្តកណ្តាលមានតម្រូវការកម្លាំងពលកម្ម ៤ ២៥៣ កន្លែង ក្នុងនោះផ្នែកឧស្សាហកម្ម ៤ ២១១ កន្លែង និងផ្នែកសេវាកម្ម ៤២ កន្លែង។ ខេត្តតាកែវមាន ១ ៨៩០ កន្លែង ក្នុងនោះវិស័យឧស្សាហកម្ម ១ ៨៧០ កន្លែង សេវាកម្ម ១ កន្លែង និងកសិកម្ម ១៩ កន្លែង។ ខេត្តក្រចេះមានតម្រូវការកម្លាំងពលកម្ម ២ ៥០៦ កន្លែង ក្នុងនោះផ្នែកសេវាកម្ម ៦ កន្លែង និងកសិកម្ម ២ ៥០០ កន្លែង។ ខេត្តស្ទឹងត្រែងមានតម្រូវការ ២ ៣១៨ កន្លែង ក្នុងនោះផ្នែកសេវាកម្ម ១៦ កន្លែង និងកសិកម្ម ២ ៣០៣ កន្លែង និងខេត្តផ្សេងៗ មាន ២ ២៦២ កន្លែង ក្នុងនោះឧស្សាហកម្មមាន ១ ១៦៧ កន្លែង សេវាកម្ម ១ ០៥៦ កន្លែង និងកសិកម្ម ៣៩ កន្លែង។

ក្រសួងការងារ បានបន្តទៀតថា កម្លាំងពលកម្មជិត ៥ ម៉ឺន ៦ ពាន់កន្លែង នឹងត្រូវបែងចែកទៅតាមប្រភេទមុខរបរចំនួន ១០ រួមមាន អ្នកបញ្ជាម៉ាស៊ីនដេរចំនួន ៣៥ ៩២២ កន្លែង កម្មករចម្ការដំណាំចំនួន ៨ ៣៨០ កន្លែង កម្មករក្នុងផលិតកម្មចំនួន ១ ៣៤៣ កន្លែង អ្នកត្រួតពិនិត្យដំណើរការផលិតលោហធាតុ ១ ២៣១ កន្លែង កម្មករខ្ចប់វេចដោយដៃ ៨២៧ កន្លែង អ្នកធ្វើស្បែកជើង និងអ្នកធ្វើការពាក់ព័ន្ធ ៨០០ កន្លែង មន្ត្រីឥណទាន និងកម្ចីប្រាក់ ៧៩៦ កន្លែង អ្នកដំឡើងដែលមិនបានធ្វើចំណាត់ថ្នាក់ ៦០០ កន្លែង អ្នកជួសជុល និងអ្នកបញ្ជាឧបករណ៍ម៉ាស៊ីនឈើ ៥០៤ កន្លែង អ្នកបញ្ជាម៉ាស៊ីនកន្លែងផលិតផលិតផលធ្វើពីក្រណាត់ និងរោមសត្វ ៥០០ កន្លែង អ្នកធ្វើការផ្នែកសិប្បកម្មខាងសម្ភារៈវាយនភណ្ឌធ្វើពីស្បែក ៥០០ កន្លែង និងមុខរបរផ្សេងៗ ៥ ០៨៦ កន្លែង។

ក្រសួងបានណែនាំដល់យុវជន សិស្ស និស្សិត មេត្តាទាក់ទងទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ តាមរយៈទូរស័ព្ទ ១២៩៧ ឬ ១២៨៦ ឬ តេលេក្រាម និង CoolApp លេខ ០៧៧ ២៣ ២៣ ៧៨ ដើម្បីចុះឈ្មោះ និងសម្ភាសភ្លាមៗ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់ប្រជាពលរដ្ឋខ្មែរទាំងអស់ស្វែងរកឱកាសការងារធ្វើនៅក្នុងស្រុក ជៀសវាងទៅធ្វើការ

ដោយខុសច្បាប់នៅក្រៅប្រទេសតាមរយៈមេខ្យល់នាំឱ្យបាត់បង់អត្ថប្រយោជន៍ ឬមានការរំលោភបំពានផ្លូវច្បាប់ ពិសេសប្រឈមនឹងការចាប់ខ្លួនពីសំណាក់អាជ្ញាធរបរទេសទៀតផង។

លោកបានបន្តថា ការស្វែងរកការងារធ្វើនៅក្នុងស្រុកពុំមានការលំបាកនោះទេ ពីព្រោះឱកាសការងារនៅក្នុងស្រុកត្រូវបានប្រកាសជារៀងរាល់សប្ដាហ៍តាមរយៈទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ ទាំងនៅលើបណ្ដាញសង្គម និងនៅតាមរោងចក្រ សហគ្រាស ក៏ដូចជានៅតាមមូលដ្ឋានរបស់ប្រជាពលរដ្ឋដោយផ្ទាល់តែម្តងដែលការងារទាំងនោះទទួលបានអត្ថប្រយោជន៍ច្រើនដូចទៅនឹងបណ្តាប្រទេសជិតខាងផងដែរដូចជាទទួលបានប្រាក់ឈ្នួលសមរម្យបើធៀបជាមួយបណ្តាប្រទេសជិតខាងមួយចំនួននាពេលបច្ចុប្បន្ន ,កន្លែងការងារនៅក្បែរផ្ទះ និងការចំណាយទាប ដែលអាចឱ្យប្រជាពលរដ្ឋអាចសន្សំសំចៃបានច្រើន៕

អត្ថបទ ៖ សំអឿន