ព័ត៌មានជាតិ

ក្រុមហ៊ុនចិន សាងសង់អាកាសយានដ្ឋានតេជោតាខ្មៅ មានបទពិសោធន៍សាងសង់គម្រោងធំៗជាង ២០០ នៅតំបន់អាស៊ី

បានផុស

២ ម៉ោង មុន

នៅ

ថ្ងៃពុធ ២៣ តុលា ២០២៤

ដោយ

ក្រុមហ៊ុន Shanghai Geoharbour Group ជាក្រុមហ៊ុនដ៏ធំមួយមានមូលដ្ឋាននៅប្រទេសចិន ដែលមានបទពិសោធន៍ចូលរួមសាងសង់គម្រោងធំៗជាង ២០០ គម្រោងនៅក្នុងតំបន់អាស៊ីដែលរួមមាន កំពង់ផែ, អាកាសយានដ្ឋាន, និងកោះសិប្បនិម្មិត និងក៏កំពុងចូលរួមក្នុងគម្រោងសាងសង់អាកាសយានដ្ឋានអន្តរជាតិតេជោក្រុងតាខ្មៅ ដែលគ្រោងនឹងបើកឱ្យដំណើរការក្នុងពេលឆាប់ៗខាងមុខនេះ។ នេះបើតាមការគូសបញ្ជាក់ពីលោក XU Shilong អគ្គនាយកក្រុមហ៊ុន Shanghai Geoharbour Group ក្នុងខណៈចូលជួបលោក ស៊ុន ចាន់ថុល សម្ដែងការគួរសម និងពិភាក្សាការងារ កាលពីព្រឹកថ្ងៃច័ន្ទម្សិលមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសដឹកនាំប្រតិភូចូលជួបសម្តែងការគួរសម និងពិភាក្សាការងារជាមួយលោក ស៊ុន ចាន់ថុល លោក XU Shilong បានរំលេចអំពីសាវតាររបស់ក្រុមហ៊ុន ដែលមានបទពិសោធន៍ចូលរួមសាងសង់គម្រោងធំៗជាង ២០០ គម្រោងនៅក្នុងតំបន់អាស៊ី រួមមាន កំពង់ផែ, អាកាសយានដ្ឋាន, និងកោះសិប្បនិម្មិតជាដើម។

ចំពោះសកម្មភាពក្នុងប្រទេសកម្ពុជា លោក XU Shilong បានគូសបញ្ជាក់ដែរថា ក្រុមហ៊ុនកំពុងចូលរួមក្នុងគម្រោងសាងសង់អាកាសយានដ្ឋានអន្តរជាតិតេជោក្រុងតាខ្មៅ ដែលគ្រោងនឹងបើកឱ្យដំណើរការក្នុងពេលឆាប់ៗខាងមុខនេះ។

ពាក់ព័ន្ធការវិនិយោគនៅកម្ពុជា ក្រុមហ៊ុនបានសម្តែងនូវចំណាប់អារម្មណ៍ក្នុងការស្វែងយល់បន្ថែមទៀតនូវសក្ដានុពលនៃការវិនិយោគលើតំបន់សេដ្ឋកិច្ចពិសេស និងហេដ្ឋារចនាសម្ព័ន្ធនៅក្នុងប្រទេសកម្ពុជា។

ជាការឆ្លើយតប លោក ស៊ុន ចាន់ថុល បានបង្ហាញជូនគណៈប្រតិភូអំពីគម្រោងអភិវឌ្ឍន៍ក្នុងវិស័យហេដ្ឋារចនាសម្ព័ន្ធដូចមាន គម្រោងផ្លូវល្បឿនលឿន គម្រោងព្រែកជីកហ្វូណនតេជោ និងកំពង់ផែ ដែលអនុញ្ញាតជូនវិនិយោគិនក៏ដូចជាក្រុមហ៊ុន Shanghai Geoharbour Group ផ្ទាល់ អាចពិនិត្យលទ្ធភាពជ្រើសរើសការបណ្ដាក់ទុនវិនិយោគ៕