១សប្ដាហ៍​ អ.ដ.ក បានសម្រុះសម្រួលផ្សះផ្សាបញ្ចប់វិវាទ​ដោយជោគជ័យលើសំណុំរឿង​ ៤​ករណី

រយៈពេល ១សប្ដាហ៍កន្លងមកនេះ​ ពោលគឺចាប់ពីថ្ងៃទី​១៤-១៨ ខែតុលា ឆ្នាំ២០២៤ អាជ្ញាធរជាតិដោះស្រាយវិវាទក្រៅប្រព័ន្ធតុលាការ (​ អ.ដ.ក.)​ បានសម្រុះសម្រួលផ្សះផ្សាបញ្ចប់​ដោយជោគជ័យវិវាទ​ ៤​ករណី។

ក្នុងចំណោមវិវាទចំនួន​ ៤ករណីនេះ មានវិវាទពាក់ព័ន្ធនឹងកិច្ចសន្យាទិញលក់ដី ៣ករណី និងវិវាទពាក់ព័ន្ធនឹងកិច្ចសន្យាខ្ចីប្រាក់ ១ករណី។ សំណុំរឿង ១ក្នុងចំណោម៣ ពាក់ព័ន្ធនឹងកិច្ចសន្យាទិញលក់ដី គឺកើតចេញពីការមិនអនុវត្តកាតព្វកិច្ចនៃកិច្ចសន្យាទិញលក់ដីស្រែចំនួន ២ប្លង់ ស្ថិតនៅឃុំភ្នំសំពៅ ស្រុកបាណន់ ខេត្តបាត់ដំបង តាំងពីឆ្នាំ ២០២៣ ដោយកន្លងមក គូភាគីបានព្យាយាមរកដំណោះស្រាយវិវាទ ប៉ុន្តែនៅតែមិនទទួលបានជោគជ័យ។ ក្រោយមក នៅអំឡុងខែកក្កដា ឆ្នាំ២០២៤ នេះ ករណីវិវាទខាងលើ ត្រូវបានភាគីម្ខាងដាក់ពាក្យបណ្តឹងមក អ.ដ.ក. ដើម្បីស្នើសុំសម្រុះសម្រួលផ្សះផ្សាបញ្ចប់វិវាទ។

បើតាម​ អ.ដ.ក.​ គូភាគីវិវាទក្នុងសំណុំរឿងទាំង​ ៤​ករណី ខាងលើ​បានសះជាជាមួយគ្នា ហើយបានផ្តិតមេដៃលើកំណត់ហេតុព្រមព្រៀងបញ្ចប់វិវាទ ដែលផ្អែកតាមច្បាប់ កំណត់ហេតុនេះមានអានុភាពអនុវត្តដូចសាលក្រមស្ថាពររបស់តុលាការផងដែរ៕