ព័ត៌មានជាតិ

ថៃស្នើឲ្យអាជីវករខ្មែរលក់ដូរ នៅផ្សាររោងក្លឿ ត្រូវមានលិខិតឆ្លងដែនទាំងអស់គ្នា

បានផុស

៤ years មុន

នៅ

ថ្ងៃព្រហស្បតិ៍ ១១ មីនា ២០២១

ដោយ

អាជ្ញាធរខេត្តស្រះកែវនៃប្រទេសថៃ បានស្នើឲ្យអាជីវករខ្មែរលក់ដូរនៅផ្សាររោងក្លឿ ត្រូវមានលិខិតឆ្លងដែនទាំងអស់គ្នា និង ត្រូវមានលិខិតបញ្ជាក់ថា គ្មានជំងឺកូវីដ១៩រយៈពេល៧២ម៉ោង ដែលចេញដោយអាជ្ញាធរសុខាភិបាលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំនេះ បានធ្វើឡើងនៅក្នុងកិច្ចប្រជុំទ្វេភាគីរវាងលោក គៀត ពិស័ក្តចាន់ត្រា អភិបាលខេត្តតាកែវនៃប្រទេសថៃ ជាមួយលោក អ៊ុំ រាត្រី អភិបាលខេត្តបន្ទាយមានជ័យ កាលពីថ្ងៃទី៩ ខែមីនា ឆ្នាំ២០២១ នៅទីស្នាក់ការគយច្រកទ្វារព្រំដែនអន្តរជាតិខ្លងឡឹកស្រុកអារញ្ញប្រាថេតខេត្តស្រះកែវព្រះរាជាណាចក្រថៃ ទល់នឹងច្រកទ្វារព្រំដែនអន្តរជាតិប៉ោយប៉ែតក្រុងប៉ោយប៉ែត ខេត្តបន្ទាយមានជ័យ។

យោងតាមរបាយការណ៍ស្ដីពីលទ្ធផលនៃកិច្ចប្រជុំរវាងរដ្ឋបាលខេត្តបន្ទាយមានជ័យនិងរដ្ឋបាលខេត្តស្រះកែវនៃព្រះរាជាណាចក្រថៃ ផ្ញើជូនសម្ដេចក្រឡាហោម ស ខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដែលទើបទទួលបាននៅថ្ងៃនេះ បានឲ្យដឹងថា លទ្ធផលនៃកិច្ចប្រជុំកិច្ចប្រជុំភាគីទាំងពីរ នៅបន្តអនុវត្តតាមស្មារតីនៃកិច្ចប្រជុំរវាងភាគីទាំងពីរកាលពីថ្ងៃទី១៧ ខែធ្នូ ឆ្នាំ២០២០ ដោយភាគីទាំងពីរនៅតែរក្សាចំណងមិត្តភាពនិងកិច្ចសហប្រតិបត្តិការយ៉ាងជិតស្និទ្ធជាមួយគ្នាដែរ ទោះបីស្ថិតក្នុងដំណាក់កាលរាតត្បាតនៃជំងឺកូវីដ១៩ ក៏ដោយ។ តាមរបាយការណ៍បានបន្តថា ភាគីទាំងពីរបានឯកភាពអនុវត្តវិធានការសុខាភិបាល ចំពោះអាជីវករនិងពលករកម្ពុជា ដែលមានបំណងចូលទៅប្រកបអាជីវកម្មនិងបម្រើការងារក្នុងបរិវេណផ្សារោងក្លឿស្រុកអារញ្ញប្រាថេត ខេត្តស្រះកែវ ដោយតម្រូវឲ្យមានលិខិតបញ្ជាក់គ្មានកូវីដ១៩មិនលើស៧២ម៉ោង ដែលចេញដោយអាជ្ញាធរសុខាភិបាលកម្ពុជានិងត្រូវធ្វើចត្តាឡីស័ករយៈពេល១៤ថ្ងៃនៅដីថៃព្រមទាំងឆ្លងកាត់ការធ្វើតេស្តរកកូវីដ១៩ចំនួន២លើកទៀត។ ប្រសិនបើលទ្ធផលតេស្តអវិជ្ជមាន ទើបអនុញ្ញាតឲ្យប្រកបអាជីវករនិងធ្វើការងារបាន។

ក្នុងកិច្ចប្រជុំនោះភាគីថៃ តម្រូវឲ្យមានលិខិតឆ្លងដែន សម្រាប់អាជីវករនិងប័ណ្ណព្រំដែន សម្រាប់ពលករព្រមទាំង ត្រូវមានប័ណ្ណការងារ ដែលចេញដោយមន្ទីរការងារខេត្តស្រះតាកែវនឹងត្រូវបានអនុញ្ញាតឲ្យស្នាក់នៅយ៉ាងតិច៩០ថ្ងៃ បន្ទាប់ពីបានធ្វើចត្តាឡីស័កនិងមិនត្រូវចាកចេញពីតំបន់ដែលអាជ្ញាធរថៃបានអនុញ្ញាតនោះឡើយ។ នៅក្នុងរបាយការណ៍នោះរដ្ឋបាលខេត្តបន្ទាយមានជ័យ បានស្នើសុំភាគីថៃសម្រួលអាជីវករអាចប្រើប្រាស់ត្រឹមប័ណ្ណព្រំដែនចំពោះអ្នក ដែលមិនមានលិខិតឆ្លងដែន ព្រោះងាយស្រួលធ្វើហើយភាគីថៃបានទទួលយកសំណើនេះទៅពិភាក្សាជាមួយមន្ទីរអង្គភាពពាក់។ ពាក់ព័ន្ធភាគីទាំងពីរបានឯកភាពថា នឹងធ្វើរបាយការណ៍ស្ដីពីលទ្ធផលនៃកិច្ចប្រជុំត្រូវថ្នាក់ជាតិដើម្បីសុំគោលការណ៍ពីប្រមុខរដ្ឋាភិបាលនៃប្រទេសទាំងពីរ។

ក្រោយទទួលបានការឯកភាពជាគោលការណ៍ពីថ្នាក់ដឹកនាំនៃប្រទេសទាំងពីរភាគីទាំងពីរ ត្រូវជួបប្រជុំគ្នាម្ដងទៀត ដើម្បីពិភាក្សាការងារលំអិតនិងរៀបចំកំណត់ហេតុរួម ដែលនឹងត្រូវចុះហត្ថលេខាដោយអភិបាលខេត្តទាំងពីរ ដើម្បីធ្វើជាឯកសារគោលសម្រាប់អនុវត្ត៕

អត្ថបទ៖ សំអឿន

សូមចុចអាន៖ ប្រកាសរកជនពាក់ព័ន្ធ អ្នកវិជ្ជមានកូវីដ១៩ ចំនួន២នាក់ នៅខេត្តបាត់ដំបង