មេប៉េអឹម បញ្ជាឱ្យធ្វើអធិការកិច្ចលើប៉េអឹមខេត្តកណ្ដាលម្នាក់ដែលបោចសក់តៃកុងឡាន បើល្មើសច្បាប់ ត្រូវបញ្ជូនទៅតុលាការ

អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានឱ្យដឹងថា មេបញ្ជាការកងរាជអាវុធហត្ថលើផ្ទៃប្រទេស បានបញ្ជាឱ្យធ្វើអធិការកិច្ច លើកងរាជអាវុធហត្ថខេត្តកណ្ដាលម្នាក់ដែល រងការរិះគន់យ៉ាងចាស់ដៃ ពីសំណាក់មហាជន ចំពោះទង្វើមិនគប្បី ដែលបានបោចសក់ក្របួចអូស យុវជនម្នាក់ដែលជាតៃកុងរថយន្តធន់ធំ និងបុរសម្នាក់ទៀត ស្ទុះទៅចាប់ទូរស័ព្ទ ពីស្រ្តីម្នាក់ កាលពីថ្ងៃទី២២ ខែតុលា ឆ្នាំ២០២៤ នៅផ្លូវជាតិលេខ៦ ចំណុចស្ពានភូមិថ្មី ឃុំរកាកោង២ ស្រុកមុខកំពូល ខេត្តកណ្ដាល បើរកឃើញថាល្មើសច្បាប់ នឹងបញ្ជូនទៅតុលាការ។

ក្រោយផ្ទុះករណីនេះ លើបណ្ដាញសង្គម នៅថ្ងៃទី២៣នេះ  អ្នកនាំពាក្យកងរាជអាវុធហត្ថលើផ្ទៃប្រទេស បានឱ្យដឹងថា មេបញ្ជាការកងរាជអាវុធហត្ថលើផ្ទៃប្រទេស បានបញ្ជាឱ្យ លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្តកណ្ដាល កោះហៅឈ្មោះ ពៅ សាលួត ដែលបានបង្ហាញឥរិយាបថបំពានក្រមសីលធម៌ វិជ្ជាជីវៈ ល្មើសបទវិន័យកងទ័ព  ដើម្បីធ្វើការត្រួតពិនិត្យជំហានដំបូង។

លោក អេង ហ៊ី អ្នកនាំពាក្យកងរាជអាវុធហត្ថបាន សរសេរលើគណនីហ្វេសប៊ុកនាថ្ងៃទី២៣ ខែតុលា ថា៖«អនុវត្តទិសស្លោករបស់កងរាជអាវុធហត្ថ “ចំពោះប្រទេសជាតិត្រូវតែការពារ, ចំពោះប្រជាត្រូវតែបម្រើ, ច្បាប់ត្រូវតែគោរព និងបទល្មើសត្រូវតែបង្ក្រាប” នឹងចាត់តាំងធ្វើអធិការកិច្ច ក្នុងករណីរកឃើញបុគ្គលនេះ(បុគ្គល ពៅ សាលួត) ប្រព្រឹត្តបទល្មើស កងរាជអាវុធហត្ថ នឹងកសាងសំណុំរឿងបញ្ជូនទៅតុលាការតាមច្បាប់»។

ក្នុងករណីនេះដែរ តាមកិច្ចសន្យារវាងតៃកុងរថយន្ត ជាមួយអធិការដ្ឋាននគរបាលស្រុកមុខកំពូល បានបង្ហាញថា តៃកុងរថយន្តមានឈ្មោះ ឃាន ជូរីន អាយុ២៩ឆ្នាំ មិនឈប់រថយន្ត នៅពេលសមត្ថកិច្ចចម្រុះហៅឱ្យឈប់ ( នៅលើហ្វេសបុកដែលបង្ហោះវីដេអូនោះ គាត់ឆ្ងល់អត់ខុសអីសោះ ក៏ហៅដែរ ) ។ យុវជនខាងលើ បានសន្យាចំនួន០៥ ចំណុច ជាមួយសមត្ថកិច្ចផងដែរ ៕

ដោយ៖សំណាង