ព្រះរាជពិធីបុណ្យខួបលើកទី២០ នៃការ​គ្រង​ព្រះបរមសិរី​រាជសម្បត្តិ ព្រះករុណា ព្រះបាទសម្តេចព្រះបរមនាថ នរោត្តម សីហមុនី នឹង​មាន​ការអុជកាំជ្រួច​បី​យប់​ជាប់ៗគ្នា

ភ្នំពេញ ៖ គណៈកម្មាធិការជាតិ​រៀប​ចំ​បុណ្យជាតិ-អន្តរជាតិ បាន​ជូន​ដំណឹង​អំពី​ការ​រៀបចំនូវព្រះរាជពិធីបុណ្យខួបលើកទី២០ នៃការគ្រងព្រះបរមសិរីរាជសម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី។

សេចក្តីជូនដំណឹងនេះ បានគូសបញ្ជាក់ថា ព្រះរាជពិធីបុណ្យខួបលើកទី២០​ នៃ​រាជាភិសេក​ករុណា ព្រះបាទ​សម្តេចព្រះបរមនាថ នរោត្តម សីហមុនី នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី២៨ ខែតុលា ដល់ថ្ងៃទី៣០ ខែតុលា ឆ្នាំ២០២៤ ដូច្នេះគណៈកម្មាធិការជាតិរៀបចំបុណ្យជាតិ-អន្តរជាតិ ណែនាំ ដល់ក្រសួងស្ថាប័ន​ពាក់ព័ន្ធ​ត្រូវ​ត្រៀម​រៀបចំ​ពិធីនេះឱ្យបានស័ក្តិសមនិងមហោឡារិក។

នៅ​ក្នុងឱកាសប្រារព្ធព្រះរាជពិធីបុណ្យខួបលើកទី២០ ​នៃ​ការ​គ្រងព្រះបរមសិរីរាជសម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី ដែល​ទិវា​ជា​ប្រវត្តិសាស្ត្រ គណៈកម្មាធិការ​ជាតិ​រៀបចំ​បុណ្យជាតិ-អន្តរជាតិ បាន​បញ្ជាក់ដែរ​ថា ដើម្បី​សម្តែង​នូវ​កតញ្ញូតាធម៌ និងថ្វាយព្រះរាជសព្ទសាធុការពរ បវរមហាប្រសើរថ្វាយ ករុណាព្រះបាទសម្តេចព្រះបរមនាថ នរោត្តម សីហមុនី នៅថ្ងៃទី២៨ ខែតុលា ឆ្នាំ២០២៤ នឹង​មាន​ការ​រៀប​ចំ​ធ្វើពិធីសាសនាទៅតាមព្រះរាជប្បវេណី នៅក្នុងព្រះបរមរាជវាំង។

ចំណែកនៅថ្ងៃទី២៩ ខែតុលា ឆ្នាំ២០២៤ មានរៀបចំព្រះរាជពិធីថ្វាយព្រះពរ នៅក្នុងព្រះបរមរាជវាំង។ សម្រាប់នៅថ្ងៃទី៣០ ខែតុលា ឆ្នាំ២០២៤ វេលាម៉ោង៨និង០០នាទីព្រឹក ចាប់ផ្តើមមិទ្ទីញមហាជន នៅ​មុខ​ព្រះបរមរាជវាំង ក្រោម​ព្រះរាជាធិបតីភាពដ៏ខ្ពង់ខ្ពស់បំផុត ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីសក្តារៈដ៏ខ្ពង់ខ្ពស់បំផុត។ ជាមួយគ្នា​នេះ គណៈកម្មាធិការជាតិរៀបចំបុណ្យជាតិ-អន្តរជាតិ ក៏​បាន​ណែនាំ​ក្រសួង​ស្ថាប័ន​នានា​ត្រូវ​រៀប​ចំ​តាំង​ព្រះបរម​ឆាយាល័ក្ខណ៍​ព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា ដោយ​មាន​តុបតែង​លម្អ​បំភ្លឺ​ភ្លើងពណ៌ ពាក្យ​ស្លោក​ថ្វាយ​ព្រះពរ និង​សារ​លិខិត​ថ្វាយ​ព្រះពរ ព្រម​ទាំង​លើក​ទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក នៅ​តាមក្រសួង រដ្ឋលេខាធិការដ្ឋាន និង​ស្ថាប័ន​របស់​ខ្លួន។

គួរ​បញ្ជាក់​ថា ក្នុង​រយៈ​បី​ថ្ងៃ​ នៃ​ការ​ប្រារព្ធ​ព្រះរាជពិធីបុណ្យ​ខួបលើកទី២០ នៃ​ការ​គ្រង​ព្រះបរមសិរីរាជសម្បត្តិ ព្រះ​ករុណា​ព្រះបាទ​សម្តេច​ព្រះបរមនាថ នរោត្តម សីហមុនី នឹង​មាន​ការ​អុជ​កាំជ្រួច​រយៈ​ពេល​បី​យប់​ជាប់ៗគ្នា ចាប់ពីម៉ោង១៩:០០នាទីយប់តទៅ។

សូម​ជម្រាប​ជូន​ថា ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ត្រូវ​បាន​ក្រុមប្រឹក្សារាជសម្បត្តិបោះឆ្នោតជ្រើសរើសជាឯកច្ឆន្ទ នាថ្ងៃព្រហស្បតិ៍ ១កើត ខែអស្សុជ ឆ្នាំវក ឆស័ក ព.ស.២៥៤៨ ត្រូវនឹងថ្ងៃទី១៤ ខែតុលា ឆ្នាំ២០០៤ ជា ព្រះមហាក្សត្រ នៃព្រះរាជាណាចក្រកម្ពុជា ក្នុង​ព្រះ​គោរមងារ «ព្រះករុណា​ព្រះបាទសម្តេច​ព្រះបរមនាថ នរោត្តម សីហមុនី ស​មាន​ភូមិជាតិសាសនា រក្ខតខត្តិយា ខេមរារដ្ឋរាស្ត្រ ពុទ្ធិន្ទ្រាធរាមហាក្សត្រ ខេមរាជនា សមូហោភាស កម្ពុជឯករាជ រដ្ឋបូរណសន្តិ សុភមង្គលា សិរីវិបុលា ខេមរាស្រីពិរាស្ត្រ ព្រះចៅក្រុងកម្ពុជាធិបតី» ហើយសម្រេចយកថ្ងៃទី២៩ ខែតុលា ឆ្នាំ២០០៤ ជាទិវាប្រវត្តិសាស្ត្រនៃការគ្រងព្រះបរមសិរីរាជសម្បត្តិ។ គឺ​ថ្ងៃ​នេះ​ហើយ​ដែល​ប្រជារាស្ត្រ​ខ្មែរ​គ្រប់រូប បាន​សម្តែង​ឆន្ទៈ និង​មនោសញ្ចេតនា​របស់ខ្លួនសប្បាយរីករាយយ៉ាងជ្រាលជ្រៅបំផុតចំពោះ ព្រះករុណាជាអម្ចាស់ជីវិតលើត្បូង ជា​ទី​គោរពសក្ការៈ​ដ៏​ខ្ពង់ខ្ពស់​បំផុត ដែល​ព្រះអង្គ​សព្វព្រះរាជហឫទ័យ ទ្រង់​គ្រង​ព្រះបរមសិរីរាជសម្បត្តិ ដើម្បី​បានគង់ជាម្លប់ដ៏សុខក្សេមក្សាន្ត ត្រជាក់ត្រជំរបស់មាតុភូមិ និងប្រជារាស្ត្រ របស់ព្រះអង្គ៕

អត្ថបទ ៖ សុភា