ព័ត៌មានជាតិ

ក្រុមមន្ត្រីជំនាញរកឃើញគ្រាប់រ៉ុកកែតប្រឆាំងរថក្រោះ១គ្រាប់ក្នុងស្ទឹងសង្កែ

បានផុស

៤ years មុន

នៅ

ថ្ងៃព្រហស្បតិ៍ ១១ មីនា ២០២១

ដោយ

ក្រុមមន្ត្រីបច្ចេកទេសបានរកឃើញគ្រាប់យុទ្ធភណ្ឌមិនទាន់ផ្ទុះ១គ្រាប់ជាប្រភេទរ៉ុកកែត ដែលបន្សល់ពីសម័យសង្គ្រាមស៊ីវិល ក្នុងស្ទឹងសង្កែក្រុងបាត់ដំបង ខណៈកំពុងធ្វើការអភិវឌ្ឍន៍កែលម្អច្រាំងស្ទឹងសង្កែចៀសវាងការបាក់ស្រុតបន្តទៀត។

លោក ផេង សិទ្ធី អភិបាលក្រុងបាត់ដំបងបានប្រាប់ឲ្យដឹងនៅព្រឹកថ្ងៃទី១១ខែមីនាឆ្នាំ២០២១នេះថា ក្រុមជាងរៀបចំកែលម្អច្រាំងស្ទឹងសង្កែត្រង់ចន្លោះស្ពានថ្មបុរាណនិងស្ពានថ្មថ្មីមុខសាលាខេត្តបាត់ដំបងបានប្រទះឃើញគ្រាប់យុទ្ធភណ្ឌមិនទាន់ផ្ទុះចំនួន១គ្រាប់ដែលបន្សល់ទុកពីសម័យសង្គ្រាមដោយកប់នៅបាតស្ទឹងសង្កែស្ថិតក្នុងភូមិសាស្ត្រភូមិព្រែកតាតន់ សង្កាត់ព្រែកព្រះស្តេចក្រុង/ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីអង្គភាពជំនាញបានឲ្យដឹងដែរថា គ្រាប់យុទ្ធភណ្ឌដែលប្រទះឃើញខាងលើនេះ ជាប្រភេទគ្រាប់រ៉ុកកែតប្រឆាំងរថក្រោះធុនមី៤១(Mi41)ផលិតនៅសហភាពសូវៀតដែលវាមានកម្លាំងខ្លាំងក្នុងការកម្ទេចរថក្រោះ។

បច្ចុប្បន្នទីតាំងគ្រាប់រ៉ុកកែត១គ្រាប់នេះ ក្រោយពីក្រុមបច្ចេកទេសរកឃើញមន្ត្រីអង្គភាពកំចាត់មីនទី២បានចុះហ៊ុមព័ទ្ធដាក់សញ្ញាសំគាល់បម្រាមដើម្បីធ្វើការពិនិត្យឲ្យបានច្បាស់លាស់ឈានដល់កំណត់ថ្ងៃកម្ទេចចោលនៅហ្នឹងកន្លែងឬក៏នាំយកទៅរក្សាទុកនៅកន្លែងមានសុវត្ថិភាពរងចាំពេលវេលាបំផ្លាញចោលតាមដែលអាចធ្វើទៅបាន៕

អត្ថបទ ៖ សៅ សារិទ្ធ