រដ្ឋសភានឹងបើកសម័យប្រជុំពេញអង្គ នៅថ្ងៃទី៣១ ខែតុលា ដែលមានរបៀបវារៈចំនួន៧

នៅថ្ងៃទី៣១ ខែតុលា ឆ្នាំ២០២៤ រដ្ឋសភាកម្ពុជា នឹងបើកសម័យប្រជុំពេញអង្គរបស់ខ្លួន ដែលមានរបៀបវារៈចំនួន៧។ ការកំណត់ថ្ងៃបើកសម័យប្រជុំរដ្ឋសភា ត្រូវបានសម្រេចដោយគណៈកម្មាធិការអចិន្ត្រៃយ៍រដ្ឋសភា ក្នុងកិច្ចប្រជុំ នាព្រឹកថ្ងៃទី២៤ ខែតុលា ឆ្នាំ២០២៤។

កិច្ចប្រជុំគណៈកម្មាធិការអចិន្ត្រៃយ៍រដ្ឋសភារកម្ពុជា ដែលប្រព្រឹត្តទៅក្រោមអធិបតីសម្តេច ឃួន សុដារី ប្រធានរដ្ឋសភា បានអនុម័តកំណត់កាលបរិច្ឆេទបើកសម័យប្រជុំរដ្ឋសភា លើកទី៣ នីតិកាលទី៧ នៅព្រឹកថ្ងៃទី៣១​ ខែតុលា ឆ្នាំ២០២៤ ដោយមានរបៀបវារៈ ស្ដាប់ព្រះរាជសារព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ជូនសម័យប្រជុំរដ្ឋសភា លើកទី៣ នីតិកាលទី៧ និងរបាយការណ៍សង្ខេបស្តីពីសកម្មភាពការងាររបស់រដ្ឋសភាចន្លោះសម័យប្រជុំរដ្ឋសភាលើកទី២ និង លើកទី៣ នីតិកាលទី៧។

បន្ថែមពីនេះ សម័យប្រជុំរដ្ឋសភា ក៏នឹងប្រកាសអំពីសុពលភាពនៃអាណត្តិរបស់លោក ហ៊ី វីរៈ ជាតំណាងរាស្ត្រមណ្ឌលខេត្តកំពង់ឆ្នាំង ជំនួសសម្តេចចៅហ្វាវាំង គង់ សំអុល ដែលបានទទួលមរណភាព ការបោះឆ្នោតជ្រើសតាំងលោក អ៊ុត រ៉ាឌី ជាសមាជិកឧត្តមក្រុមប្រឹក្សានៃអង្គចៅក្រម សម្រាប់អាណត្តិទី៣ ជ្រើសតាំងដោយរដ្ឋសភា ព្រមទាំងការពិភាក្សា និងអនុម័តសេចក្តីស្នើវិសោធនកម្មបទបញ្ជាផ្ទៃក្នុង នៃរដ្ឋសភាកម្ពុជា។

ដោយឡែក សេចក្ដីព្រាងច្បាប់ចំនួនពីរ ដែលស្នើឡើងដោយរាជរដ្ឋាភិបាល ក៏ត្រូវបានដាក់បញ្ចូលក្នុងរបៀបវារៈប្រជុំពេញអង្គរដ្ឋសភា នៅថ្ងៃទី៣១ ខែតុលាផងដែរ។ ក្នុងនោះ មានការពិភាក្សា និងអនុម័តសេចក្តីព្រាងច្បាប់ស្តីពីការអនុម័តយល់ព្រមឱ្យព្រះរាជាណាចក្រកម្ពុជាចូលជាភាគីនៃកិច្ចព្រមព្រៀងស្តីពីការទទួលយកបទប្បញ្ញត្តិបច្ចេកទេសរួមនៃអង្គការសហប្រជាជាតិសម្រាប់យានយន្ត បរិក្ខារ និងគ្រឿងបន្លាស់ ដែលអាចបំពាក់ និង/ឬប្រើប្រាស់ទៅលើយានយន្តនិងលក្ខខណ្ឌសម្រាប់ការទទួលស្គាល់ទៅវិញ ទៅមកនៃការផ្តល់អនុលោមភាពដោយឈរលើមូលដ្ឋាននៃបទប្បញ្ញត្តិអង្គការសហប្រជាជាតិ និងការពិភាក្សា និងអនុម័តសេចក្តីព្រាងច្បាប់ស្តីពីប្រព័ន្ធទឹកកខ្វក់៕